ភ្នំពេញ ៖ គម្រោងព្រែកជីកហ្វូណន-តេជោ បានក្លាយទៅជាប្រធានបទមួយក្នុងចំណោម​ប្រធានបទជាច្រើនទៀតដែលត្រូវបានលើក​មកជជែកនៅក្នុងជំនួបរវាងសម្តេចតេជោ ហ៊ុន សែន ប្រធានព្រឹទ្ធសភា និង​លោក ថងលុន ស៊ីសុលីត ប្រធា​នរដ្ឋឡាវ នៅវិមានព្រឹទ្ធសភា​កាលពីព្រឹកថ្ងៃអង្គារ ទី២៣ ខែមេសា ឆ្នាំ២០២៤នេះ ដោយគម្រោងព្រែកជីក​ហ្វូ​ណន​-​តេជោ នេះ បានទទួលការគាំទ្រដោយគ្មានការអល់ឯកពីប្រធា​នរដ្ឋឡាវ ។

សម្តេចតេជោ ហ៊ុន សែន បានបញ្ជាក់ជូនលោក ថង​លុន ស៊ីសុលីត ពីគម្រោង​ព្រែកជីកហ្វូណន-តេជោ ព្រោះមិនមាន​ប៉ះ​ពាល់ដល់បរិស្ថាន ឬរំហូរទឹ​កទន្លេ​មេ​គង្គ​នោះឡើយ។

គម្រោងព្រែកជីកហ្វូណន-តេជោ គឺជាគម្រោងតភ្ជាប់ផ្លូវទឹករវាងទន្លេទៅកាន់​សមុទ្រ​​របស់កម្ពុជា ដោយ​ឆ្លង​កាត់ខេត្តកណ្តាល តាកែវ កំពត និងកែប មានប្រវែង​ប្រមាណ ១៨០គីឡូម៉ែត្រ។ គម្រោងនេះគ្រោងចាយ​ទុន​ប្រមាណ ១,៧០០លាន​ដុល្លារ​អាមេរិក ហើយត្រូវបានសិក្សាគម្រោងយ៉ាងល្អិតល្អន់រួចហើយ។

សម្តេចតេជោ ហ៊ុន សែន បានបញ្ជាក់ថា ៖ គម្រោងព្រែកជីកនេះ ដើរតួនាទី​សំខាន់​ណាស់សម្រាប់ការតភ្ជាប់រវាងទន្លេទៅកាន់​សមុទ្រ​កម្ពុជា។

បន្ទាប់ពីបានស្តាប់ការពន្យល់ពីលក្ខណៈបច្ចេកទេសពីសម្តេច​តេ​ជោ​ហើយនោះ ក្នុងនាមជាប្រធានសមាជិកគណៈកម្មការទន្លេមេគង្គ​ លោក ថងលុន ស៊ី​​សូលីត ប្រធានរដ្ឋឡាវ បានប្រកាសគាំទ្រចំពោះគម្រោងព្រែកជីហ្វូណន-តេជោ​ ដោយគ្មានការអល់ឯកនោះឡើយ។

ការគាំទ្ររបស់ឡាវ គឺជាផ្នែកមួយដ៏សំខាន់ ព្រោះថាឡាវ ជាប្រទេសសមាជិក​គណៈ​កម្មការទន្លេមេគង្គ បើសិនទាមទារឱ្យមានការសម្រេចណាមួយពីបណ្តា​ប្រទេស​​តាមដងទន្លេមេគង្គ។

សម្តេចតេជោ ហ៊ុន សែន ធ្លាប់បានបញ្ជាក់ថា ព្រែកជីកហ្វូណន-តេជោ គឺជាផលប្រយោជន៍​សេដ្ឋ​​​កិច្ចសង្គមសុទ្ធសាធ ដែលជួយឱ្យកម្ពជាមួយផ្នែកនៅទិសនិរតីមានផ្លូវទឹកដឹកជញ្ជូនទៅកាន់​សមុទ្របន្ថែមលើផ្លូវដឹកជញ្ជូនតាមដងទន្លេមេគង្គដែលមានស្រាប់។

សម្តេចតេជោបានបន្ថែមថា ព្រែកជីកនេះនឹងជួយឱ្យប្រជាជននៅតាមព្រែកមានទឹកប្រើប្រាស់សម្រាប់បង្កបង្កើនផលគ្រប់គ្រាន់ ជួយរំដោះទឹកជំនន់ក្នុងរដូវវស្សា និងជួយបង្កើនផលត្រីទឹកសាបនៅតាមព្រែកនេះ។ល។

សម្តេចតេជោក៏ធ្លាប់បានបញ្ជាក់ផងដែរថា ព្រែកជីកនេះមិនប៉ះពាល់ដល់រំហូរទឹកនៃទន្លេមេគង្គ​នោះឡើយ ព្រោះម្យ៉ាងព្រែកនេះមិនតភ្ជាប់ពីទន្លេមេគង្គនោះទេ តែចេញពីទន្លេបាសាក់ និងម្យ៉ាងទៀតមានទ្វារទឹកមិនឱ្យទឹកសាបធ្លាក់ចូលក្នុងសមុទ្រនោះឡើយ។

គម្រោ​ងព្រែកជីក​ហ្វូណ​ន​តេជោ​ នឹងផ្ដល់អត្ថប្រយោជន៍ជាច្រើនដូចជា៖ ការបង្កើតតំ​បន់ពាណិ​ជ្ជ​ក​ម្ម និងម​ជ្ឈ​ម​ណ្ឌល​​ភស្ដុភារកម្ម ការអភិវឌ្ឍផែរណបថ្មីៗជាច្រើន ការពង្រីកតំ​ប​​ន់​អ​ភិ​វ​ឌ្ឍ​ន៍​ក​សិ​កម្ម​ ​ធារាសាស្ត្រ វារីវប្បកម្ម និងចិញ្ចឹមសត្វ ការជួយគាំទ្រដល់ការអភិវឌ្ឍប៉ូលសេដ្ឋកិច្ចទី៤ របស់កម្ពុជា ការ​ប​ង្កើ​ត​កា​រងារបន្ថែមនៅកំពង់ផែស្វយ័តក្រុងព្រះសីហនុ កំពង់ផែស្វយ័តក្រុងភ្នំពេញ និងកំពង់ផែផ្សេងទៀត ការជំរុ​ញ​កា​រ​អភិវឌ្ឍទីក្រុង និងនគរូបនីយកម្ម និងការជំរុញការរីកចម្រើនផ្នែកអចលនទ្រព្យ ។

សូមរំលឹកដែរថា សម្តេចធិបតី ហ៊ុន ម៉ាណែត ធ្លាប់បានគូសបញ្ជាក់ថា ការធ្វើព្រែកជីកហ្វូណន-តេជោ គ្មានអាថ៌កំបាំងអ្វីនោះទេ គឺដើម្បីពង្រីកសេដ្ឋកិច្ច និងពាណិជ្ជកម្មជាតិ ហើយការធ្វើព្រែកជីកដើម្បីភ្ជាប់ទន្លេជាមួយសមុទ្រនេះ ក៏ដូចជាការអភិវឌ្ឍកំពង់ផែក្រុងព្រះសីហនុ ពុំមានអ្វីជាអាថ៌កំបាំងនោះទេ គឺដើម្បីពង្រីកសក្តានុពលសេដ្ឋកិច្ចកម្ពុជា ជួយឱ្យសេដ្ឋកិច្ចកម្ពុជាកាន់តែរីកចម្រើន និងធ្វើឱ្យប្រជាជនកម្ពុជា កាន់តែរីកចម្រើនមានជីវភាពកាន់​តែធូរធាផងដែរ៕