សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ កម្ពុជា បានឈានពីប្រទេសដែលពឹងផ្អែកលើឧស្សាហកម្មសម្លៀកបំពាក់ ទៅជាប្រទេសដែលមានមូលដ្ឋានគ្រឹះផលិត-នាំចេញផលិតផលចម្រុះ ជាពិសេស គ្រឿងអេឡិចត្រូនិក និងផលិតផលកសិ-ឧស្សាហកម្ម ជាមួយនឹងការបំបែកកំណត់ត្រាវិនិយោគខ្ពស់បំផុតមិនធ្លាប់មានរយៈពេល២ឆ្នាំជាប់គ្នា ដោយក្នុងឆ្នាំ២០២៥កន្លងទៅថ្មីៗនេះ ក្រុមប្រឹក្សាអភិវឌ្ឍន៍កម្ពុជា បានអនុម័តគម្រោងថ្មីចំនួន ៦៣០ គម្រោង ក្នុងទុនវិនិយោគ ១០ពាន់លានដុល្លារ បង្កើតការងារបានជាង ៤៣ម៉ឺនកន្លែង។
ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា តំណាងដ៏ខ្ពង់ខ្ពស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ថ្លែងលើកឡើងដូច្នេះនៅក្នុងឱកាសជាអធិបតីបិទសន្និបាតបូកសរុបលទ្ធផលការងារពាណិជ្ជកម្ម ឆ្នាំ២០២៥ និងទិសដៅការងារពាណិជ្ជកម្ម ឆ្នាំ២០២៦ របស់ក្រសួងពាណិជ្ជកម្ម ដែលបានប្រព្រឹត្តទៅនៅទីស្តីការក្រសួងពាណិជ្ជកម្មកាលពីថ្ងៃចុងសប្ដាហ៍កន្លងទៅនេះ។
ឯកឧត្តមឧបនាយករដ្ឋមន្ត្រីបានសង្កត់ធ្ងន់ថា៖
«ក្រោមការដឹកនាំរបស់ សម្តេចធិបតី កម្ពុជា កំពុងឈរជើងយ៉ាងរឹងមាំ ទោះស្ថិតក្នុងស្ថានភាពភូមិសាស្ត្រនយោបាយពិភពលោកតានតឹងក៏ដោយ ប៉ុន្តែកម្ពុជាមានគោលជំហរច្បាស់លាស់ក្នុងការកសាងមូលដ្ឋានគ្រឹះសេដ្ឋកិច្ចដ៏រឹងមាំ ដើម្បីសម្រេចចក្ខុវិស័យឆ្នាំ២០៥០ ជាប្រទេសមានចំណូលខ្ពស់»។
ឯកឧត្តម ស៊ុន ចាន់ថុល បានលើកឡើងថា៖ តាមរយៈរបាយការណ៍បូកសរុបបានបង្ហាញថា ក្នុងឆ្នាំ២០២៥ កន្លងទៅ ក្រសួងពាណិជ្ជកម្មសម្រេចបាននូវសមិទ្ធផលគួរឱ្យកត់សម្គាល់ ទោះបីជាស្ថានភាពសេដ្ឋកិច្ចសកលមានការប្រែប្រួលយ៉ាងណាក៏ដោយ។ កំណត់ត្រាសមិទ្ធផលលេចធ្លោ និងគួរឱ្យកត់សម្គាល់ទាំងនោះ រួមមាន៖ (១)ការធ្វើពិពិធកម្មទីផ្សារ, (២)ការពង្រឹងសមត្ថភាពផ្គត់ផ្គង់ក្នុងស្រុក និងនាំចេញ, (៣)ការពង្រឹងកិច្ចសម្រួលពាណិជ្ជកម្ម និងការកសាងប្រព័ន្ធស្វ័យប្រវត្តិកម្មសម្រាប់ផ្តល់សេវាពាណិជ្ជកម្ម, (៤)ការកសាងច្បាប់ និងលិខិតបទដ្ឋានគតិយុត្ត, (៥)ការលើកកម្ពស់អភិបាលកិច្ចស្ថាប័ន និងវិស័យឯកជន, (៦)ការរក្សាបាននូវស្ថិរភាពតម្លៃនិងសន្តិសុខស្បៀង, និង(៧)ការលើកកម្ពស់ការប្រកួតប្រជែង និងកិច្ចការពារអ្នកប្រើប្រាស់ ដើម្បីធានាបាននូវសុខុមាលភាពជូនប្រជាពលរដ្ឋ។ កិច្ចការទាំងអស់ខាងលើ បានឆ្លុះបញ្ចាំងអំពីការដើរតាមមាគ៌ាដ៏ត្រឹមត្រូវ ឆ្ពោះទៅរកបង្គោលចរថ្មីនៃការអនុវត្តអភិក្រម «រក្សាទីផ្សារចាស់ និងពង្រីកទីផ្សារថ្មី» និងការពង្រឹងភាពធន់នៃពាណិជ្ជកម្មកម្ពុជា ក្នុងកាលៈទេសៈនៃការប្រែប្រួលស្ថានភាពសេដ្ឋកិច្ចក្នុងតំបន់ និងពិភពលោក។
ក្នុងឱកាសនោះដែរ ឯកឧត្តមឧបនាយករដ្ឋមន្ត្រី ក៏បានដាក់ចេញនូវអនុសាសន៍គន្លឹះ ៩ចំណុច ដើម្បីជំរុញកំណើនសេដ្ឋកិច្ច រួមមាន៖ (១)ពង្រីកទីផ្សារនាំចេញដោយបន្តអនុវត្តអភិក្រម «រក្សាទីផ្សារចាស់ ពង្រីកទីផ្សារថ្មី», (២)ឌីជីថលូបនីយកម្មសេវាសាធារណៈ, (៣)ពង្រឹងអភិបាលកិច្ច និងកិច្ចការពារអ្នកប្រើប្រាស់,(៤)លើកកម្ពស់ផលិតផលក្នុងស្រុក, (៥)ទាក់ទាញការវិនិយោគលើឧស្សាហកម្មគាំទ្រនានា, (៦)ត្រៀមខ្លួនរៀបចំយុទ្ធសាស្ត្រសម្រាប់ការចាកចេញពីស្ថានភាពប្រទេសអភិវឌ្ឍន៍តិចតួច (LDC), (៧)គាំទ្រសមត្ថភាពសហគ្រាសនាំចេញ ជាពិសេសសហគ្រាសធុនតូច និងមធ្យម (SMEs),(៨)អភិវឌ្ឍសេដ្ឋកិច្ចឌីជីថល និងគ្រប់គ្រងសុវត្ថិភាពការលក់អនឡាញ, និង (៩)កាត់បន្ថយរបាំងពាណិជ្ជកម្ម និងចូលរួមឱ្យបានស្និទ្ធស្នាល ជាមួយសភាពាណិជ្ជកម្មអន្តរជាតិនានា តាមរយៈយន្តការកិច្ចសន្ទនារវាងរដ្ឋ និងវិស័យឯកជន៕
Account
Security
Favourite Content