សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ រាជរដ្ឋាភិបាលកម្ពុជាបានចំណាយថវិការាប់ពាន់លានដុល្លាររួចមកហើយដើម្បីសាងសង់ហេដ្ឋារចនាសម្ព័ន្ធនៅក្នុងប្រទេស ដែលក្នុងនោះរួមមានទាំងផ្លូវគោក ផ្លូវដែក និងផ្លូវទឹក ។ ដោយឡែកនៅពេលបច្ចុប្បន្ននេះ រាជរដ្ឋាភិបាលមានគម្រោងសាងសង់ហេដ្ឋារចនាសម្ព័ន្ធចំនួន៣បន្ថែមទៀតដែលត្រូវការទឹកប្រាក់រហូតដល់ជិត១០ពាន់លានដុល្លារអាមេរិក ។
គម្រោងហេដ្ឋារចនាសម្ព័នចំនួន៣ ដែលរាជរដ្ឋាភិបាលមានគម្រោងសាងសង់សុទ្ធតែជាគម្រោងធំៗជាប្រវត្តិសាស្ត្រ រួមមានគម្រោងផ្លូវល្បឿនលឿនមួយ គម្រោងផ្លូវដែកល្បឿនលឿនមួយ និងគម្រោងព្រែកជីកហ្វូណន តេជោ មួយ ។
គម្រោងអភិវឌ្ឍន៍ហេដ្ឋារចនាសម្ព័ន្ធទាំង ៣ នេះសុទ្ធតែជាគម្រោងដែលត្រូវការថវិការាប់ពាន់លានដុល្លារអាមេរិកដើម្បីអភិវឌ្ឍន៍ ដោយក្នុងនោះ ១. គម្រោងល្បឿនលឿនភ្នំពេញ សៀមរាប ប៉ោយប៉ែត មានប្រវែងជាង៤០០គីឡូម៉ែត្រ ត្រូវការទឹកប្រាក់ដើម្បីសាងសង់ប្រមាណ ៤ពាន់លានដុល្លារអាមេរិក ។ គម្រោងនេះ បាន និងកំពុងសិក្សា វាយតម្លៃ ដោយរំពឹងថានឹងចាប់ផ្ដើមបើកការដ្ឋាននៅពេលឆាប់ៗខាងមុខនេះ ។
២. គម្រោងផ្លូវដែកល្បឿនលឿនពីភ្នំពេញ ទៅប៉ោយប៉ែត ក៏ត្រូវទឹកប្រាក់ប្រមាណ៤ពាន់លានដុល្លារអាមេរិកដែរ ។ គម្រោងនេះ បានបញ្ចប់ការសិក្សារួចរាល់ហើយ ដោយរង់ចាំថវិកា និងក្រុមហ៊ុនវិនិយោគដើម្បីអាចដំណើរការគម្រោងបាន ។
៣. គម្រោងព្រែកជីកហ្វូណនតេជោ តភ្ជាប់ពីទន្លេបាសាក់ទៅកំពង់ផែសមុទ្រខេត្តកែប ដែលគម្រោងនេះមានប្រវែងជាង១៨០គីឡូម៉ែត្រ ត្រូវការថវិកាប្រមាណ១៧០០លានដុល្លារអាមេរិក ។ គម្រោងនេះកំពុងទទួលបានការគាំទ្រយ៉ាងខ្លាំងពីប្រជាពលរដ្ឋកម្ពុជា ខណៈរាជរដ្ឋាភិបាលក៏ដាក់គម្រោងនេះក្នុងគម្រោងអាទិភាពដែលនឹងត្រូវចាប់ផ្ដើមអនុវត្តមុនគម្រោង២ខាងលើផងដែរ ។
សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា បានមានប្រសាសន៍កន្លងមកថា គម្រោងព្រែកជីកហ្វូណនតេជោ គឺជាគម្រោងអាទិភាពដែលត្រូវតែធ្វើវាឱ្យបាន ហើយបើទោះបីជាគម្រោងនេះមិនមានក្រុមហ៊ុនបរទេសណាមកអភិវឌ្ឍន៍ សម្ដេចបានស្នើសុំឱ្យវិនិយោគិនក្នុងស្រុកកៀរគរថវិកាដើម្បីសាងសង់គម្រោងព្រែកជីកនេះឱ្យបាន ព្រោះវាជាគម្រោងដែលផ្ដល់អត្ថប្រយោជន៍ដ៏មហាសាលដល់សេដ្ឋកិច្ច និងប្រជាពលរដ្ឋកម្ពុជា ។
ថ្មីៗនេះដែរ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាក៏បានលើកឡើងផងដែរថា វិស័យហេដ្ឋារចនាសម្ព័ន្ធគឺជាវិស័យអាទិភាពដែលរាជរដ្ឋាភិបាលបានកំណត់នៅក្នុងផែនការយុទ្ធសាស្ត្រទាក់ទាញវិនិយោគិនចូលមកបណ្ដាក់ទុនវិនិយោគនៅក្នុងប្រទេសកម្ពុជា ។
នៅក្នុងរយៈពេលប៉ុន្មានឆ្នាំចុងក្រោយនេះ គម្រោងហេដ្ឋារចនាសម្ព័ន្ធធំៗមួយចំនួនត្រូវបានលេចចេញជារូបរាង ដោយក្នុងនោះរួមមានគម្រោងផ្លូវល្បឿនលឿនភ្នំពេញ ក្រុងព្រះសីហនុ បានសាងសង់រួច និងកំពុងប្រើប្រាស់, គម្រោងផ្លូវល្បឿនលឿនភ្នំពេញ-បាវិត ស្ថិតនៅក្នុងដំណាក់កាលកំពុងសាងសង់, គម្រោងផ្លូវជាច្រើនខ្សែនៅក្នុងក្រុងសៀមរាប ខេត្តសៀមរាប និងក្រុងព្រះសីហនុ ខេត្តព្រះសីហនុជាដើម ៕
Account
Security
Favourite Content