ភ្នំពេញ ៖ ថ្មីៗនេះ ករណី«ផ្ទុះដង្កូវហ្វូង» តាមមូលដ្ឋាននានានៅទូទាំងប្រទេស ដែលបានបំផ្លាញផលដំណាំ​ រួមមាន ស្រូវ​ ពោត ដំឡូង និងបន្លែផ្សេងទៀត បើទោះបីជាមាន ឬមិនទាន់មានករណីរីករាលដាលធ្ងន់ធ្ងរក៏ដោយ ក៏គេមិនអាចធ្វេសប្រហែសបានឡើយ ។ ក្នុងន័យនេះ ក្រសួងកសិកម្ម រុក្ខាប្រមាញ់ និងនេសាទ បានបញ្ជាក់ថា ក្នុងករណីចាំបាច់ កសិករអាចសាកសួរព័ត៌មានបន្ថែម ឬស្នើសុំអន្តរាគមន៍តាមរយៈមន្ត្រីកសិកម្មឃុំ មន្ទីរកសិកម្មខេត្ត ឬទំនាក់ទំនងដោយផ្ទាល់មក Hotline​«1289» របស់ក្រសួងកសិកម្មបាន។

ឯកឧត្តម ងិន ឆាយ ប្រតិភូរាជរដ្ឋាភិបាលកម្ពុជាទទួលបន្ទុកជាអគ្គនាយកនៃអគ្គនាយកដ្ឋានកសិកម្មបានថ្លែងឱ្យដឹងថា ការងារអន្តរាគមន៍ខាងផ្នែកបច្ចេកទេស ជាអាទិភាពចាំបាច់នៅក្នុងកាលៈទេសៈនេះ ដើម្បីស្វែងរកដំណោះស្រាយជូនពុកម៉ែបងប្អូនប្រជាកសិករនៅតាមមូលដ្ឋានដែលកំពុងជួបបញ្ហាប្រឈមពីការផ្ទុះឡើងនៃករណីដង្កូវហ្វូង។

រហូតមកដល់ពេលនេះ ក្រុមការងារមន្ត្រីជំនាញគ្រប់កម្រិតនៃក្រសួងកសិកម្មបាន និងកំពុងចុះពិនិត្យ ផ្សព្វផ្សាយ នៅគ្រប់ខេត្តក្រុងតាមមូលដ្ឋានរួចជាស្រេចហើយ និងអន្តរាគមន៍ករណីផ្ទុះដង្កូវហ្វូងនេះ និងបានអំពាវនាវដល់បងប្អូនប្រជាកសិករបន្តបង្កើនការប្រុងប្រយ័ត្នឱ្យបានខ្ពស់ តាមដានត្រួតពិនិត្យមើលដំណាំស្រែចម្ការរបស់ខ្លួនជាប្រចាំ ដើម្បីចាត់វិធានការឱ្យបានទាន់ពេលវេលា ជៀសវាងនូវការខាតបង់ធ្ងន់ធ្ងរមកលើផលដំណាំរបស់ខ្លួន។

ឯកឧត្តម ងិន ឆាយ បានលើកឡើងថា តាមរយៈការសិក្សាពីដំណាក់កាលវិវត្តន៍របស់សត្វដង្កូវហ្វូង និងការវាយតម្លៃពីស្ថានភាពនៃ«ករណីផ្ទុះដង្កូវហ្វូង»វិធានការគីមីទើបមានប្រសិទ្ធភាពខ្ពស់ក្នុងកាលៈទេសៈនេះ ដោយសារដង្កូវភាគច្រើនបានរីករាលដាលច្រើនដំណាក់កាលរួចទៅហើយ។ បានន័យថា ត្រូវប្រើថ្នាំបាញ់សម្លាប់ បើឃើញវត្តមានដង្កូវហ្វូងនេះដោយមិនត្រូវបង្អង់រង់ចាំឡើយ ។

ឯកឧត្តម អគ្គនាយកនៃអគ្គនាយកដ្ឋានកសិកម្ម បានគូសបញ្ជាក់ថា ៖

«ការបាញ់ថ្នាំ យើងត្រូវណែនាំកសិករដោយគិតទៅលើទិដ្ឋភាពបច្ចេកទេស និងសុវត្ថិភាព ។ ពោលគឺទី១-ទិដ្ឋភាពបច្ចេកទេស ​គឺជ្រើសរើសថ្នាំណាដែលកម្រិតជាតិពុលទាប មិនសូវប៉ះពាល់ដល់សុខភាព និងមិនប៉ះពាល់ខ្លាំងទៅដល់ប្រព័ន្ធអេកូឡូស៊ីចម្ការដំណាំ។ ទី២- ការជ្រើសរើសប្រភេទថ្នាំសម្លាប់ដង្កូវ ត្រូវតែតម្លៃសមរម្យ ។ ទី៣-ណែនាំ បងប្អូនកសិករអំពីសុវត្ថិភាពអ្នកប្រើប្រាស់ ក្រោយការបាញ់ថ្នាំត្រូវដាក់ស្លាកសញ្ញាត្រឹមត្រូវ​ដោយមិនត្រូវឱ្យសត្វ មនុស្សចូលទៅប៉ះពាល់ដើម្បីធានាពីសុវត្ថិភាព»។

ឯកឧត្តម ឃឹម ហ្វីណង់ អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា ករណីផ្ទុះដង្កូវហ្វូង បានរីករាលដាលដល់១២ខេត្តហើយរហូតមកដល់ពេលនេះ! តាមការប៉ាន់ស្មានបឋម ផលប៉ះពាល់ស្ថិតក្នុងរង្វង់១-២% នៃដំណាំកំពុងដាំដុះភាគច្រើនទៅលើដំណាំស្រូវ និងដំឡូងមី តែតួលេខនេះអាចនឹងកើនឡើងបន្តទៀតនាពេលខាងមុខ។

ឯកឧត្តម ឃឹម ហ្វីណង់ បានលើកឡើងថា សូមរៀនសង្កេត និងប្រុងប្រយ័ត្ន «ពងមេអំបៅដង្កូវហ្វូង» ជាពិសេសចំពោះមេអំបៅដង្កូវហ្វូងដែលជាប្រភេទមេអំបៅរាត្រីចរ ច្រើនធ្វើដំណើរនៅពេលយប់។ ពងរបស់វាមានពណ៌សក្នុងដំណាកកាលដំបូង និងប្រែទៅជាពណ៌លឿងនៅពេលជិតញាស់។ មេអំបៅប្រភេទនេះពងជាកញ្ចុំៗ មានចំនួនពី ១០០ ទៅ ២០០ពង នៅលើផ្ទៃស្លឹក ដោយមានរោមសំឡីពាសការពារពីលើ។

លោក ឆេង ថុង ប្រធានក្រុមប្រឹក្សាសហគមន៍សំបូរមានជ័យបានឱ្យដឹងថា វិធានការកម្ចាត់ដង្កូវហ្វូងដែលជាវិធានការសាមញ្ញ គឺការព្រលែងទាចូលទៅក្នុងស្រែ ដើម្បីឱ្យហ្វូងទាទាំងនោះស៊ីដង្កូវដែលនៅក្នុងស្រែ។ ការកម្ចាត់មួយបែបទៀតគឺបង្ហូរទឹកចូលទៅក្នុងស្រែឱ្យលិចសន្ទូង ឬសំណាបរួចបង្ហូរទឹកចេញវិញ ហើយយកស្បៃមុង ឬថ្នងដងត្រី​ ត្រងយកដង្កូវហ្វូងកម្ទេចចោល។

លោក ឆេង ថុង បានបញ្ជាក់ថា ​ដង្កូវហ្វូងនេះកើតមកពីមេអំបៅ ដែលមកកត្តាបម្រែបម្រួលអាកាសធាតុ ហើយសម្រាប់សហគមន៍របស់លោក ដង្កូវហ្វូងបានយាយីលើដំណាំស្រូវ និងដំឡូងមី ។

គួរកត់សម្គាល់ថា បច្ចុប្បន្ន ក្រសួងកសិកម្ម រុក្ខាប្រមាញ់ និងនេសាទ បាន និងកំពុងបញ្ចូនមន្ត្រីជំនាញជាបន្ទាន់ទាំងកម្រិតក្រសួង កម្រិតមន្ទីរ និងកម្រិតឃុំ ដើម្បីចុះតាមដានវាយតម្លៃពីការរីករាលដាល ដោយបង្ហាញការជឿជាក់ថា ជាទូទៅ ប្រសិនបើយើងទាំងអស់គ្នាមានការចូលរួមយ៉ាងសកម្មក្នុងការប្រយុទ្ធប្រឆាំងនឹងការរាតត្បាតរបស់ដង្កូវហ្វូងដូចពេលបច្ចុប្បន្ននេះ ការបំផ្លាញស្ថិតក្នុងកម្រិតមួយដែលអាចស្តារឡើងមកវិញបាននៅឡើយ ព្រោះមិនទាន់មានការខូចខាតធ្ងន់ធ្ងរនោះទេ។

ក្រសួងកសិកម្ម បានបញ្ជាក់ថា ស្ថានភាពពេលនេះស្ថិតនៅក្នុងដំណាក់កាលអាចគ្រប់គ្រងបាននៅឡើយ ដោយហេតុថាមានកិច្ចសហការពីសំណាក់បងប្អូនប្រជាកសិករជាមួយនឹងមន្ត្រីជំនាញដែលពាក់ព័ន្ធទាន់ពេលវេលា។ អ្នកជំនាញរំពឹងទុកថា នៅពេលដែលមានភ្លៀងធ្លាក់មក ដង្កូវហ្វូងទាំងនេះនឹងស្លាប់ទៅវិញ ហើយបញ្ហារីករាលដាលនឹងត្រូវបញ្ចប់។ ទោះជាយ៉ាងណា សូមបងប្អូនប្រជាកសិករបន្តបង្កើនការប្រុងប្រយ័ត្នខ្ពស់ តាមដានត្រួតពិនិត្យមើលដំណាំស្រែចម្ការរបស់ខ្លួនជាប្រចាំ និងឱ្យបានទៀងទាត់ និងចាត់វិធានការឱ្យបានទាន់ពេលវេលា ជៀសវាងនូវការខាតបង់ធ្ងន់ធ្ងរមកលើផលដំណាំរបស់ខ្លួន៕