សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
កម្ពុជា និងចិន បានឈានដល់សមិទ្ធផលថ្មីមួយក្នុងកិច្ចសហប្រតិបត្តិការហិរញ្ញវត្ថុ និងហេដ្ឋារចនាសម្ព័ន្ធ បន្ទាប់ពីធនាគារ China Exim Bank និងក្រុមហ៊ុនហ្វូណនតេជោ ខូសថល-អ៊ីនឡេន វ័រធើវេយ ឯ.ក ចុះហត្ថលេខាលើកិច្ចព្រមព្រៀងហិរញ្ញប្បទានមានតម្លៃជិត ១ ពាន់លានដុល្លារ សម្រាប់គម្រោងគ្រប់គ្រងធនធានទឹកចម្រុះហ្វូណនតេជោ។
ពិធីចុះហត្ថលេខានេះធ្វើឡើងនាព្រឹកថ្ងៃទី៩ ខែកញ្ញា ឆ្នាំ២០២៦ ក្នុងព្រឹត្តិការណ៍សហប្រតិបត្តិការវិនិយោគអន្តរជាតិ ក្រោមប្រធានបទ «ប្រាជ្ញាសកល, ការពង្រឹងកម្លាំងរួមគ្នាលើការវិនិយោគអន្តរជាតិ និងការផ្លាស់ប្តូរកិច្ចសហប្រតិបត្តិការ» (Global Wisdom, Mutual Empowerment: International Investment & Cooperation Exchange) ដោយមាន ឯកឧត្តម ស៊ុន ចាន់ថុល ឧបនាយករដ្ឋមន្ត្រី និងអនុប្រធានទី១ ក្រុមប្រឹក្សាអភិវឌ្ឍន៍កម្ពុជា (ក.អ.ក.) អញ្ជើញចូលរួមជាសក្ខីភាពដ៏ខ្ពង់ខ្ពស់។
ពិធីនេះមានការចូលរួមពីតំណាងក្រសួងសេដ្ឋកិច្ច និងហិរញ្ញវត្ថុ តំណាងក្រុមហ៊ុនហ្វូណនតេជោ ខូសថល-អ៊ីនឡេន វ័រធើវេយ ឯ.ក ព្រមទាំងឥស្សរជនជាន់ខ្ពស់ និងថ្នាក់ដឹកនាំធុរកិច្ចអន្តរជាតិជាច្រើនរូប។
ក្នុងឱកាសនោះ ឯកឧត្តម ស៊ុន ចាន់ថុល បានសម្តែងអំណរគុណយ៉ាងជ្រាលជ្រៅចំពោះថ្នាក់ដឹកនាំ និងរដ្ឋាភិបាលកម្ពុជា-ចិន ធនាគារ China Exim Bank គណៈកម្មាធិការជាតិអភិវឌ្ឍន៍ និងកំណែទម្រង់ចិន (NDRC) និងទីភ្នាក់ងារសហប្រតិបត្តិការអភិវឌ្ឍន៍អន្តរជាតិចិន (CIDCA) ព្រមទាំងគ្រប់ភាគីពាក់ព័ន្ធ ដែលបានផ្តល់កិច្ចសហការយ៉ាងស្មោះស្ម័គ្រ និងជិតស្និទ្ធ រហូតសម្រេចបាននូវសមិទ្ធផលដ៏សំខាន់នេះ។
ឯកឧត្តមបានគូសបញ្ជាក់ថា គម្រោងគ្រប់គ្រងធនធានទឹកចម្រុះហ្វូណនតេជោ គឺជា «តួអង្គផ្លាស់ប្តូរមុខមាត់កម្ពុជា» (Game Changer) ដែលមិនត្រឹមតែបង្កើតផ្លូវទឹកភ្ជាប់ទៅកាន់សមុទ្រ ដើម្បីកាត់បន្ថយថ្លៃដើមដឹកជញ្ជូន និងលើកកម្ពស់សមត្ថភាពប្រកួតប្រជែងក្នុងវិស័យភស្តុភារកម្មប៉ុណ្ណោះទេ ប៉ុន្តែថែមទាំងជាការបង្កើត «របៀងសេដ្ឋកិច្ចថ្មី» និងជាសរសៃឈាមសេដ្ឋកិច្ចដ៏រស់រវើកសម្រាប់កម្ពុជា។
តាមរយៈគម្រោងនេះ ឯកឧត្តមបានលើកឡើងថា តំបន់ឧស្សាហកម្ម មជ្ឈមណ្ឌលភស្តុភារកម្ម ការកែច្នៃកសិផល ការអភិវឌ្ឍក្រុងរណប និងវិស័យទេសចរណ៍ នឹងរីកចម្រើនយ៉ាងខ្លាំងក្លាតាមបណ្តោយផ្លូវទឹកនេះក្នុងទសវត្សរ៍ខាងមុខ។
គម្រោងនេះក៏ត្រូវបានដាក់ក្នុងចក្ខុវិស័យអភិវឌ្ឍ «របៀងសេដ្ឋកិច្ច» នៅតាមបណ្តោយគម្រោង និងការតភ្ជាប់ទៅនឹងបណ្តាញហេដ្ឋារចនាសម្ព័ន្ធពាក់ព័ន្ធ ដើម្បីពង្រឹងសមត្ថភាពប្រកួតប្រជែងផ្នែកដឹកជញ្ជូន និងភស្តុភារកម្មរបស់កម្ពុជា។
ជាកិច្ចបញ្ចប់ ឯកឧត្តម ស៊ុន ចាន់ថុល បានលើកឡើងពីសុភាសិតចិនមួយឃ្លាថា «កាលណាប្រជាជនមានចិត្តគំនិតតែមួយ សូម្បីតែភ្នំតៃសានក៏អាចរំកិលបានដែរ» ដោយសង្កត់ធ្ងន់ថា កិច្ចសហប្រតិបត្តិការ និងការរួបរួមគ្នាជាធ្លុងមួយ គឺជាកម្លាំងសំខាន់ក្នុងការសម្រេចគោលដៅធំៗប្រកបដោយប្រសិទ្ធភាព។
ឯកឧត្តមក៏បានអំពាវនាវដល់ថ្នាក់ដឹកនាំធុរកិច្ចអន្តរជាតិឱ្យអញ្ជើញមកកាន់កម្ពុជា ដើម្បីសម្លឹងមើលឱកាសវិនិយោគ និងរីកចម្រើនជាមួយកម្ពុជា ខណៈកម្ពុជាបានត្រៀមខ្លួនរួចជាស្រេចក្នុងការស្វាគមន៍ សម្របសម្រួល និងធ្វើការរួមគ្នា ដើម្បីសម្រេចបាននូវភាពជោគជ័យប្រកបដោយចីរភាព ព្រមទាំងប្រែក្លាយការតភ្ជាប់ទៅជាកាលានុវត្តភាព និងការវិនិយោគទៅជាការលូតលាស់រួមគ្នា៕
Account
Security
Favourite Content