ភ្នំពេញ ៖ ក្នុងគោលបំណងលើកកម្ពស់ចំណេះដឹងផ្នែកហិរញ្ញវត្ថុឱ្យបានកាត់តែទូលំទូលាយ ដេប៉ាតឺម៉ង់ប្រព័ន្ធផ្សព្វផ្សាយ និងសារគមនាគមន៍ នៃសកលវិទ្យាល័យភូមិន្ទភ្នំពេញ បានរៀបចំវេទិកាការីនិពន្ធស្ដីអំពី «តួនាទីរបស់ប្រព័ន្ធផ្សព្វផ្សាយ ក្នុងការរាយការណ៍អំពីអក្ខរកម្មហិរញ្ញវត្ថុ» ដែលជាផ្នែកមួយក្នុងការលើកកម្ពស់ចំណេះដឹងផ្នែក ហិរញ្ញវត្ថុដល់ប្រជាជនកម្ពុជា។

នៅក្នុងអង្គសិក្ខាសាលា ដែលធ្វើឡើងកាលពីថ្ងៃទី ១៧ ខែកញ្ញា ឆ្នាំ២០២៤ នៅសណ្ឋាគារ សាន់វេ ឯកឧត្តម នេត្រ ភក្ក្រា រដ្ឋមន្ត្រីក្រសួងព័ត៌មានបានលើកឡើងថា ចំណេះដឹងផ្នែក​ហិរញ្ញវត្ថុ ពិតជាមានសារៈសំខាន់ណាស់សម្រាប់ការរស់នៅរបស់ប្រជាជន ហើយប្រព័ន្ធផ្សព្វផ្សាយ​កាន់តែ​ដើរតួនាទីយ៉ាងសំខាន់នៅក្នុងការជំរុញរឿងនេះ។

ឯកឧត្តមបានមានប្រសាសន៍បញ្ជាក់ថា៖

«នៅពេលដែលពលរដ្ឋយើងមានចំណេះដឹងហិរញ្ញវត្ថុទូលំទូលាយ យើងអាច​បញ្ចៀសបាននូវបញ្ហាបំណុលលើសលប់ និងចៀសបានពីការធ្លាក់ចូលក្នុងល្បិចឆបោកនានា។»

យ៉ាងណាមិញ ដើម្បីបញ្ជ្រាបចំណេះដឹងនេះទៅដល់ប្រជាជន ប្រព័ន្ធផ្សព្វផ្សាយពិតជាដើរតួនាទីសំខាន់ណាស់សម្រាប់ជួយដល់អ្នកសារព័ត៌មានក្នុងការរាយការណ៍។ នេះបើតាមប្រសាសន៍របស់ ឯកឧត្តម នេត្រ ភក្ក្រា។

ជាមួយគ្នានេះ លោក អ៊ុង ប៊ុនអ៉ី ប្រធានដេប៉ាតឺម៉ង់ប្រព័ន្ធផ្សព្វផ្សាយ និងសារគមនាគមន៍បានឱ្យដឹងថា ដោយមើលឃើញពីសារៈសំខាន់របស់ប្រព័ន្ធផ្សព្វផ្សាយ វេទិកានេះរៀបចំឡើងដើម្បីបំផុសបំផុលចំណាប់អារម្មណ៍របស់ប្រព័ន្ធផ្សព្វផ្សាយទូទៅឱ្យងាកមកបង្កើនការរាយការណ៍ពាក់ព័ន្ធនឹងអក្ខរកម្មហិរញ្ញវត្ថុឱ្យកាន់តែទូលាយ ដើម្បីចូលរួមក្នុងការលើកកម្ពស់ការយល់ដឹងរបស់ប្រជាពលរដ្ឋ ពាក់ព័ន្ធនឹងការសន្សំ ការរៀបចំផែនការហិរញ្ញវត្ថុ និងការវិនិយោគជាដើម។

លោកបន្តសង្កត់ធ្ងន់ដែរថា៖

«ប្រទេសកម្ពុជាក៏កំពុងតែធ្វើដំណើរឈានទៅសម្រេចបាននូវគោលដៅក្លាយជាប្រទេសដែលមានប្រាក់ចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសដែល​មានចំណូលខ្ពស់នៅឆ្នាំ២០៥០ ដូច្នេះហើយការពង្រឹងនូវចំណេះដឹងស្ដីពីការគ្រប់គ្រងហិរញ្ញវត្ថុរបស់ប្រជាជនកម្ពុជា គឺពិតជារឿងដែលចាំបាច់»។

ឯកឧត្តម ប៊ូ ច័ន្ទភីរូ អគ្គនាយកនៃនិយ័តករធានារ៉ាប់រងកម្ពុជា ក៏បានលើកឡើងអំពីសេវាកម្មធានា រ៉ាប់រង ដែលជាផ្នែកមួយនៃការការពារហិរញ្ញវត្ថុក្នុងគ្រួសារផងដែរ។

ឯកឧត្តម បានបន្តឱ្យដឹងថា ៖

«សរសរស្ដម្ភ៣របស់វិស័យហិរញ្ញវត្ថុរួមមាន ធនាគារ ធានារ៉ាប់រង វិស័យមូលបត្រ។ ក្នុងនោះ វិស័យធានារ៉ាប់រងក៏ជាឧបករណ៍មួយដែលប្រជាជនអាចប្រើប្រាស់ដើម្បីសន្សំរយៈពេលយូរ ក៏ដូចជាការពារនូវហានិភ័យនានាដែលអាចកើតឡើង»។

យ៉ាងណាមិញ នៅក្នុងឱកាសដដែលនេះ ដេប៉ាតឺម៉ង់ប្រព័ន្ធផ្សព្វផ្សាយក៏បានប្រកាសអំពីការប្រកួតមាតិកាពហុមេឌាក្រោមប្រធានបទ «ពង្រឹងការសន្សំសម្រាប់ក្រុមគ្រួសារកម្ពុជា» ផងដែរ ដែលការប្រកួតនេះមានរយៈពេលមួយខែសម្រាប់ឱ្យអ្នកសារព័ត៌មាន និងអ្នកផលិតមាតិកា យកស្នាដៃផលិតមាតិការបស់ខ្លួនពាក់ព័ន្ធនឹងអក្ខរកម្មហិរញ្ញវត្ថុដាក់ចូលរួមប្រកួត។

ទាក់ទិននឹងការប្រកួតប្រជែងនេះផងដែរ ឯកឧត្តម នេត្រ ភក្ក្រា ក៏បានលើកទឹកចិត្តឱ្យអ្នកសារព័ត៌មាន អ្នកផលិតមាតិកាសង្គម និងសាធារណជន ចូលរួមដាក់ស្នាដៃរបស់ខ្លួនក្នុងការប្រកួតប្រជែងនេះឱ្យបានច្រើន ដោយបង្ហាញពីឬសគល់នៃបញ្ហា ផ្សារភ្ជាប់ជាមួយនូវដំណោះស្រាយ ដើម្បីជាប្រយោជន៍ដល់ប្រជាជនកម្ពុជាជារួម។

គួរបញ្ជាក់ថា ការរៀបចំវេទិកាការីនិពន្ធនេះគឺជាផ្នែកមួយនៃកិច្ចសហការរវាងដេប៉ាតឺម៉ង់ប្រព័ន្ធផ្សព្វ​ផ្សាយ និងសារគមនាគមន៍ នៃសកលវិទ្យាល័យភូមិន្ទភ្នំពេញ ជាមួយនឹងក្រុមហ៊ុនធានារ៉ាប់រង FWD Cambodia ក្នុងការលើកកម្ពស់អក្ខរកម្មហិរញ្ញវត្ថុនៅប្រទេសកម្ពុជា តាមរយៈប្រព័ន្ធផ្សព្វផ្សាយ៕