សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ យោងតាមការរបាយការណ៍អគ្គនាយកដ្ឋានគយ និងរដ្ឋាករកម្ពុជា នៅក្នុងសប្ដាហ៍នេះបានឱ្យដឹងថា ក្នុងរយៈពេល៩ខែ ដើមឆ្នាំ២០២៤កន្លងទៅនេះ ទំហំពាណិជ្ជកម្មរបស់កម្ពុជាជាមួយបណ្តាប្រទេសដែលជាសមាជិកអាស៊ានមានទំហំរហូតដល់ ១១,៧២ ពាន់លានដុល្លារ កើនឡើងប្រមាណ ១៣ ភាគរយ ធៀបទៅនឹងរយៈពេលដូចគ្នាកាលពីឆ្នាំ២០២៣ ដែលមានទំហំត្រឹម ១០,៣៧ ពាន់លានដុល្លា។
តាមរយៈរបាយការណ៍ពីអគ្គនាយកដ្ឋានគយ និងរដ្ឋាករកម្ពុជាបានឱ្យដឹងថា គិតចាប់ពីខែមករា រហូតដល់ដំណាច់ខែកញ្ញា ព្រះរាជាណាចក្រកម្ពុជា បាននាំចេញផលិតផលសរុបទៅកាន់បណ្តាប្រទេសក្នុងតំបន់អាស៊ាន មានទំហំទឹកប្រាក់ចំនួន ៣.៨១ ពាន់លានដុល្លារ កើនឡើងប្រមាណ ១៣ ភាគរយ ធៀបទៅនឹងរយៈពេលដូចគ្នាកាលពីឆ្នាំ២០២៣ ដែលមានត្រឹម ៣.៣៧ ពាន់លានដុល្លារប៉ុណ្ណោះ។
ជាមួយគ្នានេះ ការនាំចូលផលិតផលសរុបពីបណ្តាប្រទេសអាស៊ានមកកាន់កម្ពុជា មានចំនួន ៧,៩១ ពាន់លានដុល្លារ កើនឡើង ១៣ ភាគរយផងដែរ ធៀបនឹងឆ្នាំកន្លងទៅដែលមានត្រឹម ៧ ពាន់លានដុល្លារ។
ដោយឡែក សម្រាប់តែលំហូរពាណិជ្ជកម្មទ្វេរភាគីរវាងកម្ពុជា-វៀតណាម ក្នុងរយៈពេល៩ខែ ដើមឆ្នាំ២០២៤កន្លងទៅនេះមានទំហំ មានទឹកប្រាក់សរុប ៥ ៨១៩,៤៨ លានដុល្លារ កើនឡើង ២១,៩ ភាគរយពីចំនួន ៤ ៧៧៤,៣ លានដុល្លារនារយៈពេលដូចគ្នាឆ្នាំ២០២៣។ សម្រាប់ទំនិញកម្ពុជានាំទៅវៀតណាម មានចំនួន ២ ៧២៧,៤៥ លានដុល្លារ កើន ៣៣,៨ ភាគរយពីចំនួន ២ ០៣៨,៥២ លានដុល្លារ និងទំនិញវៀតណាមនាំមកកម្ពុជា ៣ ០៩២,០៣ លានដុល្លារ កើន១៣ ភាគរយពីចំនួន ២ ៧៣៥,៧៨ លានដុល្លារ។
អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានឱ្យដឹងថា ក្នុងនាមជាប្រទេសមានព្រំដែនគោក-ទឹកជាប់គ្នា និងមានទំនាក់ទំនងនយោបាយល្អទៀតនោះ គឺធ្វើឱ្យចរាចរណ៍ទំនិញ និងមនុស្សរវាងប្រទេសទាំង ២ កើនឡើងជាបន្តបន្ទាប់។ លោកបន្តថា បច្ចុប្បន្នដោយសារនៅកម្ពុជាមិនទាន់មានឃ្លាំងស្តុក និងរោងចក្រកែច្នៃផលិតផលកសិកម្មគ្រប់គ្រាន់ ដូច្នេះនៅរដូវប្រមូលម្តងៗគឺមានឈ្មួញជាតិ និងអន្តរជាតិជាច្រើនមកប្រមូលទិញផលិតផលកម្ពុជានាំទៅលក់ឱ្យប្រទេសវៀតណាម។
លោកឧកញ៉ាបានថ្លែងថា៖ ទឹកប្រាក់ដែលបានពីការផ្លាស់ប្តូរទំនិញរវាងប្រទេសទាំង ២ នឹងបន្តកើនឡើងច្រើនទៀត។ ចំនួនទឹកប្រាក់ជាក់ស្តែងអាចមានលើសពីតួលេខកត់ត្រា។ វៀតណាមគឺជាទីផ្សារសំខាន់សម្រាប់ផលិតផលកសិកម្មកម្ពុជា។ ផលិតផលសំខាន់ៗដែលកម្ពុជា នាំទៅវៀតណាម រួមមានដូចជា ស្រូវ, កៅស៊ូ, ស្វាយចន្ទី, ដំឡូងមី ពោត ចេក ស្វាយ ថ្នាំជក់ និងចំណែកវៀតណាមនាំមកវិញ មានដូចជា សម្ភារសំណង់ គ្រឿងម៉ាស៊ីន ប្រេងឥន្ធនៈ ឧបករណ៍អេឡិចត្រូនិកអគ្គិសនី ជីកសិកម្ម គ្រឿងទេស និងបន្លែ ផ្លែឈើ ជាដើម។
លោកបណ្ឌិត ហុង វណ្ណៈ អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជាបានលើកឡើងថា បើនិយាយពីជាង ១ ទសវត្សរ៍មុន គឺទឹកប្រាក់នាំទំនិញពីកម្ពុជាមានចំនួនតិចតួចបំផុត។ សមាហរណកម្មសេដ្ឋកិច្ចអាស៊ាន និងទំនាក់ទំនងទ្វេភាគី បានជួយឱ្យទឹកប្រាក់នាំចេញរបស់កម្ពុជាទៅវៀតណាម កើនឡើងជាបន្តបន្ទាប់នារយ´ពេលប៉ុន្មានឆ្នាំចុងក្រោយនេះ។ ការបន្តបើកច្រកព្រំដែន និងការកែល្អស្ថានភាពនាំចេញ និងជួយឱ្យចរាចរទំនិញមានសកម្មភាពកាត់តែសកម្ម។
ជាមួយគ្នានេះ លោកបណ្ឌិតក៏បានបង្ហាញពីក្ដីរំពឹងថា ទំហំពាណិជ្ជកម្មរវាងកម្ពុជា-វៀតណាម នៅឆ្នាំ២០២៥ នឹងបន្តកើនឡើងបន្ថែមទៀតជាក់ជាមិនខាន ។
គួរបញ្ជាក់ឱ្យដឹងដែរថា ទំហំពាណិជ្ជកម្មរបស់កម្ពុជាជាមួយអាស៊ានមានចំនួន ២៨.៣ ភាគរយនៃទំហំពាណិជ្ជកម្មសរុបរបស់កម្ពុជាដែលមានចំនួន ៤១.៤ ពាន់លានដុល្លារក្នុងរយៈពេល៩ខែដំបូងនៃឆ្នាំ២០២៤នេះ។ ដោយឡែក សម្រាប់ដៃគូពាណិជ្ជកម្មកំពូលទាំង៥របស់ព្រះរាជាណាចក្រកម្ពុជាដែលស្ថិតនៅក្នុងអាស៊ាន រួមមានប្រទេសវៀតណាម ថៃ សិង្ហបុរី ឥណ្ឌូនេស៊ី និងម៉ាឡេស៊ី៕
Account
Security
Favourite Content