ល្ពៅ ជាបន្លែម្យ៉ាងដែលមានផ្ទុកនូវជីវជាតិល្អៗសម្រាប់ទ្រទ្រង់ និងបំប៉នសុខភាពរាងកាយ ដែលគេអាចយកមកធ្វើម្ហូបអាហារក៏បាន ធ្វើជាបង្អែមក៏បាន ខណៈដែលបច្ចុប្បន្ននេះមានសិប្បកម្មមួយកន្លែងបានយកផ្លែល្ពៅនេះមកច្នៃជាបង្អែមស្ងួត ឬជាប្រភេទនំស្រួយៗ មានក្លិនឈ្ងុយ រសជាតិឆ្ងាញ់ និងមិនប៉ះពាល់សុខភាព ជាពិសេសគឺអាចជួយដល់ជីវភាពសហគមន៍ថែមទៀតផង។

Rosseka Ratha brand ជាយីហោសប្បិកម្មផលិតនំល្ពៅស្រួយ មានទីតាំងស្ថិតនៅ ភូមិមេទឹក ស្រុកបាកាន ខេត្តពោធិ៍សាត់ ដែលបានបើកដំណើរការនៅអំឡុងឆ្នាំ២០២៣ ដោយមានផ្គត់ផ្គង់នូវប្រភេទនំស្រួយៗ ផលិតចេញពីវត្ថុធាតុដើមចម្បងគឺផ្លែល្ពៅ និងបានឆ្លងកាត់ការផលិតច្រើនដំណាក់កាលទើបអាចសម្រេចចេញជាផលិតផលថ្មីមួយដែលមានទាំងសោភ័ណភាព រសជាតិ និងគុណភាពសម្រាប់ផ្តល់ជូនអ្នកទទួលទានដែលជាអតិថិជនចុងក្រោយ។ 

លោក ទាវ រត្ន័កាលីន ជាម្ចាស់សិប្បកម្មកែច្នៃនំស្រួយខាងលើបានរៀបរាប់ប្រាប់ AMS Economy ឱ្យដឹងថា៖

«ដើមហេតុនៃការផលិតនំល្ពៅស្រួយនេះឡើងគឺ ទីមួយយើងចង់មាន brand name ផលិតផលមួយជារបស់ខ្លួនឯង និងតំណាងគ្រួសារ ណាមួយអាចបង្កើនចំណូលក្នុងគ្រួសារផង និងជីវភាពកសិករផង ហើយថែមទាំងអាចជួយមួយផ្នែកដល់សេដ្ឋកិច្ចជាតិតាមរយៈការផ្តល់ការងារដល់អ្នកនៅក្នុងតំបន់ ឬសហគមន៍ និងការលក់ផលិតផលទៅលើទីផ្សារ ហើយក៏អាចណែនាំផលិតផលនំក្នុងស្រុកឱ្យគេបានស្គាល់ផងដែរ»។

ម្ចាស់សិប្បកម្មរូបនេះបន្ថែមថា៖

«ផលិតផលនំល្ពៅស្រួយ គឺជាផលិតផលតំណាងឲ្យខេត្តពោធិ៍សាត់ ដែលផលិតចេញពីល្ពៅខ្មែរ ធម្មជាតិ ១០០ភាគរយ គ្មានការប្រើប្រាស់សារធាតុគីមីផ្សេងៗ រាល់គ្រប់ដំណើរការ និងត្រូវបានផលិតជាច្រើនដំណាក់កាលទើបអាចសម្រេចបានជាលទ្ធផលនេះឡើង ហើយនំល្ពៅស្រួយនេះអាចបរិភោគបានគ្រប់វ័យ ទាំងចាស់ ទាំងក្មេង ដោយមិនមានការបង្កគ្រោះថ្នាក់ដល់សុខភាពអ្វីឡើយ»។  

សម្រាប់តម្លៃនំល្ពៅស្រួយ មួយកញ្ចប់មានតម្លៃ ៤ពាន់រៀល ហើយទីផ្សារនំល្ពៅស្រួយបច្ចុប្បន្ននះហាក់មានសម្ទុះនៃការគាំទ្រច្រើនក្រោយមានការចុះផ្សព្វផ្សាយតាមរយៈការតាំងពិព័ណ៌ និងការផ្សព្វផ្សាយតាមបណ្ដាញសង្គម ដែលមានបងប្អូនកម្ម៉ង់ទិញច្រើនស្ទើរគ្រប់ខេត្តក្រុង មិនថាទុកទទួលទានផ្ទាល់ខ្លួន សម្រាប់គ្ឬួសារ ឬទិញយកទៅធ្វើជាកាដូរក្នុងពីធីរៀបអាពាហ៍ពិពាហ៍ក៏មាន។

ពាក់ព័ន្ធនឹងការផលិត ដើម្បីផលិតចេញជានំល្ពៅស្រួយនេះបានគឺមានដំណាក់ជាច្រើន ដែលផ្តើមដំបូងត្រូវយកផ្លែល្ពៅលាងសម្អាត និងចិតជាដុំតូចៗ រួចយកទៅដាក់ចំហុយឱ្យបានឆ្អិនល្អ និងទុកឲ្យត្រជាក់ល្មម រួចយកទៅលាយគ្រឿងតាមរូបមន្តរឱ្យមានរសជាតិល្មម ហើយបន្តយកវាទៅវាយក្នុងម៉ាស៊ីន រួចពូនជារាងត្រវែង។ បន្ទាប់ពីនោះ គេយកវាទៅចំហុយក្នុងឡាំងសឹងឲ្យឆ្អិន ទុកឱ្យត្រជាក់ និងដាក់ក្នុងទូទឹកកកចោលមួយយប់សិន។ បន្ទាប់ពីទុកមួយយប់ហើយ ទើបយកវាមកចិតជាចំណិតតូចៗតាមទំហំនំដែលចង់បាន ទើបយកចំណិតនំទៅសម្ងួតក្នុងម៉ាស៊ីនរយៈពេល ២-៣ ថ្ងៃបន្ថែមទៀត ។ ដំណាក់កាលបន្ទាប់ ត្រូវប្រមូលយកចំណិតនំដែលដាក់សម្ងួតក្នុងម៉ាស៊ីនទាំងនោះទៅបំពងរហូតឆ្អិនល្អ ហើយជាចុងក្រោយត្រូវសម្ងួតប្រេងចេញពីចំណិតនំ ទើបអាចវិចខ្ចប់ដាក់ថង់ជាការស្រេ​ច។

យ៉ាងណាមិញ ទម្រាំអាចឈានដល់កិច្ចដំណើរការបានដូចសព្វថ្ងៃ សិប្បកម្មនេះបានជួបប្រទះនូវផលវិបាកជាច្រើន ប៉ុន្តែស្ថិតក្រោមឆន្ទៈ និងកម្លាំងចិត្តដែលចង់កសាងកេរ្តិ៍ឈ្មោះផលិតផលខ្មែរ ម្ចាស់សិប្បកម្មមួយនេះបានជំនះ និងព្យាយាមធ្វើបន្តរហូតទទួលបានការគាំទ្រ នូងឈ្មោះផលិតនំល្ពៅស្រួយ Rosseka Ratha Brand បានដូចពេលបច្ចុប្បន្ន។ ដោយឡែ សម្រាប់គម្រោងនាពេលអនាគត លោក ទាវ រត្ន័កាលីន ក៏មានឆន្ទៈចង់បង្កើតផលិតផលខ្មែរឲ្យបានច្រើនមុខ ច្រើនរស់ជាតិបន្ថែមទៀត ក៏ដូចជាពង្រឹងសក្តានុពល រាល់ការប្រើប្រាស់ផលិតផលខ្មែរ ជាពិសេសផ្សព្វផ្សាយទៅកាន់ទីផ្សារអន្តរជាតិឲ្យពួកគាត់បានស្គាល់នូវផលិតផលខ្មែរដែលមានគុណភាពមិនចាញ់ផលិតផលរបស់ប្រទេសជិតខាងនោះឡើយ៕