វៀងចន្ទន៍-ឡាវ ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានអញ្ជើញចូលរួមកិច្ចប្រជុំកំពូលអាស៊ានលើកទី៤៤ និង៤៥ និងកិច្ចប្រជុំកំពូលពាក់ព័ន្ធនៅរដ្ឋធានីវៀងចន្ទន៍ ប្រទេសឡាវ ដោយកិច្ចប្រជុំកំពូលនេះបានផ្តោតលើប្រធានបទសំខាន់ចំនួន៤ និងមានការចូលរួមពីប្រមុខរដ្ឋ ប្រមុខរដ្ឋាភិបាលអាស៊ាន ដៃគូអាស៊ាន ធុរជនមកពីអាស៊ាន និងទូទាំងពិភពលោក ។

 ក្នុងឱកាសអមដំណើរសម្តេចធិបតី ហ៊ុន ម៉ាណែត ចូលរួមកិច្ចប្រជុំកំពូលអាស៊ានលើកទី៤៤ និង៤៥ និងកិច្ចប្រជុំកំពូលពាក់ព័ន្ធនៅរដ្ឋធានីវៀងចន្ទន៍ អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា និងជាប្រធានក្រុមប្រឹក្សាពិគ្រោះយោបល់ធុរកិច្ចអាស៊ានសម្រាប់កម្ពុជា រួមនឹងគណៈប្រតិភូសភាពាណិជ្ជកម្មកម្ពុជា ក៏មានវត្តមានផងដែរ

កិច្ចប្រជុំកំពូលអាស៊ាននៅឆ្នាំនេះ ធ្វើឡើងក្រោមមូលបទ «អាស៊ាន៖ ការពង្រឹងការតភ្ជាប់ និងភាពធន់» នឹងផ្តោត​ទៅ​លើការជំរុញបន្ថែមទៀតនូវវឌ្ឍនភាពនៃការកសាងសហគមន៍​អាស៊ាន ឆ្ពោះទៅកាន់ការសម្រេចបានចក្ខុ​វិស័យសហគមន៍អាស៊ានឆ្នាំ២០២៥ និងការលើកកម្ពស់​ទំនាក់ទំនង​ជាមួយដៃគូខាងក្រៅរបស់អាស៊ាន តាមរយៈយន្តការនានាដែលដឹកនាំដោយអាស៊ាន ក្នុងគោលដៅលើកកម្ពស់​ការតភ្ជាប់ និងភាពធន់នៅក្នុងតំបន់ និងក្រៅតំបន់ ក៏ដូចជាដោះស្រាយបញ្ហាប្រឈមបច្ចុប្បន្ន និងដែលកំពុង​កើតមានប្រកបដោយប្រសិទ្ធភាព។

កិច្ចប្រជុំកំពូលធុរកិច្ច និងវិនិយោគអាស៊ានឆ្នាំ២០២៤ ក៏បានផ្តោតលើប្រធានបទសំខាន់ៗចំនួន៤ រួមមាន៖ ១- គោលជំ​ហរ​របស់អាស៊ាន នៅក្នុងភូមិសាស្ត្រនយោបាយសាកល ២- ការលើកកម្ពស់តំណភ្ជាប់សេដ្ឋកិច្ច និងភាពធន់នឹងវិបត្តិ ៣- តួនាទីរបស់អាស៊ាន ក្នុងសេដ្ឋកិច្ចសាកល និង៤- ទិដ្ឋភាពអនាគតអាស៊ាន នៅក្នុងតំបន់ឥណ្ឌូប៉ាស៊ីហ្វិក។

សូមជម្រាបថា ចាប់តាំងពីថ្ងៃដំបូង អាស៊ានបានយកសេដ្ឋកិច្ច-ពាណិជ្ជកម្មជាមូលដ្ឋានគ្រឹះ និងជាកម្លាំងជំរុញកិច្ចសហប្រតិបត្តិការក្នុងតំបន់។ ការអភិវឌ្ឍទំនាក់ទំនងសេដ្ឋកិច្ច-ពាណិជ្ជកម្ម ត្រូវបានសម្គាល់ដោយការបង្កើតតំបន់ពាណិជ្ជកម្មសេរីអាស៊ាន (AFTA) ក្នុងឆ្នាំ១៩៩២ និងការខិតខំប្រឹងប្រែងដើម្បីធ្វើសេរីភាវូបនីយកម្ម នូវរំហូរពា​ណិ​ជ្ជកម្មទំនិញ សេវាកម្ម និងការវិនិយោគ។

ទន្ទឹមនឹងការភ្ជាប់ទំនាក់ទំនងក្នុងតំបន់ អាស៊ានបានពង្រីកទំនាក់ទំនងរបស់ខ្លួនជាមួយខាងក្រៅ ដោយបានធ្វើឱ្យសហគមន៍សេដ្ឋកិច្ចអាស៊ានក្លាយទៅជាចំណុចប្រសព្វនៃកិច្ចព្រមព្រៀង សហប្រតិបត្តិការពហុភាគី។ ជាមួយចំនួនប្រជាជនជិត៧០០ លាននាក់ និងផលិតផលក្នុងស្រុកសរុប (GDP) ជិត៤ទ្រីលានដុល្លារ អាស៊ានគឺជាតំបន់សេដ្ឋកិច្ចមួយដ៏ធំ និងរីកចម្រើន។

នៅក្នុងឱកាសនេះផងដែរ សម្តេចធិបតី​ ហ៊ុន ម៉ា​ណែ​ត និង​ឯកឧត្តមបណ្ឌិត Sonexay Siphandone នាយករដ្ឋមន្ត្រីនៃសាធារណៈរដ្ឋប្រជាធិបតេយ្យប្រជាមានិតឡាវ និងជាប្រធានអាស៊ានសម្រាប់ឆ្នាំ២០២៤ បានជួបពិភាក្សាទ្វេភាគីនៅក្រៅ​កិច្ចប្រជុំកំពូល ដោយភាគីទាំងពីរបានសម្តែងការពេញចិត្តចំពោះចំណងមិត្តភាពរឹងមាំ និងកិច្ចសហប្រតិបត្តិការល្អ ហើយបានឯកភាពរួមគ្នាជំរុញបន្ថែមទៀតនូវការផ្លាស់ប្តូរទស្សនកិច្ចជាទៀងទាត់នៅគ្រប់កម្រិតក៏ដូចជាអន្តរកម្មរវាងថ្នាក់ដឹកនាំ ក្រសួង ស្ថាប័ន និងអាជ្ញាធរមូលដ្ឋាននៃប្រទេសទាំងពីរ ដើម្បីជំរុញកិច្ចសហប្រតិបត្តិការលើវិស័យផ្សេងៗ។

ដោយឡែក នៅលើវិស័យពាណិជ្ជកម្ម និងទេសចរណ៍ ភាគីទាំងពីរបានពិភាក្សាអំពីវិធីបង្កើនពាណិជ្ជកម្មទ្វេភាគីឱ្យមានសក្ដានុពលពេញលេញ ជាពិសេសតាមរយៈការធ្វើឱ្យមានកិច្ចប្រជុំគណៈកម្មាធិការពាណិជ្ជកម្មចម្រុះឡើងវិញ។ ក្រៅពីនេះ ភាគីទាំងពីរក៏បានព្រមព្រៀងគ្នាក្នុងការពង្រឹងការតភ្ជាប់ហេដ្ឋារចនាសម្ព័ន្ធព្រំដែន ដើម្បីសម្រួលដល់ការធ្វើពាណិជ្ជកម្ម និងជំរុញរំហូរភ្ញៀវទេសចរផងដែរ។