សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ សាជីវកម្មហិរញ្ញវត្ថុអន្តរជាតិ (IFC) សហការជាមួយសមាគមធនាគារនៅកម្ពុជា (ABC) ដើម្បីបង្កើនសមត្ថភាពរបស់គ្រឹះស្ថានហិរញ្ញវត្ថុក្នុងស្រុកអំពីហិរញ្ញប្បទានអាកាសធាតុ ជាពិសេសគឺដើម្បីជួយដោះស្រាយផលប៉ះពាល់នៃការប្រែប្រួលអាកាសធាតុ និងដើម្បីលើកកម្ពស់ប្រព័ន្ធអេកូឡូស៊ីហិរញ្ញវត្ថុប្រកបដោយចីរភាព។
យោងតាមរបាយការណ៍របស់ធនាគារពិភពលោក និងសាជីវកម្មហិរញ្ញវត្ថុអន្តរជាតិ ស្តីពីស្ថានភាពអាកាសធាតុ និងការអភិវឌ្ឍរបស់ប្រទេសកម្ពុជា (Cambodia Country Climate and Development Report ហៅកាត់ថា CCDR) ប្រទេសកម្ពុជានឹងត្រូវការវិនិយោគបន្ថែមចំនួន ៣៦ ពាន់លានដុល្លារពីវិស័យឯកជន និងពីវិស័យសាធារណៈរវាងឆ្នាំ២០២៣ និង ២០៥០ ដើម្បីសម្រេចបាននូវគោលដៅអាកាសធាតុស្តីពីអព្យាក្រឹតភាពកាបូននៅឆ្នាំ២០៥០។
ជាមួយគ្នានេះ ដើម្បីដោះស្រាយតម្រូវការបញ្ចេញដើមទុនសម្រាប់គម្រោងដែលមិនមានផលប៉ះពាល់អាកាសធាតុ កម្មវិធីបណ្តុះបណ្តាលត្រូវបានរៀបចំឡើងនៅថ្ងៃទី១៧ ខែតុលា ឆ្នាំ២០២៤ កន្លងទៅនេះ ដើម្បីផ្តល់ចំណេះដឹង និងឧបករណ៍ដល់បុគ្គលិកធនាគារជាង ១០០នាក់ដែលពួកគេត្រូវការ ដើម្បីជំរុញគំនិតផ្តួចផ្តើមស្តីពីហិរញ្ញប្បទានប្រកបដោយចីរភាព។ កម្មវិធីបណ្តុះបណ្តាលនេះគឺជាផ្នែកមួយនៃកិច្ចសហប្រតិបត្តិការទូលំទូលាយរវាង IFC និងធនាគារជាតិនៃកម្ពុជា (NBC) ដើម្បីជំរុញសន្ទុះហិរញ្ញប្បទានបៃតង តាមរយៈការអភិវឌ្ឍន៍ទីផ្សារមូលធននៅកម្ពុជា។
ដោយមានការសម្របសម្រួលពីសំណាក់អ្នកជំនាញរបស់ IFC និងភាគីពាក់ព័ន្ធសំខាន់ៗនៃធនាគារជាតិនៃកម្ពុជា និងនិយ័តករមូលបត្រកម្ពុជា វគ្គបណ្តុះបណ្តាលបានគ្របដណ្តប់លើប្រធានបទជាច្រើន ដោយផ្តើមពីប្រព័ន្ធវត្តិករសាស្ត្រសម្រាប់ហិរញ្ញប្បទានប្រកបដោយចីរភាព និងប្រព័ន្ធគ្រប់គ្រងបរិស្ថាន-សង្គម ដែលកំពុងប្រព្រឹត្តទៅរហូតដល់និន្នាការថ្មីៗ និងឱកាសនៅក្នុងហិរញ្ញប្បទានប្រកបដោយចីរភាព។
លោកស្រី តូហ្វីក្វា ហូក (Towfiqua Hoque) ប្រធានសាជីវកម្មហិរញ្ញវត្ថុអន្តរជាតិដែលទើបតែងតាំងថ្មីប្រចាំនៅកម្ពុជា បានមានប្រសាសន៍ថា សារៈសំខាន់នៃហិរញ្ញប្បទានប្រកបដោយចីរភាពមិនអាចត្រូវបានបរិយាយឲ្យអស់សេចក្តីបានឡើយ។ វាមិនគ្រាន់តែជាការគ្រប់គ្រងហានិភ័យដែលទាក់ទងនឹងការប្រែប្រួលអាកាសធាតុប៉ុណ្ណោះទេ ប៉ុន្តែក៏ជាការចាប់យកឱកាសដែលមកជាមួយនឹងការផ្លាស់ប្តូរបៃតងផងដែរ។ តាមរយៈការរួមបញ្ចូលនូវការពិចារណាផ្នែកបរិស្ថាន សង្គម និងអភិបាលកិច្ចទៅក្នុងប្រព័ន្ធហិរញ្ញវត្ថុ អាចបង្កើតសេដ្ឋកិច្ច ដែលមានភាពធន់ និងមានបរិយាប័ន្នកាន់តែខ្លាំង។
ក្នុងតួនាទីថ្មីរបស់លោកស្រី ហូក នឹងដឹកនាំគំនិតផ្តួចផ្តើមរបស់ IFC ដើម្បីជំរុញវិស័យហិរញ្ញវត្ថុរបស់ប្រទេសកម្ពុជា ជំរុញថាមពលកកើតឡើងវិញ លើកកម្ពស់ហេដ្ឋារចនាសម្ព័ន្ធដឹកជញ្ជូន និងភស្តុភារបៃតង និងពង្រីកហិរញ្ញប្បទានអាកាសធាតុ។ បច្ចុប្បន្ននេះ មានកត្តាជាច្រើនដែលរារាំងសក្តានុពលហិរញ្ញប្បទានបៃតងរបស់កម្ពុជា រួមមានកង្វះការណែនាំអំពីអ្វីដែលមានលក្ខណៈគ្រប់គ្រាន់ជាហិរញ្ញប្បទានបៃតង និងគោលនយោបាយបៃតងមានកម្រិតក្នុងចំណោមស្ថាប័នហិរញ្ញវត្ថុក្នុងស្រុក ដើម្បីជំរុញការច្នៃប្រឌិត ការណែនាំ និងការអនុវត្ត ហិរញ្ញប្បទានប្រកបដោយចីរភាព។
លោក ឌិត សុចល សមាជិកក្រុមប្រឹក្សា និងជាប្រធានគណៈកម្មាធិការហិរញ្ញប្បទានប្រកបដោយចីរភាពរបស់ ABC បាននិយាយថា ប្រទេសកម្ពុជាកំពុងស្ថិតក្នុងដំណាក់កាលមួយដ៏សំខាន់ដែលផលប៉ះពាល់នៃការប្រែប្រួលអាកាសធាតុកាន់តែបង្ហាញឱ្យឃើញច្បាស់ ហើយមានតម្រូវការបន្ទាន់ក្នុងការកសាងសមត្ថភាព និងជំនាញក្នុងវិស័យហិរញ្ញវត្ថុ ដើម្បីគ្រប់គ្រង និងលើកកម្ពស់គំនិតផ្តួចផ្តើមស្តីពីហិរញ្ញប្បទានបៃតងប្រកបដោយប្រសិទ្ធភាព។
CCDR បានប៉ាន់ប្រមាណថា ដោយសារប្រទេសកម្ពុជាងាយរងគ្រោះដោយទឹកជំនន់ គ្រោះរាំងស្ងួត និងការឡើងកម្ពស់កម្រិតទឹកសមុទ្រ ប្រសិនបើគ្មានវិធានការបន្សំ និងកាត់បន្ថយត្រឹមត្រូវ ការប្រែប្រួលអាកាសធាតុអាចធ្វើឲ្យខាតបង់រហូតដល់ ៩ ភាគរយនៃផលិតផលក្នុងស្រុកសរុបរបស់កម្ពុជាត្រឹមឆ្នាំ២០៥០។ ថ្មីៗនេះ ក្រុមធនាគារពិភពលោកបានអនុមត័ក្របខ័ណ្ឌភាពជាដៃគូប្រចាំប្រទេសសម្រាប់កម្ពុជា ដែលសង្កត់ធ្ងន់លើការលើកកម្ពស់ធនធានមនុស្សរបស់ប្រទេសជាតិ ដើម្បីបង្កើនភាពប្រកួតប្រជែង និងជំរុញភាពធន់៕
Account
Security
Favourite Content