សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ រយៈពេល៤ខែ ឆ្នាំ២០២៤ កម្ពុជារកចំណូលបានជាង ១២៥លានដុល្លារអាមេរិក ពីការលក់ផលិតផលកៅស៊ូ កើនឡើង ៧,៤ភាគរយ ពី ១១៦,៤លានដុល្លារអាមេរិក ដែលបានកត់ត្រាក្នុងរយៈពេលដូចគ្នាកាលពីឆ្នាំមុន។។ នេះបើតាមរបាយការណ៍របស់អគ្គនាយកដ្ឋានកៅស៊ូនៃក្រសួងកសិកម្ម រុក្ខាប្រមាញ់ និងនេសាទ។
យោងតាមរបាយការណ៍ដដែលបានបញ្ជាក់ថា ចំណូលពីការនាំចេញជ័រកៅស៊ូ គិតត្រឹមខែមេសា ឆ្នាំ២០២៤ មានចំនួន១២៥ ១៥៦ ៨៣៦ដុល្លារ ចំណែកការនាំចេញឈើកៅស៊ូ មានចំនួន៦១៧ ១១៤ដុល្លារ»។
បើគិតត្រឹមខែមេសា ឆ្នាំ២០២៤ របាយការណ៍បង្ហាញ ជ័រកៅស៊ូមានតម្លៃ ១,៥៣២ដុល្លារ ក្នុង១តោន កើនឡើងចំនួន២ដុល្លារ ក្នុង១តោន ស្មើនឹង១.១៣% ធៀបនឹងខែមុន និងបានកើនឡើងចំនួន៩៤ដុល្លារ ក្នុងមួយតោន ស្មើនឹង៧% ធៀបនឹងរយៈពេលដូចគ្នា នៃឆ្នាំមុន។
ចំណែកតម្លៃនៃការនាំចេញឈើកៅស៊ូជាមធ្យមក្នុងខែមេសា ឆ្នាំ២០២៤ មានតម្លៃ១២៦ដុល្លារ ក្នុងមួយម៉ែត្រគីប។ ដោយឡែក កៅស៊ូស្ងួតមានតម្លៃជាមធ្យម ១៤៦៥ ដុល្លារក្នុងមួយតោន ពោលគឺខ្ពស់ជាង ៥១ ដុល្លារក្នុងអំឡុងពេល៤ខែនៃឆ្នាំ២០២៣ ហើយទីផ្សារនាំចេញកៅស៊ូសំខាន់ៗរបស់កម្ពុជា រួមមាន៖ វៀតណាម ចិន ម៉ាឡេស៊ី សិង្ហបុរី ឥណ្ឌា និងសហភាពអឺរ៉ុប។
លោក ឃុន កក្កដា អគ្គនាយកស្ដីទីនៃអគ្គនាយកដ្ឋានកៅស៊ូ បានឱ្យដឹងថា ស្ថានភាពកៅស៊ូកម្ពុជាបើនិយាយអំពីតម្លៃគឺល្អ ហើយការប្រមូលផលចាប់ផ្ដើមពីខែឧសភា ឆ្នាំ២០២៤នេះ បច្ចុប្បន្ននេះ ទីផ្សារ និងតម្រូវការកៅស៊ូមាននិន្នាការថ្មី ដោយសារមានការប្រើប្រាស់ក្នុងស្រុកជាមួយវត្ដមានរោងចក្រកងឡានចំនួន៣ ដែលក្នុងនោះ រោងចក្រចំនួន២ កំពុងតែប្រមូលទិញជ័រកៅស៊ូ និងរោងចក្រកង់ឡានមួយទៀត កំពុងរៀបចំសាងសង់ដើម្បីដាក់ឱ្យដំណើរការ។
លោក ឃុន កក្កដា បានបញ្ជាក់ថា ៖
«ស្ថានភាពមកដល់ពេលនេះ វាល្អជាងបណ្ដាឆ្នាំកន្លងទៅ ដោយសារ តម្លៃអាចទទួលយកបានល្អបើទោះបីមិនទាន់ដល់កម្រិតពីមុនក៏ដោយ ប៉ុន្ដែតម្លៃចាប់ពី ១,៧០០ដុល្លារ ដល់២,០០០ដុល្លារ ក្នុងមួយតោន គឺល្អ ហើយសង្ឃឹមថាឱ្យតែតម្លៃថេរ មិនធ្លាក់ចុះតម្លៃ»។
សូមជម្រាបថា យោងតាមរបាយការណ៍ ក្រសួងកសិកម្ម រហូតមកដល់ពេលនេះ កម្ពុជាបានដាំដើមកៅស៊ូលើផ្ទៃដីកៅស៊ូសរុបមានចំនួន ៤០៧ ១៧២ហិកតា ក្នុងនោះ ផ្ទៃដីចៀរជ័រមានចំនួន ៣២០ ១៨៤ហិកតា ស្មើនឹង៧៩ភាគរយ មានអាយុគ្រប់គ្រាន់សម្រាប់កាប់ និងផ្ទៃដីថែទាំមានចំនួន ៨៦,៩៨៨ហិកតា ស្មើនឹង២១%។
កម្ពុជាក៏មានរោងចក្រកែច្នៃកៅស៊ូ និងមជ្ឈមណ្ឌលសិប្បកម្មចំនួន ១៦៨ ក្នុងខេត្តចំនួន ១១។ កំពង់ធំ គឺជាខេត្តដែលផលិតកៅស៊ូនាំមុខគេក្នុងប្រទេសកម្ពុជា ដែលមានផ្ទៃដីដាំដំណាំសរុបចំនួន ១៥,៤% បន្ទាប់មកខេត្តមណ្ឌលគិរី ៨,៤% និងស្ទឹងត្រែង ៤,២%។
សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា កាលពីពេលថ្មីៗនេះ បានស្នើឱ្យរោងចក្រផលិតសំបកកង់ទាំងអស់ក្នុងប្រទេសប្រើប្រាស់កៅស៊ូក្នុងស្រុកជាវត្ថុធាតុដើម បង្កើតទីផ្សារសម្រាប់កសិករកៅស៊ូ។
សូមបញ្ជាក់ថា វិស័យផលិតសំបកកង់របស់ប្រទេសមានការរីកចម្រើនយ៉ាងខ្លាំងក្នុងរយៈពេលថ្មីៗនេះ ដោយក្រុមហ៊ុនធំៗចំនួនបីបានពង្រឹងវត្តមានរបស់ពួកគេគឺក្រុមហ៊ុន General Tires Technology (Cambodia) Co., Ltd., Sailun Group Co., Ltd. និង Qingdao Doublestar Group ៕
Account
Security
Favourite Content