ភ្នំពេញ៖ ផលិតផលក្នុងស្រុក ក៏ដូចជាកសិផលនានា នៅតែត្រូវបានជំរុញស្វែងរកទីផ្សារតាមរយៈព្រឹត្តិការណ៍នានា ដូចជាការតាំងពិព័រណ៍ ការផ្សព្វផ្សាយតាមប្រព័ន្ធឌីជីថល ក៏ដូចជាបណ្តាញផ្សេងទៀត ដើម្បីធ្វើយ៉ាងណាអាចឱ្យសាធារណៈជនទូទៅបានស្គាល់ច្បាស់ ជាមួយនឹងការចូលរួមគាំទ្រផលិតផលខ្មែរទាំងនោះ។ ជាក់ស្ដែងកាលពីពេលកន្លងទៅថ្មីៗនេះ ព្រឹត្តិការណ៍ពិព័រណ៍ផលិតផល កសិផលក្នុងស្រុកត្រូវបានរៀបចំនៅក្នុងផ្សារទំនើបអ៊ីអន ទាំង៣ ក្នុងរាជធានីភ្នំពេញ និងបានបញ្ចប់ទៅយ៉ាងជោគជ័យ ក្រោមការចូលរួមពីសំណាក់សហគ្រាសធុនតូច និងមធ្យម សរុបប្រមាណ ៦០ ជាមួយការតាំងបង្ហាញផលិតផលចម្រុះយ៉ាងច្រើន។

ឯកឧត្តមបណ្ឌិត ឈៀង វណ្ណមុនិណ្ឌ ប្រតិភូរាជរដ្ឋាភិបាលទទួកបន្ទុកជានាយកប្រតិបត្តិនៃសហគ្រិនខ្មែរ បានមានប្រសាសន៍ថា សហគ្រាសធុនតូច និងមធ្យមជាច្រើនដែលគាំទ្រដោយសហគ្រិនខ្មែរតាំងពីឆ្នាំ២០២០ បានចូលរួមក្នុងការតាំងពិព័រណ៍ផលិតផលក្នុងស្រុកកាលពីពេលកន្លងទៅនេះ។

ឯកឧត្តមបណ្ឌិតបាន​បញ្ជាក់​ថា ​៖

«​ការ​គាំទ្រ​ដែល​ផ្តល់​ដោយ​រាជ​រដ្ឋាភិបាល​តាម​រយៈ​សហគ្រិនខ្មែរ​ បាន​ជួយ​លើក​កម្ពស់​គុណភាព​ផលិតផល​ក្នុង​ស្រុក ​ដែល​អាច​ឱ្យ​ផលិតផល​ទាំង​នោះ​ទទួលបាន​ស្តង់ដារ​ជាតិ​ និង​អន្តរជាតិ និងចំណាប់អារម្មណ៍ពីសាធារណជន ហើយព្រឹត្តិការណ៍ពិព័រណ៍នេះ ក៏បានលើកទឹកចិត្ត និងបង្កើនទំនុកចិត្តដល់សហគ្រាសធុនតូច និងមធ្យមផងដែរ»។

លោក ​អេង ថុង ប្រធានសហគមន៍កសិកម្ម សំបូរមានជ័យ ខេត្តកំពង់ចាម បានមានប្រសាសន៍ប្រាប់ AMS ថា ជាការកត់សម្គាល់ ក្រោយការតាំងពិព័រណ៍នៅផ្សារទំនើបបានបញ្ចប់ ឃើញមានសន្ទុះចូលរួមពីប្រជាពលរដ្ឋច្រើនជាងព្រឹត្តិការណ៍ផ្សព្វផ្សាយមុនៗ ហើយសហគមន៍កសិកម្ម សំបូរមានជ័យ ខេត្តកំពង់ចាម ក៏មានផលិតផលមួយចំនួនដាក់លក់នៅក្នុងផ្សារទំនើ​បដែរ។

លោក​បាន​បញ្ជាក់ថា ៖

« ការដាក់លក់ផលិតផលកសិកម្ម និងធ្វើការផ្សព្វផ្សាយតាមរយៈពិព័រណ៌នេះ ធ្វើឱ្យប្រជាពលរដ្ឋស្គាល់ពីផលិតផលខ្មែរ ធ្វើឱ្យគាត់មានចិត្តចង់ជួយខ្មែរ ដែលធ្វើឱ្យការលក់មានកំណើនឡើងជាងមុន ជំរុញឱ្យអ្នកផលិតមានទឹកចិត្ត និងព្យាយាមបង្កើនការផលិតឱ្យបានច្រើនដើម្បីឆ្លើយតបទៅនឹងតម្រូវការទីផ្សារ»។

លោក ទួត សេងហ័ង អ្នកគ្រប់គ្រងផលិតកម្មសាកវប្បកម្មធន់ទ្រាំនឹងបម្រែបម្រួលអាកាសធាតុ នៃគម្រោងស៊ីស្មាត អង្គការ អាយ ឌី អ៊ី IDE បានកត់សម្គាល់ថា ការតាំងពិព័រណ៍កសិផលខ្មែរផ្ទាល់ គឺជាការជួយផ្សព្វផ្សាយឲ្យអ្នកប្រើប្រាស់បានដឹង និងស្គាល់ផលិតផលខ្មែរកាន់តែច្រើន។

លោក ទួត សេងហ័ង បានបញ្ជាក់ថា៖

« ខ្ញុំគិតថាជាផលប្រយោជន៍សំខាន់ទីមួយ អ្នកបង្កើតកម្មវិធីនេះ អាចឱ្យអ្នកផលិតជួបផ្ទាល់ជាមួយអ្នកប្រើប្រាស់។ ពោលបង្កើតកម្មវិធីនេះអាចឱ្យអ្នកដាំ ឬអ្នកផលិត បង្ហាញផលិតផល មានន័យថាអ្នកប្រើប្រាស់ គាត់ជួបផ្ទាល់ជាមួយអ្នកដាំ ព្រោះថាស្រុកយើងមិនទាន់មានទំនុកចិត្តចំពោះការដាំរបស់អ្នកស្រុកជាកសិករនៅឡើយ»។

លោកបានបន្តថា សម្រាប់អ្នកផលិតអាចដឹងបានច្បាស់ពីទីផ្សាររួម និងការភ្ជាប់ទីផ្សារ​ ខណៈដែលភាគច្រើននៃអ្នកដាំមានផលិតផល ឬកសិផលថ្មី ប៉ុន្តែមិនដឹងយកទៅលក់នៅទីណា ប៉ុន្តែនៅពេលមានពិធីពិព័រណ៍ អ្នកផលិត ឬជាអ្នកដាំ អាចផ្សារភ្ជាប់ទៅកាន់ទីផ្សារបាន។

សូមជម្រាបថា ស្របនឹងភាពជោគជ័យនៃពិព័រណ៍នេះ សហគ្រិនខ្មែរ និងផ្សារទំនើបអ៊ីអន មានគម្រោងបង្កើនចំនួនអ្នកចូលរួម រួមជាមួយនឹងការផ្តោតជាពិសេសលើការផ្សព្វផ្សាយផលិតផលជាតិទៅកាន់សាធារណៈជនឱ្យកាន់តែទូលំទូលាយ ស្របក្រោមពាក្យស្លោក “គាំទ្រផលិតផលខ្មែរ” និង “ថែសេដ្ឋកិច្ចជាតិ” ហើយចំពោះ ព្រឹត្តិការណ៍បន្ទាប់នឹងត្រូវរៀបចំឡើងនៅអំឡុងខែធ្នូ ឆ្នាំ២០​២៥ ខាងមុខនេះ៕