បរទេស ៖ នៅឥណ្ឌូនេស៊ី វិធីសាស្ត្រនៃការលេងតុងទីន ឬគេហៅថា Arisan ត្រូវបានប្រើប្រាស់ជាយូរឆ្នាំមកហើយតាំងតែពីមុនឆ្នាំ២០០៩មកម្ល៉េះ ជាពិសេសសម្រាប់ស្ត្រីមេផ្ទះដែលមានចំណូលទាប។

នៅឥណ្ឌូនេស៊ីប្រាក់ ខែជាមធ្យមនៃពលរដ្ឋភាគច្រើនមានមិនដល់២០០ដុល្លារឡើយ ហើយមនុស្សពាក់កណ្តាលនៃពលរដ្ឋមិនមានប្រើប្រាស់កុងធនាគារនោះឡើយ។ ដូច្នេះហើយទើបមកដល់ឆ្នាំ២០០៩ អាជីវកម្មបែបបច្ចេកវិទ្យាថ្មីមួយត្រូវបានបង្កើតឡើងដោយការទាញយកប្រព័ន្ធដំណើរការបែបហិរញ្ញវត្ថុមិនផ្លូវការ(តុងទីន)នេះទៅជាកម្មវិធីទូរស័ព្ទដែលមានភាពងាយស្រួលក្នុងការប្រើប្រាស់កាន់តែខ្លាំង ហើយព្រមទាំងអាចផ្តល់ចំណេះដឹងផ្នែកហិរញ្ញវត្ថុ និងជួយផ្លាស់ប្តូរទំលាប់ការចាយលុយ និងជីវភាពរបស់ក្រុមពលរដ្ឋជាស្ត្រីដែលមានចំណូលទាបបានជាច្រើនពាន់ម៉ឺននាក់មកហើយ។

តាមរយៈទិន្នន័យចុងក្រោយបានបង្ហាញថា កម្មវិធី Mapan បានក្លាយទៅជាកម្មវិធីដែលផ្តល់សេវាកម្មដ៏មានអត្ថប្រយោជន៍ទៅដល់ក្រុមគ្រួសារដែលមានជីវភាពក្រីក្រប្រមាណជាង ៣លានគ្រួសារ​ និងជួយពួកគេឲ្យអាចធ្វើការចាយវាយប្រកបដោយការគិតគូរមានប្រសិទ្ធភាព និងអាចទិញទំនិញដែលមានតម្លៃធូរថ្លៃនៅលើទីផ្សារផងដែរ។

មុខងារពាក់ព័ន្ធនឹងហិរញ្ញវត្ថុគ្រួសារមានច្រើន ប៉ុន្តែការយកចិត្តទុកដាក់សំខាន់របស់ Mapan គឺការលើកទឹកចិត្តដល់ស្ត្រី និងក្រុមគ្រួសារក្រីក្រក្នុងការសន្សំប្រាក់ជាជាងការជ្រើសយកសេវាកម្មទទួលកម្ចីដែលវានឹងធ្វើឲ្យពួកគេធ្លាក់ចូលក្នុងបំណុលកាន់តែច្រើន។ មិនត្រឹមតែប៉ុណ្ណោះ ពួកគេអាចក្លាយទៅជាភ្នាក់ងារលក់ទំនិញដែលមានតម្លៃធូរថ្លៃនៅលើកម្មវិធី និងអាចទទួលបានប្រាក់កម្រៃបន្ថែមជារៀងរាល់ខែផងដែរ។

មុខងារផ្សេងទៀតរបស់ Mapan គឺអាចប្រើប្រាស់ជំនួសឲ្យការកត់ត្រាដោយដៃរបស់ក្រុមស្ត្រីមេផ្ទះក្នុងការចំណាយប្រចាំខែ ហើយអាចផ្តល់ទិន្នន័យវិភាគសំខាន់ៗប្រចាំខែ ប្រចាំឆ្នាំដល់ពួកគេក្នុងការរៀបចំផែនការថ្មីលើហិរញ្ញវត្ថុ ហើយផ្តល់ជម្រើសទៅលើទំនិញចាំបាច់ដែលមានតម្លៃធូរថ្លៃជាង និងទំនិញបញ្ចុះតម្លៃផងដែរ។

គួរឲ្យដឹងដែរថា ធុរកិច្ចបរិយាប័ន្ន គឺជាអាជីវកម្មឈរលើគោលការណ៍ធុរកិច្ច សំដៅទៅលើអង្គភាពទាំងឡាយណាដែលបង្កើតដំណោះស្រាយជាប្រព័ន្ធ មានភាពច្នៃប្រតិដ្ឋ និងមានទ្រង់ទ្រាយធំ ដែលឆ្លើយតបទៅនឹងបញ្ហាប្រឈមពាក់ព័ន្ធរបស់ប្រជាជនក្រីក្រ និងប្រជាជនមានចំណូលទាប (BoP និង B40)។ បន្ទាត់អាជីវកម្មបរិយាប័ន្ន ត្រូវបានបង្កើតឡើងក្នុងគោលបំណងផ្តល់ប្រាក់ចំណូលខ្ពស់គួរសម និងបង្កើននូវស្តង់ដារជីវភាពរស់នៅប្រសើរជាងមុនដល់ក្រុមមនុស្សដែលមានចំណូលទាបនៅបាតពីរ៉ាមីត ៤០% និងក្រុមមនុស្សដែលងាយរងគ្រោះ៕