សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
យោងតាមសេចក្ដីព្រាងច្បាប់ហិរញ្ញវត្ថុសម្រាប់គ្រប់គ្រងឆ្នាំ២០២៤ វិស័យកសិកម្មត្រូវបានរំពឹងថា នឹងបន្តមានកំណើនល្អក្នុងរង្វង់ ១,១% នៅឆ្នាំ២០២៤ បើធៀបនឹងឆ្នាំ២០២៣ ដោយក្នុងនោះ ប្រមាណ ០,៩% ពឹងផ្អែកលើនិន្នាការល្អនៃអនុវិស័យដំណាំ ខណៈដែលអនុវិស័យចិញ្ចឹមសត្វនៅបន្តមានស្ថិរភាព។
ការព្យាករកំណើនក្នុងរង្វង់ ១,១%នេះ ចូលរួមគាំទ្រពីអនុវិស័យដំណាំបន្តនិន្នាការល្អ ដោយសារការរំពឹងទុកនូវកំណើនផលិតកម្ម ជំរុញដោយកិច្ចព្រមព្រៀងពាណិជ្ជកម្មសេរីផ្សេងៗរួមមាន «កិច្ចព្រមព្រៀងពាណិជ្ជកម្មសេរីកម្ពុជា-ចិន, កិច្ចព្រមព្រៀងពាណិជ្ជកម្មសេរីកម្ពុជា-កូរ៉េ និងកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP)»ជាដើម គួបផ្សំនឹងការបង្កើនការវិនិយោគរបស់រាជរដ្ឋាភិបាល តាមរយៈការបន្តលើកទឹកចិត្តផ្នែកពន្ធសម្រាប់ការនាំចូលវត្ថុធាតុដើមកសិកម្ម និងការផ្តល់ហិរញ្ញប្បទានក្នុងការជំរុញផលិតកម្មក្នុងស្រុក។
ដោយឡែកសហគមន៍កសិកម្មកន្ទ្រាំងបល្ល័ង្គរស្មីស្ត្រីសាមគ្គី ជាសហគមន៍កសិកម្មមួយដែលបាន និងកំពុងជំរុញអនុវិស័យដំណាំរួមមាន ការដាំបន្លែសុវត្ថិភាព និងដំណាំជាច្រើនមុខ ដែលកសិករជាសមាជិកសហគមន៍ផលិតបាន ដោយមានការធានាអំពីគុណភាព សុវត្ថិភាព មិនបះពាល់សុខភាពអ្នកទទួលទាន ស្របពេលដែលតម្រូវការទីផ្សារបន្លែសុវត្ថិភាពមានកំណើន។
លោក សាន្ត សំណាង អនុប្រធានក្រុមប្រឹក្សាភិបាល នៃសហគមន៍កសិកម្មកន្ទ្រាំងបល្ល័ង្ករស្មីស្ត្រីសាមគ្គី បានឱ្យដឹងថា សហគមន៍នេះត្រូវបានបង្កើតឡើងក្នុងឆ្នាំ២០១៥ ដោយមានសមាជិកចំនួនជាង៣០០នាក់ ស្ថិតក្នុងឃុំកន្ទ្រាំង ស្រុកប្រាសាទបាគង ខេត្តសៀមរាប។ ការបង្កើតសហគមន៍នេះឡើងក្នុងគោលបំណងផ្តល់ផលចំណេញជូនប្រជាសហគមន៍ ដោយជួយសម្របសម្រួល និងស្វែងរកទីផ្សារដំណាំ បន្លែ ជូនកសិករ។ ក្រៅពីជួយសម្របសម្រួលផ្នែកទីផ្សារហើយនោះ សហគមន៍ក៏មានគំាទ្រទៅលើខ្សែច្រវាក់ផលិតផលកសិកម្មមួយចំនួន ដូចជា ការផ្គត់ផ្គងធាតុចូលរួមគ្នា មានជី ថ្នាំកសិកម្ម សម្ភារៈកសិកម្មជាច្រើន ក្នុងតម្លៃសមរម្យ ជាជាងកសិករដែលទិញតែម្នាក់ៗក្នុងតម្លៃខ្ពស់។
នៅក្នុងឱកាសនេះ លោក សំណាង ក៏បានអំពាវនាវឱ្យមានការជួយគាំទ្រផលិតផលបន្លែគ្រប់មុខ ដែលលក់ចេញពីសហគមន៍ រួមមានដូចជា ម្រះ សណ្តែកកួរ ត្រប់វែង ត្រប់ និងត្រប់ពុតលំញង និងបន្លែស្លឹក សាឡាដ៏ស្រួយ ស្ពៃតឿ ផ្កាខាត់ណា និងបន្លែបង្ការមួយចំនួនទៀត ត្រូវបានធានាទាំងគុណភាព អនាម័យ និងការដំាដុះ ដោយសារផលិតផលទាំងនោះ ត្រូវទទួលបានការត្រួតពិនិត្យគុណភាព និងបច្ចេកទេសដាំដុះពីស្ថាប័នជំនាញ។
គួរបញ្ជាក់ដែរថា កាលពីពេលកន្លងមកនេះ កសិករដែលជាសមាជិករបស់សហគមន៍ តែងតែទទួលបានការគាំទ្រ ជួយបណ្តុះបណ្តាលបច្ចេកទេសកសិកម្មពីអង្គការដៃគូ និងគម្រោងរបស់រដ្ឋ បានផ្តោតការយកចិត្តទុកដាក់មកប្រជាសហគមន៍ ហើយបច្ចុប្បន្នសមាជិកសហគមន៍មានចំនួន៦២គ្រួសារហើយ ដែលជាកសិករដាំដំណាំ ហើយសហគមន៍គ្រោងនឹងពង្រីកឱ្យបានចំនួន១៥០គ្រួសារនាពេលខាងមុខ។
លោក សាន្ត សំណាង បានបន្តឱ្យដឹងទៀតថា ដោយសារតម្រូវការទីផ្សារបន្លែសុវត្ថិភាពចេះតែមានកំណើនជារៀងរាល់ថ្ងៃ ក្នុងមួយខែៗសហគមន៍កសិកម្មកន្ទ្រាំងបល្ល័ង្ករស្មីស្ត្រីសាមគ្គី មានលទ្ធភាពផ្គត់ផ្គង់បន្លែទៅកាន់ទីផ្សារនារដូវវស្សាបានប្រមាណ ១តោន ទៅ ២តោន រីឯនៅរដូវប្រាំងវិញ ប្រមាណ ២ តោន ទៅ ២ តោនកន្លះ។ ជាមួយគ្នានេះ ជាការឆ្លើយតបទៅនឹងតម្រូវការទីផ្សារ ថ្មីៗនេះ សហគមន៍មួយនេះកំពុងតែជំរុញឱ្យកសិកររៀនបន្ថែមពីបច្ចេកទេសខាំហ្គេត ដែលជាស្តង់ដាជាតិមួយសម្គាល់ពីផលិតផលដែលមានគុណភាពល្អ ហើយមានសុវត្ថិភាព មិនប៉ះពាល់សុខភាពអ្នកទទួលទាន ។
សូមជម្រាបថា ជាញឹកញាប់មន្ទីរកសិកម្ម រុក្ខាប្រមាញ់ និងនេសាទ ខេត្តសៀមរាប តែងតែជំរុញលើកទឹកចិត្តបងប្អូនកសិករទាំងអស់ ត្រូវចូលជាសមាជិកសហគមន៍កសិកម្ម ដើម្បីអាចទទួលបាននូវផលប្រយោជន៍ជាច្រើន ទាំងទីផ្សារលក់ចេញ និងការគាំទ្រផ្នែកបច្ចេកទេសកសិកម្មជាដើម៕
Account
Security
Favourite Content