ភ្នំពេញ ៖ នៅដើមឆ្នាំ២០២៤នេះ ទំហំពាណិជ្ជកម្ពុជា ជាមួយប្រទេសធំៗនៅលើពិភពលោក បានកើនឡើងគួរឱ្យកត់សម្គាល់ ក្នុងនោះចិនជាប្រទេសដៃគូធំបំផុតរបស់កម្ពុជា។

យោងតាមរបាយការណ៍របស់អគ្គនាយកដ្ឋានគយ និងរដ្ឋាករកម្ពុជា បានបង្ហាញថា នៅខែមករា ដើមឆ្នាំ២០២៤ ប្រទេសកម្ពុជា មានទំហំពាណិជ្ជកម្មជាមួយបណ្តាប្រទេសនានាមានការកើនឡើងគួរឱ្យកត់សម្គាល់ ដោយក្នុងនោះរួមមានដូចជា ប្រទេស ចិន វៀតណាម អាមេរិក ជប៉ុន កាណាដា សិង្ហបុរី អេស្ប៉ាញ និងថៃជាដើម។

ប្រភពដដែលបានបញ្ជាក់ថា ពាណិជ្ជកម្មរវាងកម្ពុជា និងចិន មានទំហំធំជាងគេដោយសម្រេចបានប្រមាណ ១,១៥ពាន់លានដុល្លារ នៅក្នុងខែមករា ឆ្នាំ២០២៤ កើនឡើង១៨,៧% បើធៀបនឹងរយៈពេលដូចគ្នាឆ្នាំ២០២៣ មានចំនួនតែជាង ៩៧២លានដុល្លារ។ ក្នុងនោះ សម្រាប់ការនាំចេញរបស់កម្ពុជា ទៅទីផ្សារចិន មានចំនួនជាង១២១លានដុល្លារ និងនាំចូលមកវិញមានចំនួនជាង ១,​០​៣​ពាន់លានដុល្លារអាមេរិក។

បន្ទាប់ពីចិន គឺប្រទេសវៀតណាមមានទំហំពាណិជ្ជកម្មជាមួយកម្ពុជាជាង៦៧៧លានដុល្លារ កើនឡើងប្រមា​ណ ​៤១,៥% បើធៀបនឹងរយៈពេលដូចគ្នាឆ្នាំ ២០២៣ មានចំនួនជាង ៤៧៨លានដុល្លារ។ ក្នុងនោះការនាំចេញរបស់កម្ពុជាទៅវៀតណាម គិតជាទឹកប្រាក់ចំនួនជាង ៣៧៣លានដុល្លារ និងនាំចូលមានចំនួនជាង ៣០៤លានដុល្លារ។

ចំណែកការដោះដូរទំនិញជាមួយអាមេរិក ជាប់ចំណាត់ថ្នាក់ទី៣ គឺមានចំនួនទឹកប្រាក់ប្រមាណជាង ៦៤៤លានដុល្លារ មានការកើនឡើងប្រមាណ ១០,៨%។ ក្នុងនោះការនាំចេញពីកម្ពុជាទៅទីផ្សារអាមេរិក មានចំនួនជាង ៦២៦លានដុល្លារ និងនាំចូលមកវិញមានចំនួនជាង ១៧លានដុល្លារ។

ដោយឡែកការធ្វើពាណិជ្ជកម្មរវាងកម្ពុជា និងជប៉ុន សម្រេចបានប្រមាណជិត ១៦០លានដុល្លារ នៅក្នុងខែមករាកន្លងទៅ ពោលគឺមានការកើនឡើងចំនួនជាង ៨,៩%។ ក្នុងនោះ ការនាំចេញពីកម្ពុជា ទៅជប៉ុន បានចំនួនជាង ១១៦លានដុល្លារ និងនាំចូលមកវិញមានចំនួនជាង ៤២លានដុល្លារអាមេរិក។

ក្រៅពីនេះ មានដូចជាប្រទេសកាណាដា មានទំហំពាណិជ្ជកម្មជាមួយកម្ពុជា ចំនួនជាង ៨៤លានដុល្លារ កើនឡើងជិត ៥៥%, ប្រទេសសិង្ហបុរី មានពាណិជ្ជកម្មជាមួយកម្ពុជា ចំនួនជាង ៨៣លានដុល្លារកើនឡើង ៥២% និងប្រទេសអេស្ប៉ាញមានពាណិជ្ជកម្មជាមួយកម្ពុជា ចំនួនជាង ៧១លានដុល្លារ កើនឡើង ៥១,១% ។

ក្រៅពីនេះ នៅមានប្រទេសជាច្រើនទៀតជាដៃគូពាណិជ្ជកម្មរបសើកម្ពុជាដូចជា៖ អាល្លឺម៉ង់ អង់គ្លេស កូរ៉េខាងត្បូង តៃវ៉ាន់ ហុល្លង់ ម៉ាឡេស៊ី ហុងកុង បារាំង ឥណ្ឌា ប៊ែលហ្ស៊ិក និងអុីតាលី។

របាយការណ៍គយ បានបង្ហាញទៀតថា ពេញមួយខែមករា ឆ្នាំ ២០២៤នេះ ទំហំពាណិជ្ជកម្មកម្ពុជា អន្តរជាតិ សម្រេចបានទឹកប្រាក់សរុបចំនួនជាង ៤ពាន់លានដុល្លារ កើនឡើងចំនួនជិត ១៧% បើធៀបនឹងរយៈពេលដូចគ្នាឆ្នាំ ២០២៣ មានចំនួនជាង ៣,៤៧ពាន់លានដុល្លារប៉ុណ្ណោះ៕