សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ប្រធានាធិបតីសហរដ្ឋអាម៉េរិក លោក ដូណាល់ ត្រាំ បានផ្ញើលិខិតមួយច្បាប់មកកាន់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ពីការសម្រេចរបស់អាម៉េរិកលើការដាក់ពន្ធគយបដិការលើទំនិញនាំចូលពីកម្ពុជា ដោយក្នុងលិខិតនោះបានបញ្ជាក់ថា អាម៉េរិកបានដាក់ពន្ធ ៣៦ភាគរយលើទំនិញនាំចូលពីកម្ពុជា ដោយចាប់ផ្ដើមអនុវត្តពីថ្ងៃទី០១ ខែសីហា ឆ្នាំ២០២៥ ដូច្នេះ កម្ពុជាមានរយៈពេល៣សប្ដាហ៍ទៀតដើម្បីចរចាជាមួយអាម៉េរិក ក្នុងការស្នើសុំបញ្ចុះអត្រាពន្ធបដិការបន្ថែមទៀត ។
នៅក្នុងសន្និសីទសារព័ត៌មានកាលពីល្ងាចថ្ងៃទី០៨ ខែកក្កដា ឆ្នាំ២០២៥ ឯកឧត្តម ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ ក្រុមប្រឹក្សាអភិវឌ្ឍន៍កម្ពុជាបានថ្លែងថា កម្ពុជានៅមានពេលវេលា៣សប្ដាហ៍ទៀត ដើម្បីចរចាជាមួយភាគីអាម៉េរិកលើការស្នើសុំបញ្ចុះអត្រាពន្ធបន្ថែម ហើយឯកឧត្តមក៏បានបញ្ជាក់ដែរថា ពន្ធបដិការ ៣៦ភាគរយ ដែលអាម៉េរិកបានសម្រេចដាក់លើទំនិញនាំចូលពីកម្ពុជា គឺជាជោគជ័យមួយរបស់កម្ពុជាក្រោយមានការចរចាជាច្រើនលើក ។
ឯកឧត្តមបានមានប្រសាសន៍ថា ពន្ធបដិការអាម៉េរិកដែលបានដាក់មកលើកម្ពុជា គឺនឹងចាប់ផ្ដើមនៅថ្ងៃទី០១ ខែសីហា ឆ្នាំ២០២៥ ហើយក្នុងលិខិតដែលប្រធានាធិបតីសហរដ្ឋអាម៉េរិកផ្ញើជូនសម្ដេចធិបតីបានបើកឱកាសឱ្យកម្ពុជាទៅចរចាបន្ថែមទៀត នៅមុនថ្ងៃទី០១ ខែសីហា ឆ្នាំ២០២៥ ហើយក្រុមការងាររបស់កម្ពុជាបានត្រៀមរួចស្រេចហើយ ដោយឯកឧត្តមបានផ្ញើសារអេឡិចត្រូនិកទៅតំណាងពាណិជ្ជកម្មសហរដ្ឋអាម៉េរិកថា កម្ពុជាត្រៀមរួចជាស្រេចក្នុងការធ្វើដំណើរទៅសហរដ្ឋអាម៉េរិក ឬចរចាតាមប្រព័ន្ធអនឡាញ ដើម្បីបន្ថយអត្រាពន្ធបដិការថែមទៀត ។ ដូច្នេះ អត្រាពន្ធ ៣៦ភាគរយនេះមិនមែនជាអត្រាពន្ធដែលនឹងត្រូវចូលជាធរមាននោះទេ គឺកម្ពុជានៅមានឱកាសចរចាស្នើសុំបញ្ចុះបន្ថែមទៀត ។
បើតាមឯកឧត្តម ស៊ុន ចាន់ថុល អត្រាពន្ធបដិការ ៣៦ភាគរយ ដែលសហរដ្ឋអាម៉េរិកបានដាក់មកលើទំនិញនាំចូលពីកម្ពុជាគឺជាតួលេខនៃលទ្ធផលចរចារវាងកម្ពុជា និងអាម៉េរិកនាពេលកន្លងមកដោយក្នុងចំណោមប្រទេសចំនួន១៤ កម្ពុជាទទួលបានការបញ្ចុះពន្ធច្រើនជាងគេរហូតដល់ ២៦,៥ភាគរយ ដោយបញ្ចុះពី ៤៩ភាគរយ មកនៅត្រឹម ៣៦ភាគរយ គឺបានចុះបន្ថែម ១៣ភាគរយទៀត ។
ឯកឧត្តមបញ្ជាក់បន្ថែមថា ការទៅចរចាជាមួយភាគីអាម៉េរិកពាក់ព័ន្ធនឹងអត្រាពន្ធគយនេះ កម្ពុជាចង់បានពន្ធសូន្យ ប៉ុន្តែលទ្ធភាពរបស់អាម៉េរិកផ្ដល់ឱ្យគឺត្រឹមតែ ៣៦ភាគរយ តែយ៉ាងណា វាក៏ជាជោគជ័យមួយរបស់កម្ពុជា បន្ទាប់ពីបានចរចាជាមួយអាម៉េរិក ។
ឯកឧត្តមក៏បានអំពាវនាវដល់វិនិយោគិននៅក្នុងប្រទេស សហគ្រិន ដែលជាអ្នកផលិតទំនិញនៅក្នុងប្រទេសកម្ពុជា សូមរក្សាភាពស្ងៀមស្ងាត់ ពីព្រោះថា កម្ពុជាមិនមែនមានតែទីផ្សារអាម៉េរិកមួយនោះទេ តែកម្ពុជាមានទីផ្សារនៅបណ្ដាប្រទេសអាស៊ាន កម្ពុជាមានកិច្ចព្រមព្រៀងសេរីទ្វេភាគី កម្ពុជាក៏មានកិច្ចព្រមព្រៀងភាពជាដៃគូគ្រប់ជ្រុងជ្រោយ អាសិប ផងដែរ ។
ពាក់ព័ន្ធនឹងពន្ធបដិការ ៣៦ភាគរយនេះដែរ លោកបណ្ឌិត គី សេរីវឌ្ឍន៍ ប្រធានវិទ្យាស្ថានសិក្សាចិននៃរាជបណ្ឌត្យសភាកម្ពុជា និងជាអ្នកជំនាញសេដ្ឋកិច្ចបានមានប្រសាសន៍ថា ការដាក់ពន្ធ ៣៦ភាគរយពីសហរដ្ឋអាម៉េរិកលើទំនិញនាំចូលពីកម្ពុជា អាចមានបញ្ហាប្រឈមតិចតួច មិនជាលក្ខណៈធ្ងន់ធ្ងរប៉ុន្មានទេ ដោយសារតែប្រទេសជាដៃគូប្រកួតប្រជែងលើការនាំចេញផលិតផលវិស័យកាត់ដេរ គឺប្រទេសបង់ក្លាដេស ក៏មានអត្រាពន្ធគយខ្ពស់ប្រហាក់ប្រហែលនឹងប្រទេសកម្ពុជាដែរ ។
លោកបណ្ឌិតបន្តថា ពន្ធ ៣៦ភាគរយនេះ ជាជំហានដំបូង វានឹងមានផលប៉ះពាល់ ឬមានការប្រែប្រួលតិចតួចដល់ការនាំចេញទំនិញទៅសហរដ្ឋអាម៉េរិក ប៉ុន្តែសម្រាប់រយៈពេលវែង ភាពបត់បែននៃឧស្សាហកម្ម នឹងធ្វើឱ្យកម្ពុជាអាចធានាដល់ការនាំចេញបានខ្ពស់ ៕
Account
Security
Favourite Content