ភ្នំពេញ ៖ ចាប់តាំងពីរាជរដ្ឋាភិបាល​បានប្រកាស​ឱ្យ​អនុវត្ត​កម្មវិធី​ពិសេស​ជំរុញការ​វិនិយោគតាមបណ្តាខេត្តប៉ែកភូមិ​ភាគឦសាន​ឃើញថា អ្នកវិនិយោគជាតិ និងអន្តរជាតិមានការ​ចាប់អារម្មណ៍ និងបានដាក់ទុនវិនិយោគជា​បន្ត​បន្ទាប់ ជាក់ស្ដែង​តាមរយៈកម្មវិធីពិសេស​ជំរុញការ​វិនិយោគនេះដែរ មានគម្រោង​ចំនួន៣ ដែលមានទុនសរុបរហូតដល់២៥០​លានដុល្លារអាម៉េរិក​ កំពុងសិក្សា​លើ​ការ​វិនិយោគ​ក្នុងតំបន់ភូមិ​ភាគឦសាន ។

ក្រុមការងារជំរុញការវិនិយោគក្នុងភូមិភាគឦសាន (ក.វ.ឦសាន) កាលពីថ្ងៃទី១៣ ខែតុលា ឆ្នាំ ២០២៥ បានរៀបចំកិច្ចប្រជុំបច្ចេកទេស ដើម្បីពិភាក្សាលើយន្តការ និងនីតិវិធីបច្ចេកទេសក្នុងការអនុវត្តគម្រោងចំនួន៣​ មានទីតាំងនៅក្នុង​ខេត្តក្រចេះ និង​ខេត្ត​រតនគិរី ដែលអាចបង្កើតឱកាសការងារបានប្រមាណ ១២ ០០០ កន្លែង ។

នាថ្ងៃទី ១៣ ខែ តុលា ឆ្នាំ ២០២៥ នៅទីស្តីការក្រសួងសេដ្ឋកិច្ច និងហិរញ្ញវត្ថុ ឯកឧត្តមបណ្ឌិតសភាចារ្យ ហ៊ាន សាហ៊ីប ទីប្រឹក្សាសម្តេចធិបតីនាយករដ្ឋមន្រ្តី រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និង ជាប្រធានក្រុមការងារជំរុញការវិនិយោគក្នុងភូមិភាគឦសាន (ក.វ.ឦសាន) បានដឹកនាំកិច្ចប្រជុំបច្ចេកទេស ដើម្បីពិភាក្សាលើយន្តការ និងនីតិវិធីបច្ចេកទេសក្នុងការអនុវត្តគម្រោងវិនិយោគកសិកម្ម និងកសិ-ឧស្សាហកម្ម ចំនួន ៣ ក្នុងខេត្តក្រចេះ និងខេត្តរតនគិរី ។

នៅក្នុងកិច្ចប្រជុំនេះ​ ឯកឧត្តមបណ្ឌិតសភាចារ្យ ហ៊ាន​ សាហ៊ីប បានមានប្រសាសន៍ថា គម្រោង​វិនិយោគទាំង​៣ ដែល​គ្រោងនឹង​ដាក់ទុនវិនិយោគនៅភូមិភាគឦសានទាំងនេះ ផ្ដោតលើ​វិស័យ​កសិកម្ម និង​កសិ-ឧស្សាហកម្ម ។

ឯកឧត្តមបានបញ្ជាក់ថា ការ​វិនិយោគ​នេះ បានចូលរួមចំណែកយ៉ាងសំខាន់ក្នុងវិស័យកសិកម្ម និងកសិ-ឧស្សាហកម្ម ក្នុងការអភិវឌ្ឍភូមិភាគឦសាន ដែលជាប្រភពកំណើនសេដ្ឋកិច្ចប្រកបដោយសក្តានុពលខ្ពស់ តាមរយៈការលើកកម្ពស់ផលិតភាព និងការកែច្នៃផលិតផលកសិកម្ម ដែលអាចជួយបង្កើនការនាំចេញរបស់កម្ពុជា និងទាក់ទាញការវិនិយោគបន្ថែមទៀត ។

ក្រុមការងារ បានពិនិត្យពិភាក្សាយ៉ាងល្អិតល្អន់លើគ្រប់ទិដ្ឋភាព ជាពិសេស ពាក់ព័ន្ធនឹងការស្នើគម្រោងវិនិយោគ និងអនុលោមភាពជាមួយនឹងបទដ្ឋានគតិយុត្តរបស់កម្ពុជា ដែលមានជាធរមានក្នុងគោលដៅសម្របសម្រួល និងជំរុញសកម្មភាពវិនិយោគផង ទន្ទឹមនឹងកិច្ចការពារ និងបង្កើនអត្ថប្រយោជន៍ជូនសង្គម-សេដ្ឋកិច្ចកម្ពុជា ជារួមផង ។

ឯកឧត្តម វ៉ា ថន អភិបាលខេត្ត​ក្រចេះ បានមានប្រសាសន៍តាមទូរសព្ទ​ជាមួយ​អ្នកយក​ព័ត៌មាន​ AMS Economy ឱ្យដឹងថា រយៈពេល​ចុងក្រោយនេះ ឃើញថា​ខេត្ត​ក្រចេះទទួលបានការ​វិនិយោគជា​បន្ត​បន្ទាប់​ទាំងគម្រោង​វិនិយោគ​ថ្មីៗ និងគម្រោង​វិនិយោគចាស់ដែល​បានចុះបញ្ជី​រួច​ហើយតែផ្អាកសកម្មភាព ដោយបានស្នើសុំ​ការលើកទឹកចិត្ត​បន្ថែម​ពីរាជរដ្ឋាភិបាល​ក្នុង​ពេល​រាជរដ្ឋាផ្ដល់ការ​លើកទឺកចិត្ត​ដល់អ្នកវិនិយោគ​ក្នុងកម្មវិធី​ពិសេស​ជំរុញការ​វិនិយោគ ។

ឯកឧត្តមបានមានប្រសាសន៍បន្តថា ជាការកត់សម្គាល់​មានគម្រោង​វិនិយោគធំចំនួន​ពីរ នៅក្នុង​ខេត្តក្រចេះរួមមានគម្រោង​វិនិយោគ​បង្កើត​រោងចក្រ​ផលិត​ស៊ីម៉ង់ត៍ និងគម្រោង​វិនិយោគ​លើ​ការ​ដាំដុះឈើ​កែច្នៃ ហើយក៏មានគម្រោង​ផ្សេងៗទៀត​នៅក្នុង​ខេត្ត​ស្នើ​សុំ​ការលើកទឹកចិត្តពីរដ្ឋ​​ ដើម្បីពង្រីកផលិតកម្មបន្ថែម​ ។

គួរ​រម្លឹកថា​ ខេត្តទាំងបួន​នៅភូមិភាគឦសាន រួមមាន ខេត្តក្រចេះ ស្ទឹងត្រែង មណ្ឌល​គិរី និង​រតនគិរី ជា​ខេត្ត​ដែលមានសក្ដានុពលទាក់ទាញមួយសម្រាប់ការ​វិនិយោគ ដូចជាការកសិកម្ម កសិ-ឧស្សាហកម្ម រ៉ែ ថាមពល ទេសចរណ៍ និងឧស្សាហកម្មជាដើម ៕