ភ្នំពេញ ៖ ក្រសួងសាធារណការ និងដឹកជញ្ជូន បានបង្ហាញរបាយការណ៍ថា មកទល់ពេលនេះ យានយន្តអគ្គិសនីដែលបានចុះបញ្ជីផ្លូវការដោយក្រសួងសាធារណការ និងដឹកជញ្ជូន មានចំនួនសរុប ២ ៩៦៨គ្រឿង ដោយក្នុងនោះរួមមាន រថយន្តអគ្គិសនីចំនួន ១ ៦១៤គ្រឿង (​E​V​s) ទោចក្រយានយន្ត(ម៉ូតូអគ្គិសនី)ចំនួន ៩១៤គ្រឿង និងត្រីចក្រយានយន្ត(ម៉ូតូកង់បីអគ្គិសនី) ចំនួន ៤៤០គ្រឿង​ (គិត​ត្រឹម​ខែ​មិថុនា​ ​ឆ្នាំ​២​០​២​៤)​ ។

ការចុះបញ្ជីយានយន្តអគ្គិសនីដែលជានិន្នាការថ្មីមានការកើនឡើងជារៀងរាល់ថ្ងៃ ដោយប្រជាពលរដ្ឋមានសុទិដ្ឋិនិយមច្រើន និងបង្ហាញការចាប់អារម្មណ៍ខ្ពស់ចំពោះការប្រើប្រាស់យានយន្តអគ្គិសនី ។ ម៉្យាងទៀតការប្រើប្រាស់យានយន្តអគ្គិសនីត្រូវបានគេមើលឃើញថា ចំណាយប្រចាំថ្ងៃតិច មានផាសុកភាព ហើយកម្រិតបំពុលក្នុងបរិយាកាសទាបបើប្រៀបធៀបជាមួយយានយន្តប្រើប្រាស់ប្រេងឥន្ធនៈចំហេះដែលជានិន្នាការចាស់។ លើសពីនេះ ក្រុមហ៊ុនយានយន្តខ្លះបានអះអាងពីកម្រិតនៃការបំភាយឧស្ម័នពុលកម្រិតសូន្យថែមទៀត។ ទន្ទឹមនឹងនេះដែរ រាជរដ្ឋាភិបាលតាមរយៈក្រសួងសាធារណការ និងដឹកជញ្ជូន និងក្រសួងស្ថាប័នពាក់ព័ន្ធនានា បានប្រឹងប្រែងធ្វើឱ្យប្រសើរឡើងចំនួនស្ថានីយសាកអាគុយកាន់តែច្រើន និងលក្ខខណ្ឌអំណោយផលផ្សេងៗទៀតកាន់តែប្រសើរផងដែរ។

យោងតាមតួលេខនៃការចុះបញ្ជីយានយន្តអគ្គិសនី គិតត្រឹមរយៈពេល៦ខែ ឆ្នាំ២០២៤ ​ម៉ាក​រថយន្ត​អគ្គិសនី​(​E​V​) ​ដែល​មាន​ប្រជាប្រិយភាព​បំផុត​ចំនួន​ ៣ ក្នុង​ប្រទេស​កម្ពុជា​ រួមមាន​ដូចជា យានយន្តរបស់ក្រុមហ៊ុន BYD ឈរលើកំពូលតារាង ដែលមានចំនួន ៦៥៨ គ្រឿង យានយន្តក្រុមហ៊ុន ម៉ាក TOYOTA ចំនួន ២៦១គ្រឿង និង​រថយន្ត​ម៉ាក TESLA ចំនួន ១៨៦គ្រឿង។

តាមសេចក្តីប្រកាស បច្ចុប្បន្ន ស្ថានីយសាកថ្មរថយន្តអគ្គិសនីនៅទូទាំងប្រទេសកម្ពុជាមាន ១៨កន្លែង។​ ដើម្បីសម្រេចបាននូវគោលដៅនេះ កម្ពុជាបានបន្ថយពន្ធនាំចូលលើរថយន្តអគ្គិសនីចាប់តាំងពីឆ្នាំ២០២១ មកនៅត្រឹមប្រហែល ៥០ភាគរយ ទាបជាងពន្ធលើរថយន្តម៉ាស៊ីនចំហេះធម្មតា។

អ្នកគ្រប់គ្រងផ្នែកលក់នៅក្រុមហ៊ុន Mingyang Guoji Co., Ltd. លោកស្រី មឿង សុខម៉េង ដែលជាភ្នាក់ងាររបស់ក្រុមហ៊ុនចិន Hongqi នៅកម្ពុជា បានកត់សម្គាល់ថា ចាប់តាំងពីរដ្ឋាភិបាលបានលើកទឹកចិត្តឱ្យមានការនាំចូលរថយន្តអគ្គិសនីមក សន្ទុះការចាប់អារម្មណ៍ក្នុងការប្រើប្រាស់បានកើនឡើងយ៉ាងខ្លាំង ដោយសារអ្នកប្រើប្រាស់បានដឹងពីអត្ថប្រយោជន៍នានា ដូចជា ការសន្សំសំចៃលើថ្លៃប្រេងឥន្ធនៈ និងការជួយការពារបរិស្ថាន។

លោកស្រីបានបន្ថែមថា បច្ចុប្បន្ន ក្រុមហ៊ុនបានលក់រថយន្តអគ្គិសនីជាច្រើន ទាំងរថយន្តអគ្គិសនីខ្នាតតូច និងធំ ហើយជាទូទៅ ការជួសជុលរថយន្តអគ្គិសនីមានការផ្លាស់ប្តូរគ្រឿងតិចតួចបើធៀបរថយន្តសាំង ឬម៉ាស៊ូត ដូច្នេះ តម្លៃថែទាំ និងជួសជុល គឺថោកជាងរថយន្តដែលប្រើចំហេះ៕