សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ កម្ពុជា-សហរដ្ឋអាមេរិក បាន និងកំពុងខិតខំរួមគ្នា ដើម្បីកំណត់វិស័យសក្តានុពលនៃកិច្ចសហប្រតិបត្តិការ សំដៅពង្រឹងទំនាក់ទំនងរវាងកម្ពុជា និងសហរដ្ឋអាមេរិកឆ្ពោះទៅរកគោលដៅរួម ដែលផ្តល់ប្រយោជន៍ដល់ប្រជាជនទាំងពីរ។ នេះបើតាមសេចក្ដីប្រកាសព័ត៌មានស្ដីពីជំនួបរវាងឯកឧត្តម សុខ ចិន្តាសោភា ឧបនាយករដ្ឋមន្ត្រី រដ្ឋមន្ត្រីការបរទេស និងសហប្រតិបត្តិការអន្តរជាតិ និងឯកឧត្តម W. Patrick Murphy ឯកអគ្គរដ្ឋទូតសហរដ្ឋអាមេរិកប្រចាំកម្ពុជា ដើម្បីពិភាក្សាលើវិស័យសំខាន់ៗ នៃកិច្ចសហប្រតិបត្តិការទ្វភាគីកម្ពុជា-អាមេរិក ។
ក្នុងជំនួបនេះ មានប្រធានបទនានាដូចជា ៖ វិស័យពាណិជ្ជកម្ម និងការវិនិយោគ ទំនាក់ទំនងរវាងប្រជាជន និងប្រជាជន សុខាភិបាល និងសន្តិសុខ ក្នុងក្របខ័ណ្ឌទេ្វភាគី ព្រមទាំងកិច្ចសហប្រតិបត្តិការអន្តរជាតិ ក្នុងក្របខ័ណ្ឌអាស៊ាន និងអង្គការសហប្រជាជាតិ ត្រូវបានលើកយកមកពិភាក្សា។
ក្រសួងការបរទេសបានបញ្ជាក់បន្ថែមទៀតថា ដោយទទួលស្គាល់អំពីវិធីសាស្រ្តផ្សេងគ្នាចំពោះបញ្ហាមួយចំនួន ដែលជារឿងធម្មតានៅក្នុងទំនាក់ទំនងអន្តរជាតិ ភាគីទាំងពីរបានគូសបញ្ជាក់អំពីសារៈសំខាន់នៃការបន្តកិច្ចសន្ទនា និងកិច្ចខិតខំប្រឹងប្រែងរួមគ្នា ដើម្បីកំណត់វិស័យសក្តានុពលនៃកិច្ចសហប្រតិបត្តិការ ព្រមទាំងឆ្ពោះទៅរកគោលដៅរួម ដែលផ្តល់ប្រយោជន៍ដល់ប្រជាជនទាំងពីរ។
អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជាបានបញ្ជាក់ថា ដំណើរបេសកកម្មធុរកិច្ចរបស់ កឧត្តមកត្តិទេសាភិបាលបណ្ឌិត ហ៊ុន ម៉ាណែត ដែលទៅប្រជុំនៅអង្គការសហប្រជាជាតិក្នុងខែកញ្ញានេះ អមដំណើរដោយអ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា និងពាណិជ្ជករធុរកិច្ចកម្ពុជាមួយចំនួនទៀត ដែលសភាពាណិជ្ជកម្ម នឹងមានជំនួបពាណិជ្ជកម្មជាមួយសមាគមធុរកិច្ចរបស់អាមេរិកផងដែរនៅទីក្រុងញូវយ៉ក ដោយរំពឹងថាទំនាក់ទំនងកម្ពុជា និងអាមេរិក នឹងមានភាពល្អប្រសើរថែមទៀតលើផ្នែកពាណិជ្ជករ និងពាណិជ្ជករ (B2B) ។
អ្នកឧកញ៉ា លឹម ហេង បានគូសបញ្ជាក់ថា ដំណើរបេសកកម្មនេះ នឹងបង្កើនទំនាក់ទំនង និងភាពរីកចម្រើនផ្នែកសេដ្ឋកិច្ច រវាងកម្ពុជា និងក្រុមពាណិជ្ជករអាមេរិក ជាពិសេសនឹងជំរុញកំណើនសេដ្ឋកិច្ចកម្ពុជា តាមរយៈក្រុមហ៊ុននានារបស់អាមេរិក ហើយសភាពាណិជ្ជកម្មកម្ពុជានឹងដឹកនាំគណៈប្រតិភូទៅតាំងពិព័រណ៍ពាណិជ្ជកម្មលើកទី១ នៅទីក្រុងឡុងប៊ិច រដ្ឋកាលីហ្វញ៉ាសហរដ្ឋអាមេរិកនៅអំឡុងខែវិច្ឆិកាខាងមុខ។
ជាមួយគ្នានេះអ្នកឧកញ៉ា លឹម ហេង បានឱ្យដឹងដែរថា សភាពាណិជ្ជកម្មកម្ពុជា ក៏បានរៀបចំសិក្ខាសាលាមួយស្តីពីបែបបទ នៃការនាំចេញផលិតផលចំណីអាហារ និងទំនិញទៅកាន់ទីផ្សារសហរដ្ឋអាមេរិក ដើម្បីពិភាក្សាស្វែងយល់ អំពីនីតិវិធីនៃការនាំចេញ ក្នុងគោលដៅជំរុញការនាំចេញ និងពង្រឹងកិច្ចសហប្រតិបត្តិការទ្វភាគីកម្ពុជា-អាមេរិកឱ្យកាន់តែរឹងមាំថែមទៀតពាណិជ្ជកម្ម និងវិនិយោគ។
សូមបញ្ជាក់ថា សហរដ្ឋអាមេរិក គឺជាដៃគូពាណិជ្ជកម្មរបស់កម្ពុជាបន្ទាប់ពីចិន។ នៅក្នុងឆមាសទី១ ឆ្នាំ២០២៣ទំហំពាណិជ្ជកម្មរវាងកម្ពុជា អាមេរិក សម្រេចបានជាង ៤.៣ពាន់លានដុល្លារ ថយចុះ ៩.៦ភាគរយ បើធៀបនឹងរយៈពេលដូចគ្នា កាលពីឆ្នាំ ២០២២ មានចំនួនជាង ៤.៨ពាន់លានដុល្លារ។
តាមរបាយការណ៍អគ្គនាយកដ្ឋានរដ្ឋគយ និងរដ្ឋាករ ចាប់ពីខែមករា- មិថុនា ឆ្នាំ២០២៣ ការនាំចេញរបស់កម្ពុជាទៅអាមេរិក សម្រេចបានជាង ៤.២ពាន់លានដុល្លារ និងនាំចូលមកវិញមានចំនួនជាង ១១៩លានដុល្លារ។
ទន្ទឹមនឹងនេះកម្ពុជាបានខិតខំទាញបានផលប្រយោជន៍ពីពាណិជ្ជកម្មកម្ពុជា-អាមេរិកបានចំណាត់ថ្នាក់ជាប្រទេសទី៤ ដែលនាំចេញទៅទីផ្សារអាមេរិក និងជាប្រទេសចំណាត់ថ្នាក់ទី៣ ដែលទទួលអត្ថប្រយោជន៍ប្រព័ន្ធអនុគ្រោះពាណិជ្ជកម្ម(GSP) ពីសហរដ្ឋអាមេរិក៕
Account
Security
Favourite Content