បាងកក ៖ ក្នុងស្ថានភាពដែលទីផ្សាររថយន្តថៃកំពុងក្លាយជាគោលដៅថ្មីនៃការប្រើប្រាស់របស់ប្រជាជនក្នុងស្រុកជាមួយវត្តមានរថយន្តចិននោះគេសង្កេតឃើញថា ភ្លាមៗបណ្តារោងចក្រដែលជាអ្នកផលិតរថយន្តរបស់អឺរ៉ុបចាប់ផ្តើមមានប្រតិកម្មយ៉ាងខ្លាំង ជាក់ស្តែង រោងចក្ររបស់ជប៉ុនបានសម្រេចចិត្តចាកចេញពីប្រទេសមួយនេះជាបណ្តើរៗ ។ បន្ថែមពីលើបញ្ហានេះ តួលេខនៃការផលិតរថយន្តសរុបនៅទូទាំងប្រទេសថៃកាលពីអំឡុងខែមិថុនាកន្លងទៅនេះ បានធ្លាក់ចុះដល់ទៅ ២០,១១ភាគរយធៀបទៅនឹងពេលវេលាដូចគ្នាកាលពីឆ្នាំទៅ។ ស្ថិតនៅក្នុងបរិបទជាមួយគ្នានេះគេសង្កេតឃើញថា បញ្ហាចម្បងចំពោះមុខដែលធ្វើឲ្យផលិតកម្មផលិតរថយន្តធ្លាក់ចុះខ្លាំងបែបនេះគឺបណ្តាលមកពីបញ្ហារឹតត្បិតប្រព័ន្ធផ្តល់ហិរញ្ញវត្ថុសម្រាប់រថយន្ត ជាពិសេសបញ្ហាបំណុលគ្រួសារក្នុងប្រទេសកើនឡើងខ្ពស់ខ្លាំងពេក។ តួលេខនេះផងដែរបើធៀបទៅនឹងតួលេខកាលពីខែឧសភាគឺមានការធ្លាក់ចុះប្រមាណជា ១៦,១៩ភាគរយ។

របាយការណ៍ជាផ្លូវការដែលត្រូវបានផ្តល់ដោយសហព័ន្ធនៃឧស្សាហកម្មថៃ (FTI) កាលពីថ្ងៃព្រហស្បតិ៍ម្សិលមិញនេះបានបង្ហាញថា គិតពីខែមករាដល់ខែមិថុនា សកម្មភាពផលិតរថយន្តថៃបានធ្លាក់ចុះដល់ទៅ ១៧,៣៩ភាគរយធៀបទៅនឹងពេលវេលាដូចគ្នាកាលពីឆ្នាំកន្លងទៅមកនៅត្រឹមតែ ៧៦១២៤០គ្រឿងប៉ុណ្ណោះ។

លោក Surapong Paisitpattanapong អ្នកនាំពាក្យនាយកដ្ឋានទទួលបន្ទុកផ្នែកកិច្ចការងារឧស្សាហកម្មរថយន្តរបស់សហព័ន្ធ FTI បាននិយាយថា ៖ វិធានការតឹងរ៉ឹងសម្រាប់ការអនុម័តឥណទានពីស្ថាប័នហិរញ្ញវត្ថុ គួបផ្សំនឹងបំណុលគ្រួសារដែលមានជិត ៩០ភាគរយនៃ GDP នាំឱ្យអត្រានៃការបដិសេធឥណទានរថយន្តកាន់តែខ្ពស់។ មិនត្រឹមតែប៉ុណ្ណោះសហព័ន្ធបាននិយាយថា ប្រតិបត្តិការនៃការលក់រថយន្តក្នុងស្រុកបានធ្លាក់ចុះ ២៦,០៤ភាគរយ នៅក្នុងខែមិថុនាដូចគ្នានេះពោលគឺធៀបនឹងឆ្នាំមុន និងបន្ទាប់ពីការធ្លាក់ចុះប្រចាំឆ្នាំដល់ទៅ ២៣,៣៨ភាគរយ នៅក្នុងខែឧសភា។

ដោយសារមើលឃើញកាលៈទេសៈនេះ សហព័ន្ធបានទម្លាក់គោលដៅលក់ក្នុងស្រុករបស់ខ្លួនមកត្រឹម ៥៥០ ០០០ គ្រឿងពីការព្យាករណ៍ពីមុនប្រមាណជា ៧៥០ ០០០គ្រឿង។ FTI ក៏កាត់បន្ថយគោលដៅផលិតកម្មរបស់ខ្លួនមកត្រឹម ១,៧លានគ្រឿងនៅឆ្នាំនេះ ពោលគឺធ្លាក់ចុះពីចំនួន ១,៩លានគ្រឿងដែលបានកំណត់ពីលើកមុន ខណៈដែលកាលពីក្នុងឆ្នាំ២០២៣ ប្រទេសថៃបានផលិតរថយន្តចំនួន១,៨៤ លានគ្រឿង៕