ភ្នំពេញ៖ ក្នុងខែកញ្ញា ឆ្នាំ២០២៤ ក្រុមប្រឹក្សាអភិវឌ្ឍន៍កម្ពុជា(CDC)បានអនុម័តគម្រោងថ្មីចំនួន២៦គម្រោង និងគម្រោងពង្រីកផលិតកម្មចំនួន២គម្រោង ដែលមានទុនវិនិយោគសរុបប្រមាណ៤៤៣លានដុល្លារអាម៉េរិក ហើយអាចបង្កើតឱកាសការងារបានប្រមាណជិត២៥០០០កន្លែង។ ក្នុងចំណោមគម្រោងវិនិយោគសរុប មានគម្រោង៦ចង់បង្កើតតំបន់សេដ្ឋកិច្ចពិសេស និងវិនិយោគនៅក្នុងតំបន់សេដ្ឋកិច្ចពិសេសដែលមានទឹកប្រាក់ជិត៣០០លានដុល្លារអាមេរិក បង្កើតការងារប្រមាណ២ម៉ឺនកន្លែង។

យោងតាម CDC ខេត្តពោធិ៍សាត់ ទទួលបានគម្រោងវិនិយោគចំនួន២៖ ទី១៖ មានទីតាំងស្ថិតនៅភូមិសារវ័ន ឃុំស្នាអន្សា ស្រុកក្រគរ ខេត្តពោធិ៍សាត់ ក្នុងទុនវិនិយោគប្រមាណជាង៧០លានដុល្លារអាម៉េរិក និងអាចបង្កើតការងារបានចំនួន៧០៨ កន្លែង។ ទី២៖ គម្រោងវិនិយោគបង្កើតរោងចក្រផលិតដំឡើង និងបង្គំសមាសធាតុជាក់លាក់គ្រឿងម៉ាស៊ីន និង មេកានិច ដែលមានទីតាំងស្ថិតនៅក្នុងតំបន់សេដ្ឋកិច្ចពិសេសពោធិ៍សាត់ ក្នុងទុនវិនិយោគប្រមាណជាង៣៨លានដុល្លារអាម៉េរិក និងអាចបង្កើតការងារបានចំនួន ៨ ៩១៨កន្លែង។

ចំណែកខេត្តស្វាយរៀង ទទួលបានគម្រោងបង្កើតតំបន់សេដ្ឋកិច្ចពិសេស ហ្វុងហ្វូ អ៊ិនធើណេសិនណល ដែលមានទីតាំងស្ថិតនៅភូមិ ត្រពាំងផ្លុង ឃុំញរ ភូមិព្រះបាក់ក និងភូមិព្រៃសាគុំ ឃុំព្រៃធំ ស្រុកកំពង់រោទិ៍ ក្នុងទុនវិនិយោគចំនួន៥៥លានដុល្លារអាម៉េរិក និងអាចបង្កើតការងារបានចំនួន២៥១កន្លែង ខណៈដែលតំបន់សេដ្ឋកិច្ចពិសេសមេនហាតធេនទទួលបានគម្រោងវិនិយោគបង្កើតរោងចក្រកែច្នៃអាលុយមីញ៉ូម ក្នុងទុនវិនិយោគប្រមាណជាង២០លានដុល្លារអាម៉េរិក និងអាចបង្កើតការងារបានចំនួន៦៨៤កន្លែង។

តំបន់សេដ្ឋកិច្ចពិសេស សុវណ្ណភូមិ នៅខេត្តកណ្តាល ទទួលបានគម្រោងវិនិយោគបង្កើតរោងចក្រកែច្នៃផលិតផលពីទឹកដោះគោ ភេសជ្ជៈគ្រប់ប្រភេទគ្មានជាតិអាល់កុល និងអាហារគ្រប់ប្រភេទ ក្នុងទុនវិនិយោគប្រមាណជាង៣៧លានដុល្លារអាម៉េរិក និងអាចបង្កើតការងារបានចំនួន៥៨កន្លែង។

ដោយឡែក តំបន់សេដ្ឋកិច្ចពិសេសក្រុងព្រះសីហនុ ទទួលបានគម្រោងវិនិយោគបង្កើតរោងចក្រផលិតខ្សែភ្លើង ខ្សែកាប រឡូខ្សែកាបដែក និងរឡូខ្សែកាបឈើ ក្នុងទុនវិនិយោគចំនួន២៥លានដុល្លារអាម៉េរិកនិងអាចបង្កើតការងារបានចំនួន១.១៨៨កន្លែង។

ពាក់ព័ន្ធទៅនឹងការវិនិយោគបង្កើតតំបន់សេដ្ឋកិច្ចពិសេសនេះ អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា ធ្លាប់បានលើកឡើងថា នៅពេលមានការបង្កើតតំបន់សេដ្ឋកិច្ចពិសេសបានកាន់តែច្រើន សេដ្ឋកិច្ចជាតិក៏នឹងរីកចម្រើនកាន់តែខ្លាំងដូចគ្នា។ វានឹងធ្វើឱ្យមានកំណើនជីវភាពប្រជាពលរដ្ឋនៅតំបន់ជុំវិញនោះកាន់តែធូរធារ ដោយសារមានការងារធ្វើច្រើន សេដ្ឋកិច្ចមានដំណើរការ។

អ្នកឧកញ៉ាបានបន្តថា ការបង្កើតតំបន់សេដ្ឋកិច្ចពិសេសទោះក្នុងទំហំណាក៏ដោយ គឺជារឿងចំណេញលើចំណេញ ពោលគឺចំណេញទាំងក្រុមហ៊ុនវិនិយោគក្រោមការទទួលបានអនុគ្រោះលក្ខខណ្ឌ និងការលើកទឹកចិត្តពីរដ្ឋាភិបាល ចំណេញទាំងប្រជាពលរដ្ឋតាមរយៈការទទួលបានការងារធ្វើ ដែលជំរុញដល់កំណើនសេដ្ឋកិច្ចជាតិទាំងមូល។

សូមរំលឹកដែរថា តំបន់សេដ្ឋកិច្ចពិសេស គឺជាតំបន់ដែលមានទីតាំងយុទ្ធសាស្ត្រត្រៀមរួចជាស្រេចជា សម្រាប់អាជីវកម្ម និងការវិនិយោគដំណើរការជាមួយនឹងភាពងាយស្រួលនៃហេដ្ឋារចនាសម្ព័ន្ធដឹកជញ្ជូន។ ក្នុងរយៈពេលប៉ុន្មានឆ្នាំចុងក្រោយនេះ ទិន្នផលនាំចេញនៃតំបន់សេដ្ឋកិច្ចពិសេសបានកើនឡើងយ៉ាងខ្លាំង។ ជាទូទៅ តំបន់សេដ្ឋកិច្ចពិសេសមានទីតាំងស្ថិតនៅតំបន់សមស្របបំផុតដើម្បីជួយឱ្យអាជីវកម្មរបស់អ្នកវិនិយោគរីកចម្រើន និងជោគជ័យ៕