សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ដើម្បីទាក់ទាញវិនិយោគិនជប៉ុនចូលបណ្ដាក់ទុនវិនិយោគនៅកម្ពុជាកាន់តែច្រើនបន្ថែមទៀតនោះ រដ្ឋាភិបាលកម្ពុជាបានបន្តផ្សព្វផ្សាយពីឱកាស សក្ដានុពល និងកាលានុវត្តន៍ភាពវិនិយោគដល់បណ្ដាវិនយោគិន ធុរជនរបស់ជប៉ុន។ ជាក់ស្ដែង ថ្មីៗនេះ ឯកឧត្តម ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ ក្រុមប្រឹក្សាអភិវឌ្ឍន៍កម្ពុជាបានចូលរួមក្នុងការផ្សព្វផ្សាយពីសក្ដានុពលនិងកាលានុវត្តភាព វិនិយោគនៅក្នុងប្រទេសកម្ពុជាទៅកាន់វិនិយោគិនជប៉ុនប្រមាណ១៥០នាក់នាទីក្រុងតូក្យូ ។
នៅក្នុងបទបង្ហាញរបស់ឯកឧត្តមឧបនាយករដ្ឋមន្ត្រី និងជាអនុប្រធានទី១ ក្រុមប្រឹក្សាអភិវឌ្ឍន៍កាលពីសប្ដាហ៍នាទីក្រុងតូក្យូ បានរំលេចអំពីសក្តានុពលវិជ្ជមានរបស់ព្រះរាជាណាចក្រកម្ពុជា មានជាអាទិ៍ ស្ថិរភាពនយោបាយ, ស្ថានភាពម៉ាក្រូសេដ្ឋកិច្ចដែលមានលំនឹងវិជ្ជមាន, កម្លាំងពលកម្មវ័យក្មេងប្រកបដោយថាមវន្ត, រាជរដ្ឋាភិបាលដែលមានទំនោរគាំទ្រដល់ការរីកលូតលាស់នៃធុរកិច្ច, របបវិនិយោគដែលមានភាពទាក់ទាញ និងអនុគ្រោះ និងហេដ្ឋារចនាសម្ព័ន្ធអន្តរមធ្យោបាយដែលបាន និងកំពុងអភិវឌ្ឍឱ្យកាន់តែមានភាពតភ្ជាប់ និងប្រទាក់ក្រឡា។
ឯកឧត្តម ឧបនាយករដ្ឋមន្ត្រីបានបង្ហាញនូវសុទិដ្ឋិនិយមយ៉ាងមុតមាំថា វិនិយោគិន និងធុរជនដែលបានអញ្ជើញចូលរួមនាពេលនោះនឹងអញ្ជើញមកសិក្សាស្វែងយល់ដោយផ្ទាល់នៅកម្ពុជា ក៏ដូចជាពាំនាំនូវបច្ចុប្បន្នភាពនៃបរិយាកាសវិនិយោគនៅកម្ពុជាទៅកាន់សហគមន៍ធុរកិច្ចជប៉ុនឱ្យកាន់តែទូលំទូលាយបន្ថែមមួយកម្រិតទៀត ។
ទន្ទឹមនឹងនេះដែរ វិនិយោគិនកម្ពុជានិងជប៉ុនជាច្រើនក៏បានពិភាក្សាស្តីពីសក្តានុពលវិនិយោគលើវិស័យថ្មីៗនៅកម្ពុជាដោយបានគូសបញ្ជាក់អំពីភាពងាយស្រួលក្នុងការប្រកបអាជីវកម្មនៅកម្ពុជា ពិពិធភាពនៃសកម្មភាពវិនិយោគដែលពោរពេញដោយឱកាស និងការគាំទ្រផ្នែកគោលនយោបាយប្រកបដោយបុរេសកម្មពីសំណាក់រាជរដ្ឋាភិបាលលើអនុវិស័យថាមពលកកើតឡើងវិញ ខ្សែច្រវាក់ផលិតកម្មបៃតង និងសេដ្ឋកិច្ចឌីជីថលដែលកំពុងតែដើរស្របនឹងនិន្នាការតំបន់ និងសកល ។
ជាការកត់សម្គាល់ រហូតមកដល់ពេលនេះ គម្រោងលេចធ្លោក្រោមការវិនិយោគរបស់វិនិយោគិនជប៉ុនមួយចំនួន បាន និងកំពុងទទួលបានការគាំទ្រពីសំណាក់ប្រជាពលរដ្ឋកម្ពុជា និងពលរដ្ឋផ្សេងទៀតកំពុងរស់នៅក្នុងប្រទេសកម្ពុជា ក្នុងនោះមានគម្រោងផ្សារទំនើបអ៊ីអន ទាំង៣ គម្រោងលំនៅឋានតម្លៃសមរម្យអារ៉ាខាវ៉ា គម្រោងបុរីលំនៅឋាន ជាដើម ។ បន្ថែមលើសនេះទៀតនោះ វិនិយោគិនជប៉ុនក៏បានជម្រាបជូនមកកាន់មន្ត្រីជាន់ខ្ពស់កម្ពុជាពីបំណងក្នុងការបង្កើតតំបន់សេដ្ឋកិច្ចពិសេសជប៉ុន ដោយគ្រោងនឹងបោះទុនប្រមាណ ៦៥០លានដុល្លារអាមេរិក ដើម្បីសម្រួលការវិនិយោគរបស់ជប៉ុននៅកម្ពុជា ។
បើតាមលោកបណ្ឌិត អ៊ិន ចាន់នី ប្រធាននាយកប្រតិបត្តិធនាគារ អេស៊ីលីដា បានមានប្រសាសន៍លើកឡើងថា ជប៉ុនជាប្រទេសដែលមានក្រុមហ៊ុនប្រភេទសហគ្រាសធុនតូច និងមធ្យម(SME) ច្រើន ហើយបើសិនជាកម្ពុជាអាចទាក់ទាញក្រុមហ៊ុនដែលជាប្រភេទ SME ចូលមកបណ្ដាក់ទុនវិនិយោគបានកាន់តែច្រើនកាន់តែប្រសើរ ពីព្រោះថារាល់ការវិនិយោគរបស់ជប៉ុន ត្រូវបានមើលឃើញថាសុទ្ធតែមានគម្រោង និងផែនការច្បាស់លាស់សម្រាប់អនាគត ។
Account
Security
Favourite Content