ភ្នំពេញ ៖ វិស័យសំណង់ និងឧស្សាហកម្មយានយន្តរបស់កម្ពុជាកំពុងតែក្លាយជាចំណុចស្នូលដ៏គួរឱ្យចាប់អារម្មណ៍តាមរយៈពិព័រណ៍អន្តរជាតិសំខាន់ពីរគឺ CAMBUILD 2025 និង CAMAUTO 2025 ដែលត្រូវបានសម្ពោធជាផ្លូវការនាព្រឹកថ្ងៃទី១៤ ខែតុលា នៅមជ្ឈមណ្ឌលសន្និបាត និងពិព័រណ៍កោះពេជ្រ ។ ការនេះបង្ហាញឱ្យឃើញពីជំហានដ៏សំខាន់ក្នុងការអភិវឌ្ឍវិស័យឧស្សាហកម្មសំណង់ និងបច្ចេកវិទ្យាថ្មីៗរបស់ព្រះរាជាណាចក្រកម្ពុជា។

ពិធីបើកសម្ពោធពិព័រណ៍នេះបានប្រព្រឹត្តទៅក្រោមវត្តមាន ឯកឧត្ដម ឡៅ ទិព្វសីហា រដ្ឋលេខាធិការនៃក្រសួងរៀបចំដែនដី នគរូបនីយកម្ម និងសំណង់ ព្រមទាំងមានការចូលរួមពីថ្នាក់ដឹកនាំវិស័យឧស្សាហកម្មផ្សេងទៀតដូចជា លោក Edmund Lee នាយកអភិវឌ្ឍន៍អាជីវកម្មនៅកម្ពុជា និង ឯកឧត្ដម បណ្ឌិត តាន់ មុនីវណ្ណ ប្រធានសហព័ន្ធឧស្សាហកម្មយានយន្តកម្ពុជា។

ពិព័រណ៍ CAMBUILD លើកទី១៤ ជាវេទិកាពិព័រណ៍ដ៏សំខាន់ និងលេចធ្លោសម្រាប់បច្ចេកវិទ្យានៃឧស្សាហកម្មសំណង់នៅកម្ពុជាដោយបានក្លាយជាមជ្ឍមណ្ឌលភ្ជាប់ទំនាក់ទំនងរវាងអ្នកផ្គត់ផ្គង់បច្ចេកវិទ្យាអន្តរជា​តិ និងអ្នកជំនាញឧស្សាហកម្មក្នុងស្រុក ដើម្បីជំរុញការអភិវឌ្ឍហេដ្ឋារចនាសម្ព័ន្ធនៅក្នុងព្រះរាជាណាចក្រកម្ពុជា។ នៅឆ្នាំនេះ ពិព័រណ៍ CAMBUILD មានអ្នកតាំងបង្ហាញផលិតផលប្រមាណជាង ១០០ ក្រុមហ៊ុន មកពីជាង ១៥ ប្រទេស ដែលនាំមកនូវសម្ភារៈសំណង់សម័យថ្មី បច្ចេកវិទ្យាសំណង់ទំនើប និងប្រព័ន្ធមេកានិច-អគ្គិសនី (M&E)ដែលមានសុវត្ថិភាពខ្ពស់។

ក្នុងពេលជាមួយគ្នានេះដែរ CAMAUTO 2025 កំពុងតែបង្ហាញពីសក្ដានុពលនៃការរីកចម្រើនឥតឈប់ឈរនៃឧស្សាហកម្មយានយន្តនៅកម្ពុជា ដោយមានការតាំងបង្ហាញពីផ្នែកអាគុយ គ្រឿងបន្លាស់ សម្ភារៈជួសជុល ឧបករណ៍ឧស្សាហកម្ម និងដំណោះស្រាយយានយន្តថ្មីៗ។ពិព័រណ៍ទាំងពីរនេះត្រូវបានរំពឹងថានឹងទាក់ទាញអ្នកជំនាញឧស្សាហកម្មច្រើនជាង ៦,០០០នាក់ រួមមានអ្នកសាងសង់ អភិវឌ្ឍន៍អគារ វិស្វករ ជំនាញយានយន្ត និងអ្នកវិនិយោគជាដើម។-ល-។

លោក Edmund Lee នាយកអភិវឌ្ឍន៍អាជីវកម្មនៅកម្ពុជា បានមានប្រសាសន៍ថា៖

«ការរៀបចំពិព័រណ៍ទាំងពីរនៅទីតាំងតែមួយនេះ ជាការបង្ហាញនូវសក្តានុពល និងការរួមបញ្ចូលគ្នាដែលមានភាពស៊ីសង្វាក់គ្នារវាងឧស្សាហកម្មសំណង់ស្តង់ដារពិភពលោក និងឧស្សាហកម្មយានយន្ត ដែលជាគ្រឿងផ្សំមួយដ៏សំខាន់ក្នុងការបង្កើតសហគមន៍ដែលអាចរស់នៅបាននិងមាននិរន្តរភាព»។

ឯកឧត្ដម បណ្ឌិត តាន់ មុនីវណ្ណ ប្រធានសហព័ន្ធឧស្សាហកម្មយានយន្តកម្ពុជា បានមានប្រសាសន៍ថា៖

«ពិព័រណ៍នេះ បង្ហាញពីការរីកចម្រើននៃឧស្សាហកម្មយានយន្ត ខណៈរាជរដ្ឋាភិបាលបានលើកទឹកចិត្ត និងគាំទ្រលើការ​វិនិ​យោ​គ ការដំឡើងរោងចក្ររថយន្តថ្មីៗ ដើម្បីប្រែក្លាយកម្ពុជាទៅជាទីតាំងកណ្តាលមួយនៃការផលិតនិងផ្គត់ផ្គង់គ្រឿងបង្គុំនិងគ្រឿងបន្លាស់រថយន្តសម្រាប់ប្រទេសសមាជិកអាស៊ាន»។

ឯកឧត្ដម ឡៅ ទិព្វសីហា រដ្ឋលេខាធិការនៃក្រសួងរៀបចំដែនដី នគរូបនីយកម្ម និងសំណង់ បានមានប្រសាស​ន៍ថា៖

«ពិព័រណ៍ទាំងពីរនេះនឹងក្លាយជាស្ពានភ្ជាប់ទំនាក់ទំនងដ៏សំខាន់រវាងព្រះរាជាណាចក្រកម្ពុជា និងសហគមន៍អន្តរជាតិ ដែលនាំមកនូវបច្ចេកវិទ្យា ឯកទេស និងដំណោះស្រាយទំនើបៗ ដែលនឹងស្ថាបនាអនាគតរបស់វិស័យសំណង់ ឧស្សាហកម្មនិងយានយន្តនៅកម្ពុជា។វាមិនត្រឹមតែជាឱកាសអាជីវកម្មប៉ុណ្ណោះទេ តែវាជាវិថីនៃការអភិវឌ្ឍន៍ដែលមាននិរន្តរភាព និងឯករាជនៃបច្ចេកវិទ្យារបស់ប្រទេសជាតិផងដែរ»។

ឯកឧត្តមបានបន្ថែមថា៖ វេទិកានេះបានផ្តល់នូវកាលានុវត្តភាព និងជាកម្លាំងចលករថ្មីមួយថែមទៀតក្នុងការជំរុញការអភិវឌ្ឍ វិស័យសំណង់ ដីធ្លី និងលំនៅឋាន និងវិស័យយានយន្តនៅកម្ពុជាឱ្យកាន់តែល្អប្រសើរឡើងនិងជាសញ្ញាមួយនៃការទាក់ទាញនិងកៀរគរអ្នកវិនិយោគទុនក្នុងស្រុក និងក្រៅស្រុកក្នុងការមកធ្វើការបណ្តាក់ទុនវិនិយោគលើវិស័យសំណង់ ដីធ្លី និងលំនៅឋាន និងវិស័យយានយន្តនៅកម្ពុជា។

ឯកឧត្តមរដ្ឋលេខាធិការបានលើកឡើងថា៖ ការរៀបចំវេទិការនេះគឺជាឱកាសដ៏សម្បើមសម្រាប់អ្នកវិជ្ជាជីវៈ និងអ្នកបច្ចេកទេសក្នុងវិស័យសំណង់ និងយានយន្ត សហគ្រាសឯកជន គ្រឹះស្ថានបណ្តុះបណ្តាលវិជ្ជាជីវៈ អ្នកអភិវឌ្ឍន៍ អ្នកសិក្សាស្រាវជ្រាវ អ្នកពិសោធន៍ និងម្ចាស់សហគ្រាស អ្នកប្រើប្រាស់ និងអ្នកពាក់ព័ន្ធផ្សេងទៀត។វេទិកានេះក៏ជាឱកាសដ៏មានតម្លៃសម្រាប់ការផ្លាស់ប្តូរបទពិសោធន៍ ការទទួលបានចំណេះដឹងថ្មីៗ និងការស្វែងយល់ អំពីសម្ភារៈ បរិក្ខារ និងបច្ចេកវិទ្យាទំនើបសម្រាប់ការងារសំណង់ ការជួសជុល និងការដំណោះស្រាយបច្ចេកទេសនានា ជាពិសេស ផ្តោតលើការបង្ហាញចំណេះដឹងទាក់ទងនឹងការផ្តុំនិងដំឡើងរថយន្ត ទោចក្រយានយន្ត និងត្រីចក្រយានយន្ត ដែលជាផ្នែកសំខាន់មួយនៃការអភិវឌ្ឍឧស្សាហកម្មយានយន្តទំនើបនៅកម្ពុជា។ លើសពីនេះ វេទិកានេះក៏ជាកន្លែងសម្រាប់ បង្កើតបណ្តាញសហការណ៍និងទំនាក់ទំនង និងការចែករំលែកចំណេះដឹងនិងបច្ចេកវិទ្យាថ្មីៗនៃវិស័យទាំងពីររវាងក្រុម ហ៊ុន និងអ្នកជំនាញជាតិ និងអន្តរជាតិ ដែលមកពីប្រទេសនានាក្នុងតំបន់ និងទូទាំងពិភពលោកផងដែរ។

ព្រឹត្តិការណ៍ពិព័រណ៍នេះទទួលបានការគាំទ្រ និងចូលរួមដ៏ខ្លាំងពីសំណាក់អន្តរជាតិ ដែលក្នុងនោះមានប្រទេសវៀតណាម ចិន ម៉ាឡេស៊ី អ៊ីតាលី និងកូរ៉េត្បូង ដែលសម្លឹងឃើញពីសារៈសំខាន់ និងឱកាសកាន់តែខ្ពស់នៅទីផ្សារប្រទេសកម្ពុជា ក្នុងខ្សែសង្វាក់ផ្គត់ផ្គង់ក្នុងស្រុក និងជាទីផ្សារដ៏មានសក្ដានុពលសម្រាប់ដំណោះស្រាយឧស្សាហកម្មសម័យថ្មីនៅទូទាំងតំបន់អាស៊ីអាគ្នេយ៍។

ក្រៅពីការតាំងពិព័រណ៍ នៅក្នុងកម្មវិធីក៏មានវេទិកាបង្ហាញពីជំនាញបច្ចេកទេសដែលផ្តល់ចំណេះដឹងសំខាន់ៗដូចជា៖ នីរន្តភាពនៃសំណង់ អគារ (Green Building Certification), ការរចនាប្រព័ន្ធថាមពលដោយប្រសិទ្ធិភាព, បច្ចេកវិទ្យាសំណង់ឌីជីថល, ផែនទីនគរូបនីយកម្មនិរន្តរភាព និងអនាគតរបស់ «Smart Mobility»។ ក្រុមភ្ញៀវកិត្តិយស VIP និងគណៈប្រតិភូស្ថាប័ននានា នឹងត្រូវបានភ្ជាប់ទំនាក់ទំនងជាមួយអ្នកតាំងបង្ហាញ ដើម្បីបង្កើតឱកាសចូលរួមកាន់តែស្និតស្នាល និងពិសេសក្នុងការវិនិយោគ និងសហការនាពេលអនាគត។

ពិព័រណ៍ CAMBUILD 2025 និង CAMAUTO 2025 ត្រូវបានគាំទ្រជាផ្លូវការដោយ ក្រសួងពាណិជ្ជកម្ម និងទទួលបានការគាំទ្រដោយ ក្រសួងរៀបចំដែនដី នគរូបនីយកម្ម និងសំណង់, ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ព្រមទាំងក្រុមប្រឹក្សាវិស្វករកម្ពុជា ក្រុមប្រឹក្សាស្ថាបត្យករកម្ពុជា និងសមាគមអាស៊ានសម្រាប់វិស្វកម្ម និងបច្ចេកវិទ្យា។ ដៃគូយុទ្ធសាស្ត្រសំខាន់ៗរួមមាន សមាគមអ្នកវិនិយោគសំណង់ និងស្ថាបត្យករកម្ពុជា (CICAA) និងសមាគមអ្នកផ្គត់ផ្គង់ទឹកស្អាតកម្ពុជា និងសហព័ន្ធឧស្សាហកម្មយានយន្តកម្ពុជា ជាដៃគូរជាផ្លូវការ។

ពិព័រណ៍នឹងបើកចាប់ពី ថ្ងៃទី ១៤ ដល់ថ្ងៃទី ១៦ ខែតុលា ឆ្នាំ២០២៥ នៅ មជ្ឈមណ្ឌលសន្និបាត និងពិព័រណ៍កោះពេជ្រ (DIECC), រាជធានីភ្នំពេញ។ បើករៀងរាល់ថ្ងៃ ពីម៉ោង ១០:០០ ព្រឹក ដល់ ៦:០០ ល្ងាច៕