សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងតាមប្រភពព័ត៌មានពី CNA បានរាយការណ៍ថា ចិននឹងផ្តល់សេចក្តីសម្រេចយុត្តិធម៌មួយក្រោយពីស៊ើបអង្កេតលើការនាំចូលសាច់គោ ដែលនឹងអាចដាក់ពន្ធនាំចូលខ្ពស់ ឬកំណត់កម្រិតការនាំចូល ប្រសិនបើខ្លួនរកឃើញថាអ្នកផលិតក្នុងស្រុករងហានិភ័យ។
ស្របពេលដែលចិនគឺជាអ្នកប្រើប្រាស់ និងអ្នកនាំចូលសាច់គោដ៏ធំបំផុតរបស់ពិភពលោក ប្រទេសនេះបានបើកការស៊ើបអង្កេតលើការនាំចូលសាច់គោចំពេលមានជម្លោះពាណិជ្ជកម្មជាមួយប្រធានាធិបតីអាម៉េរិក Donald Trump ពាក់ព័ន្ធនឹងពន្ធគយ។ ទន្ទឹមនឹងនេះ ការត្រួតពិនិត្យរបស់ប្រទេសចិនគ្របដណ្តប់លើសាច់គោនាំចូលទាំងអស់ជាជាងពីប្រទេសជាក់លាក់ណាមួយ ដោយសារតម្រូវការកាន់តែច្រើន និងកង្វះការផ្គត់ផ្គង់ក្នុងស្រុកបានប៉ះពាល់ដល់ទីផ្សារសាច់គោរបស់ចិន។ កាលពីថ្ងៃច័ន្ទ ក្រសួងពាណិជ្ជកម្មចិនបាននិយាយនៅក្នុងសេចក្តីថ្លែងការណ៍មួយថា នៅក្នុងសវនការនៃការស៊ើបអង្កេត ខ្លួនបានប្រមូលផ្តុំអ្នកតំណាងប្រហែល ១៨០ នាក់ដែលជាមន្ត្រីតំណាងអ្នកផ្គត់ផ្គង់ធំៗរួមមាន អាហ្សង់ទីន អូស្ត្រាលី ប្រេស៊ីល អ៊ុយរូហ្គាយ និងសហរដ្ឋអាម៉េរិកជាដើម។ បន្ថែមពីនេះ អ្នកនាំចេញ អ្នកនាំចូល សមាគមពាណិជ្ជកម្ម និងអ្នកផលិតសាច់គោក្នុងស្រុកក៏បានចូលរួមផងដែរ។
មិនត្រឹមតែប៉ុណ្ណោះ ជំហានបន្ទាប់នៃការស៊ើបអង្កេតរបស់ទីក្រុងប៉េកាំងអាចនឹងបញ្ជូនមន្ត្រីចិនទៅកាន់បណ្តាប្រទេសដែលកំពុងនៅក្រោមការស៊ើបអង្កេតនៅខែឧសភាខាងមុខនេះ។ ការព្រួយបារម្ភរបស់ឧស្សាហកម្មនេះកាន់តែតានតឹង បន្ទាប់ពីគយចិនបានផ្អាកការនាំចូលសាច់គោពីក្រុមហ៊ុនចំនួន ៦ នៅមកពីប្រទេសអាហ្សង់ទីន ប្រេស៊ីល និងអ៊ុយរូហ្គាយកាលពីខែមុន។ លើសពីនេះ រោងចក្រប្រេស៊ីលចំនួន ៣ ត្រូវបានរងផលប៉ះពាល់ដោយការហាមឃាត់បណ្តោះអាសន្ន រួមទាំងរោងចក្រមួយដំណើរការដោយក្រុមហ៊ុនសាច់ដ៏ធំបំផុតរបស់ពិភពលោក JBS ផងដែរ។ គួរឲ្យបញ្ជាក់ដែរថា ការស៊ើបអង្កេតសាច់គោបានចាប់ផ្តើមតាំងពីថ្ងៃទី ២៧ ខែធ្នូ ដែលនឹងមានរយៈពេលប្រាំបីខែ ប៉ុន្តែគេមើលឃើញថា រយៈពេលនៃការការស៊ើបអង្កេតអាចនឹងបន្តបន្ថែមទៀត។
យោងតាមទិន្នន័យគយចិនបានឲ្យដឹងថា ចិនបាននាំចូលសាច់គោចំនួន ២,៨៧ លានតោនក្នុងឆ្នាំ ២០២៤ ហើយខ្លួនកំពុងព្រួយបារម្ភថា ការរឹតបន្តឹងពាណិជ្ជកម្មអាចប៉ះពាល់ដល់អ្នកផ្គត់ផ្គង់ឈានមុខគេ។ ជាក់ស្តែង ប្រេស៊ីលគឺជាប្រទេសនាំចេញសាច់គោដ៏ធំបំផុតរបស់ពិភពលោក និងបានលក់សាច់គោប្រមាណជា ១,៣ លានតោនទៅប្រទេសចិនកាលពីឆ្នាំមុន។ អូស្ត្រាលី ប្រេស៊ីល អ៊ុយរូហ្គាយ និងអាម៉េរិក គឺអ្នកផ្គត់ផ្គង់សាច់គោសំខាន់ៗរបស់ចិន។ ទន្ទឹមនឹងនេះ ក្រសួងកសិកម្មសហរដ្ឋអាម៉េរិកប្តេជ្ញាថានឹងធ្វើការជាមួយរដ្ឋបាលគយរបស់ប្រទេសចិន ដើម្បីធានាថាអ្នកផលិតសាច់គោអាមេរិកអាចបន្តចូលទៅកាន់ទីផ្សារប្រទេសចិន។ យ៉ាងណាមិញ សាច់គោរបស់អាមេរិកជាប់ពន្ធនាំចូល ១០ ភាគរយរួចហើយ ដែលជាផ្នែកមួយនៃពន្ធសងសឹករបស់ចិនលើទំនិញកសិកម្មអាមេរិក៕
Account
Security
Favourite Content