ភ្នំពេញ ៖ យោងតាមរបាយការណ៍របស់សមាគមស្វាយចន្ទីកម្ពុជាបានឱ្យដឹងថា រយៈពេល ១២ខែឆ្នាំ​២០២៣កន្លងទៅនេះ ការនាំចេញគ្រាប់ឆៅ សម្រេចបាន ៦៥ ៦០០០តោន ថយចុះ ៧.៦% ​និងទទួលបានទឹកប្រាក់ប្រមាណ៨៣៧លានដុល្លារ ថយចុះ ១៦.៩% បើធៀបនឹងរយៈពេលដូចគ្នា កាលពីឆ្នាំ២០២២២។

ដោយឡែក កន្លងមក​​ទិន្នផល​គ្រាប់ស្វាយចន្ទី​ឆៅជាង​ ៩០​% ​ត្រូវបាន​ឈ្មួញ​នាំ​យកទៅលក់​ឱ្យ​ប្រទេសជិតខាង​ដើម្បី​កែច្នៃ​ជា​ផលិតផល​សម្រេច​ ខណៈដែលការកែច្នៃក្នុងស្រុកគឺនៅមានកម្រិត​នៅឡើយ។ ការនាំ​ចេញ​គ្រាប់ស្វាយចន្ទីដែល​មិនទាន់​កែច្នៃនេះហើយធ្វើឱ្យ​កម្ពុជា​ខាត​ចំណូល​សេដ្ឋកិច្ច​ជាច្រើន​លាន​ដុល្លារ​ក្នុង ​១ ឆ្នាំៗ​។

ដោយមើលឃើញពីបញ្ហានេះ រាជរដ្ឋាភិបាលកម្ពុជា ព្រមទាំងភាគីពាក់ព័ន្ធកំពុងតែខិតខំជំរុញការកែច្នៃនៅក្នុងស្រុកបន្ថែមទៀត។ ក្នុងនោះ រដ្ឋាភិបាលក៏បានចេញនូវគោល​នយោបាយ​ជាតិ​ស្វាយចន្ទី ដើម្បីជាជំនួយស្មារតីដល់អ្នកកែច្នៃក្នុងស្រុកផងដែរ។ ប៉ុន្តែយ៉ាងណា នៅមានបញ្ហាប្រឈមធំៗមួយចំនួនដែលរារាំងនូវការកែច្នៃក្នុងស្រុក ហើយមួយក្នុងចំណោមនោះ គឺការខ្វះខាតទុនសម្រាប់បង្វិល។ នេះបើតាមការឱ្យដឹងពីលោក អួន ស៊ីឡុត ប្រធា​ន​សមាគមស្វាយចន្ទីកម្ពុជា។

លោក អួន ស៊ីឡុត បានគូសបញ្ជាក់ទៀតថា៖

«ការកែច្នៃគឺសំខាន់ណាស់នៅលើទុនបង្វិល ព្រោះអ្នកកែច្នៃគាត់ត្រូវមានទុនសម្រាប់ទិញគ្រាប់ស្វាយចន្ទីទុក នៅពេលធ្លាក់ថ្លៃ ហើយកន្លងមក អ្នកកែច្នៃច្រើនតែជួបបញ្ហានេះឯង»។

ប្រធានសមាគមរូបនេះបានបន្តដែរថា កន្លងមកសមាគមបានសហការជាមួយធនាគារ SME និងធនាគារកសិកម្ម ដើម្បីស្វែងរកទុនជូនអ្នកកែច្នៃ ប៉ុន្តែយ៉ាងណាលក្ខខណ្ឌក្នុងការផ្ដល់កម្ចី ហាក់នៅមានភាពស្មុគស្មាញ ដែលអ្នកកែច្នៃពិបាកក្នុងការទទួលកម្ចី។ ជាក់ស្ដែង កម្ចីកសិកម្មប្រមាណ ១០០លានដុល្លារដែលធនាគារ SME ផ្ដល់ឱ្យ គិតមកដល់ពេល ក្រុមអ្នកកែច្នៃនៅក្នុងសមាគមស្វាយចន្ទីមានលទ្ធភាពយកកម្ចីបានប្រមាណជាជាង ៣លានដុល្លារប៉ុណ្ណោះ។

ក្រៅពីបញ្ហានេះ លោកក៏បានលើកឡើងពីបញ្ហាផ្សេងទៀតគឺ កង្វះកម្មករជំនាញ និងកង្វះខាតនូវទំនើបកម្មគ្រឿងយន្ដ។ សម្រាប់បញ្ហាទាំងពីរនេះ លោកបានគូសបញ្ជាក់ថា ជាបញ្ហាប្រទាក់ក្រឡាគ្នា។

ប្រទាក់ក្រឡាគ្នាព្រោះកាលណាសិប្បកម្មកែច្នៃមិនមានដើមទុនក្នុងការធ្វើអាជីវកម្ម ភាគរយ​ច្រើនដែលអាជីវកម្មនោះនឹងត្រូវបិទទ្វារ ឬកាត់បន្ថយទំហំនៃការកែច្នៃ។ ដូច្នេះហើយ វាក៏នឹងបន្តប៉ះ​ពាល់ដល់កម្មករផងដែរ។

ជាដំណោះស្រាយ ប្រធានសមាគមរូបនេះបានសំណូមពរឱ្យរដ្ឋាភិបាលជួយបន្ធូរបន្ធយលើលក្ខខណ្ឌ​ផ្ដល់កម្ចីរបស់ធនាគារ ព្រមទាំងរបាំងពន្ធពាណិជ្ជកម្មសម្រាប់អ្នកកែច្នៃនាំចេញ។ ក្រៅពីនោះ លោករំពឹងថា គោលនយោបាយពង្រាយមន្ត្រីកសិកម្មតាមឃុំរបស់ក្រសួងកសិកម្ម នឹងក្លាយជា​ចំណែកដ៏ធំមួយក្នុងការជំរុញទឹកចិត្តប្រជាកសិករឱ្យងាកមកបង្កើនការដាំដុះដំណាំស្វាយ​ចន្ទីឡើង​វិញ។ សម្រាប់គុណភាពវិញ លោកបានអះអាងថា សមាគមកំពុងតែធ្វើការជាមួយសហគ្រាសកែច្នៃធំៗ ក្នុងការពង្រឹងចំណេះដឹងទៅលើស្តង់ដារគុណភាពផងដែរ។

គួរបញ្ជាក់ថា ដំណាំស្វាយចន្ទីត្រូវបានដាំដុះភាគច្រើនក្នុងខេត្តចំនួន១០ ក្នុងទំហំជាង ៦៥ម៉ឺនហិកតា ដែលមាននៅខេត្តកំពង់ធំ រតនគិរី កំពង់ចាម មណ្ឌលគិរី ត្បូងឃ្មុំ ស្ទឹងត្រែង សៀមរាប ក្រចេះ កំពង់ឆ្នាំង និងព្រះវិហារ៕