ខេត្តកំពត ៖ សហគមន៍តំបន់ការពារធម្មជាតិអន្លង់ព្រីង គឺជាសហគមន៍ដែលមានអំណោយផលពីធម្មជាតិច្រើន ហើយដែលអំណោយផលទាំងនោះបានជំរុញឱ្យតំបន់នេះមានសក្កានុពលទេសចរណ៍ដ៏សម្បូរបែប ស្ថិតនៅក្នុងស្រុកកំពង់ត្រាច ខេត្តកំពត បានបង្កើតឡើងកាលពីឆ្នាំ ២០១៦។ ក្នុងន័យទេសចរណ៍ សហគមន៍នេះត្រូវបានគេស្គាល់ថាជាតំបន់មើលសត្វគ្រៀលដ៏ពេញនិយមមួយ ប៉ុន្តែមែនទែនទៅនៅមានសក្កានុពលជាច្រើនទៀត ដែលអ្នកទេសចរមិនទាន់បានស្គាល់។
ជិះគោយន្ដតាមផ្លូវក្រាលគ្រួសក្រហមទៅបង់សំណាញ់ ឡើងភ្នំមើលថ្ងៃលិច ដកព្រលិត ទៅមើលប្រជាសហគមន៍ដកចចូត ទៅហូបនំបញ្ចុកដែលធ្វើនៅក្នុងភូមិផ្ទាល់ ទិញផលិតផលដែលធ្វើពីចចូត…សុទ្ធតែជាសកម្មភាពកម្សាន្ដប្លែកអារម្មណ៍ ដែលតំបន់ខាងលើមានផ្ដល់ជូនឱ្យទេសចរ។ ដោយឡែក ការត្បាញចចូត ការធ្វើនំបញ្ចុក និងការបិទស្រា គឺជាមុខរបរប្រពៃណីដែលសហគមន៍ បានធ្វើយូរមកហើយ និងដែលមកទល់ពេលនេះពួកគេក៏នៅតែបន្តធ្វើដោយសារតែមានទេសចរជួយគាំទ្រ។
លោក សូត ឡាន់ ជាប្រធានក្រុមទេសចរណ៍នៅក្នុងសហគមន៍អន្លង់ព្រីងបានរៀបរាប់ថា សហគមន៍របស់លោកមានសេវាកម្មជាច្រើនសម្រាប់ទទួលភ្ញៀវទេសចរ ដែលសេវាកម្មទាំងនោះមាន លក្ខណៈប្លែក និងជាបទពិសោធន៍ថ្មីសម្រាប់អ្នកទេសចរទាំងក្នុង និងក្រៅស្រុកអាចទៅសាកបាន។
លោក សូត ឡាន់ បានមានប្រសាសន៍ថា៖
“សហគមន៍យើងមានសេវាកម្មម្ហូបអាហារ ផ្ទះស្នាក់បែប សហគមន៍ ទស្សនាការធ្វើនំបញ្ចុក ទស្សនាការបិទស្រា ការត្បាញចចូត ទៅមើលសត្វក្រៀល និងចូលទៅរូងភ្នំជាដើម”
ប្រធានក្រុមទេសចរណ៍របស់សហគមន៍នេះបានឱ្យដឹងថា អ្វីដែលមាននៅក្នុងសហគមន៍លោកសុទ្ធសឹងតែជាសកម្មភាពដែលប្រជាជនក្នុងតំបន់ បានធ្វើតាំងពីដូនតាមក ដែលបច្ចុប្បន្ននេះគេមិនងាយនឹងបានឃើញឡើយ។ លោកបន្ថែមថា មិនត្រឹមតែទៅទស្សនា អ្នកទេសចរថែមទាំងអាចរៀនសាកធ្វើ និងរៀនស្វែងយល់ពីប្រជាជនផ្ទាល់តែម្ដង។
លោក សូត ឡាន់ បានគូសបញ្ជាក់ដែរថា សកម្មភាពទាំងនេះវាបានក្លាយទៅជាអត្តសញ្ញាណរបស់សហគមន៍ទៅហើយ ដូច្នេះលោកសំណូមពរឱ្យភ្ញៀវទេសចរបន្តចូលរួមគាំទ្រតាមរយៈការចូលទៅទស្សនាសហគមន៍របស់លោកឱ្យបានកុះករ ដើម្បីជាចំណែកមួយក្នុងការរក្សាទុកនូវលក្ខណៈពិសេសរបស់តំបន់អន្លង់ព្រីងកុំឱ្យបាត់បង់៕