សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ កំណើនផ្សារទំនើបនៅរាជធានីភ្នំពេញក្នុងរយៈពេលប៉ុន្មានឆ្នាំចុងក្រោយនេះ មានការអភិវឌ្ឍន៍ច្រើនគួរឱ្យកត់សម្គាល់រាប់ទាំងប្រភេទផ្សារទំនើបធំៗមកពីបរទេស និងផ្សារទំនើបខ្នាតតូចដែលវិនិយោគដោយអ្នកនៅក្នុងស្រុក ខណៈផ្សារទំនើបមួយចំនួនបានផ្អាកសកម្មភាព និងខ្លះទៀតនៅដំណើរការដែរ តែមិនសូវមានភ្ញៀវចេញចូលច្រើន ។ ក្នុងរូបភាពបែបនេះ អ្នកជំនាញអចលនទ្រព្យបានផ្ដល់ជាទស្សនទានថា មុនសម្រេចទម្លាក់ទុនវិនិយោគនៅក្នុងវិស័យមួយនេះ អ្នកអភិវឌ្ឍន៍គួរសិក្សាពីតម្រូវការទីផ្សារឱ្យបានច្បាស់លាស់ ជៀសវាងទទួលរងនូវការខាតបង់។
លោក ឡាត់ ច័ន្ទដារា អ្នកគ្រប់គ្រងជាន់ខ្ពស់នៃក្រុមហ៊ុន CBRE Cambodia បានមានប្រសាសន៍ថា ក្នុងពេលបច្ចុប្បន្ននេះ នៅក្នុងរាជធានីភ្នំពេញ ទីផ្សារ ផ្សារទំនើបនៅមានឱកាស ប៉ុន្តែក្នុងកាលៈទេសៈនេះ អ្នកអភិវឌ្ឍន៍គួរមានការសិក្សាឱ្យបានច្បាស់លាស់ និងល្អិតល្អន់ជាងមុនជាមួយអ្នកជំនាញមុននឹងចាប់ផ្ដើមវិនិយោគ ឬក៏អភិវឌ្ឍន៍ ហើយអ្នកអភិវឌ្ឍន៍ខ្លួនឯងក៏គួរតែដឹងពីសក្ដានុពលទីតាំង ចំនួនពលរដ្ឋដែលនឹងអាចទាក់ទាញចូលផ្សារទំនើបរបស់ខ្លួន ។
លោក ច័ន្ទដារា បានមានប្រសាសន៍ថា ៖
«ក្នុងពេលបច្ចុប្បន្ននេះ អ្នកអភិវឌ្ឍន៍អចលនទ្រព្យ ជាពិសេសអ្នកអភិវឌ្ឍន៍លំនៅឋាន បានបង្វែរទុនរបស់ខ្លួនទៅវិនិយោគ និងអភិវឌ្ឍន៍លើផ្សារទំនើបសហគមន៍ ( Community Mall ) ដែលជាប្រភេទផ្សារទំនើបចំហរ ( Outdoor ) ។ ផ្សារទំនើបបែបនេះ កំពុងមានការបើកដំណើរការ និងវិនិយោគជាបន្តបន្ទាប់ ហើយអាចស្រូបទាញអតិថិជនពីផ្សារទំនើប ( Super Market )បានច្រើន ដូច្នេះអ្នកអភិវឌ្ឍន៍ ផ្សារទំនើប Super Market គួរតែគិតគូរឱ្យបានល្អិតល្អមុននឹងវិនិយោគ»។
លោកអ្នកឧកញ៉ា ពុង ឃាវសែ អ្នកជំនួញអចលនទ្រព្យ និងជាអ្នកអភិវឌ្ឍន៍ផ្សារទំនើបដំបូងគេនៅកម្ពុជាបានថ្លែងកាលពីពេលកន្លងទៅថា មិនថាតែផ្សារទំនើបក្នុងស្រុក ឬផ្សារប្រពៃណីក្នុងរាជធានីភ្នំពេញនោះទេ បើសិនជាមិនមានការកែប្រែ ឬនៅតែធ្វើអាជីវកម្មតាមទម្លាប់ដូចមុននោះ នឹងមិនអាចទាក់ទាញភ្ញៀវបានទេ ។ ពេលនោះដែរ ផ្សារទំនើបដែលមកពីខាងក្រៅប្រទេសថ្មីៗ នឹងស្រូបទាញយកភ្ញៀវពីផ្សារទំនើបក្នុងស្រុក និងផ្សារប្រពៃណី។
អ្នកស្រី អាន សុធីតា នាយិកាប្រតិបត្តិក្រុមហ៊ុន PropNex Cambodia បានបញ្ជាក់ថា អតិថិជនគោលដៅរបស់ផ្សារទំនើប និងផ្សារប្រពៃណីមិនដូចគ្នា ។ អ្នកចូលផ្សារទំនើបមានគោលដៅផ្សេង ចំណែកអ្នកចូលផ្សារប្រពៃណី ដូចជាផ្សារទួលទំពួង ផ្សារបឹងកេងកង ផ្សារអូរឬស្សី និងអូរឡាំពិកជាដើមនោះ គឺមានគោលដៅផ្សេង ហើយផ្សារទំាំងនេះនៅតែមានសកម្មភាព ។
ទោះជាយ៉ាងណាក្ដី ការអភិវឌ្ឍផ្សារទំនើប ( Super Market ) វាប្រាកដណាស់នឹងអាចទាញយកអតិថិជនជាងផ្សារប្រពៃណី ប៉ុន្តែវាក៏មិនប៉ះពាល់ដល់ផ្សារប្រពៃណីធ្ងន់ធ្ងរនោះដែរ ។ ដូច្នេះ សរុបសេចក្ដីមក ការអភិវឌ្ឍផ្សារទំនើប Super Market ពិតជាបានទាញយកអតិថិជនពីផ្សារប្រពៃណី ហើយការអភិវឌ្ឍផ្សារទំនើបសហគមន៍ ( Community Mall ) ក៏បានស្រូបទាញយកអតិថិជនពីផ្សារទំនើប Super Market ដែរ ។ ទោះជាយ៉ាងណា វត្តមាននៃផ្សារទំនើបគ្រប់កម្រិត បានផ្តល់ជម្រើសយ៉ាងច្រើនសម្រាប់អតិថិជន៕
Account
Security
Favourite Content