សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្នុងត្រីមាសទី២ ឆ្នាំ២០២៦នេះ អាជីវកម្មរបស់កំពង់ផែស្វយ័តក្រុងព្រះសីហនុ នៅតែមានភាពប្រសើរទោះបីជាមានផលរំខានពីកត្តាខាងក្រៅមួយចំនួនក្តី ជាក់ស្ដែង ប្រាក់ចំណូលរបស់កំពង់ផែស្វយ័តក្រុងព្រះសីហនុ ក្នុងត្រីមាសទី២ឆ្នាំនេះ សម្រេចបានចំនួនជាង ២០០ពាន់លានរៀល ឬប្រមាណជាង ៥០លានដុល្លារអាម៉េរិក ។ នេះបើតាមរបាយការណ៍របស់កំពង់ផែស្វយ័តក្រុងព្រះសីហនុចេញផ្សាយប្រចាំត្រីមាស ។
យោងតាមរបាយការណ៍ដដែលនេះបានឱ្យដឹងថា បរិមាណកុងតឺន័រឆ្លងកាត់កំពង់ផែស្វយ័តក្រុងព្រះសីហនុនៅក្នុងត្រីមាសទី២ ឆ្នាំ ២០២៦ មានចំនួនជាង ៤២០ពាន់ TEUs កើនឡើង ៣២,៦៤ភាគរយ ធ្វើឱ្យចំណូលពីអាជីវកម្មសរុបមានចំនួនជាង ២០០លានរៀល ឬប្រមាណជាង ៥០លានដុល្លារអាម៉េរិកកើនឡើង ៣៦,២១ភាគរយ ។ សម្រាប់ប្រាក់ចំណេញសុទ្ធក្រោយបង់ពន្ធរួច មានចំនួនជាង៥៦ពាន់លានរៀល ឬស្មើប្រមាណ ១៤លានដុល្លារអាម៉េរិក កើនឡើងប្រមាណ ២១៧,៨៥ភាគរយ ធៀបនឹងត្រីមាសទី២ ឆ្នាំ២០២៥ ។
របាយការណ៍នេះក៏បានបង្ហាញថា នៅក្នុងត្រីមាសទី២នេះដែរ ចំនួននាវាឆ្លងកាត់កំពង់ផែស្វយ័តក្រុងព្រះសីហនុ មានចំនួន ៤៩២គ្រឿង កើនឡើង ៨,៣៧ភាគរយ និងចំណុះផ្ទុកនាវាមានចំនួន ៧,៩៧លានតោន កើនឡើង២៩,៤៤ភាគរយ ។ ស្ថិតិនេះបង្ហាញឱ្យឃើញពីនិន្នាការនាវាចូលចតផែកាន់តែមានទំហំធំ ជម្រៅទឹក ធ្វើឱ្យថ្លៃដឹកជញ្ជូនសមុទ្រកាន់តែមានភាពប្រកួតប្រជែង និងភាពទាក់ទាញនៃការវិនិយោគផ្សេង ។
ឯកឧត្តម លូ គឹមឈន់ ប្រតិភូរាជរដ្ឋាភិបាលកម្ពុជា ទទួលបន្ទុកជាប្រធានអគ្គនាយកនៃកំពង់ផែស្វយ័តក្រុងព្រះសីហនុ បានថ្លែងថា ជាមោទនភាព និងកិត្តិយសដ៏ធំធេង ទោះបីស្ថិតនៅក្នុងកាលៈទេសៈប្រតិបត្តិការមានការមមាញឹកខ្លាំង និងលើសពីសមត្ថភាព កំពង់ផែស្វយ័តក្រុងព្រះសីហនុ សម្រេចបានកំណើនបរិមាណកុងតឺន៍រឆ្លតកាត់ខ្ពស់កាលពីឆ្នាំមុន និងបន្តកើនឡើងសម្រាប់ឆមាសទី១ឆ្នាំ ២០២៦នេះ ។
ឯកឧត្តមមានប្រសាសន៍បន្តថា កំពង់ផែស្វយ័តក្រុងព្រះសីហនុ មានមោទនភាពដែលបានដើរតួនាទីជាច្រកទ្វារនាំទំនិញចេញ-ចូល ជួយជំរុញកំណើនសេដ្ឋកិច្ចជាតិ និងកំពុងអភិវឌ្ឍខ្លួនស្របតាមចក្ខុវិស័យ និងគម្រោងអភិវឌ្ឍន៍ផែនការមេ ដើម្បីប្រែក្លាយកំពង់ផែស្វយ័តក្រុងព្រះសីហនុ ទៅជាកំពង់ផែតំបន់ និងមជ្ឈមណ្ឌលឡូជីស្ទិក ជាទស្សនវិស័យដ៏ឈ្លាសវៃបំផុតរបស់រាជរដ្ឋាភិបាលកម្ពុជា និងគាំទ្រដោយរាជរដ្ឋាភិបាល ។
ឯកឧត្តមបន្ថែមថា ៖
«ដើម្បីសម្រេចបាននូវទស្សនវិស័យនេះ ក៏ដូចជាចូលរួមជាមួយរាជរដ្ឋាភិបាលកម្ពុជា ឆ្ពោះទៅសម្រេចចក្ខុវិស័យកម្ពុជាឆ្នាំ២០៥០ ក្លាយជាប្រទេសមានចំណូលខ្ពស់ កំពង់ផែស្វយ័តក្រុងព្រះសីហនុ ប្ដេជ្ញាលើកកម្ពស់គុណភាពសេវាកម្ម ដោយបង្កើនការប្រើប្រាស់បរិវត្តកម្មឌីជីថល និងជំរុញការតភ្ជាប់ ដើម្បីប្រែក្លាយទៅជាច្រកទ្វារដ៏ចម្បងសម្រាប់ពាណិជ្ជកម្មអន្តរជាតិ និងទាក់ទាញវិនិយោគិននៅកម្ពុជា»។
លោកឧកញ៉ា ស៊ិន ចន្ធី អនុប្រធានសមាគមភស្តុភារកម្មកម្ពុជា បានមានប្រសាសន៍ថា កំពង់ផែក្រុងព្រះសីហនុ ជាកំពង់ផែទឹកជ្រៅតែមួយគត់របស់កម្ពុជា ហើយបច្ចុប្បន្ននេះ ការធ្វើពាណិជ្ជកម្មអន្តរជាតិតាមផ្លូវទឹកត្រូវពឹងផ្អែកស្ទើរទាំងស្រុងលើកំពង់ផែស្វយ័តក្រុងព្រះសីហនុ ។
លោកឧកញ៉ាបន្តថា ចាប់តាំងពីកម្ពុជាមានបញ្ហាជាមួយប្រទេសថៃ ហើយឈានដល់ការបិទព្រំដែន រាល់ទំនិញចាំបាច់ដែលត្រូវនាំចូលពីថៃ ត្រូវដឹកជញ្ជូនតាមផ្លូវទឹក ។ មិនត្រឹមតែប៉ុណ្ណោះទេ នៅពេលមានសង្គ្រាមនៅតំបន់មជ្ឈិមបូព៌ា បានធ្វើឱ្យទំនិញឆ្លងកាត់កំពង់ផែក្រុងព្រះសីហនុមានភាពមមាញឹកជាងសព្វដង រហូតដល់ទំនិញខ្លះត្រូវកកស្ទះជាច្រើនថ្ងៃទៀតផង ប៉ុន្តែមកដល់ពេលនេះ ហាក់បានធូរស្រាលបន្តិចឡើងវិញហើយ ៕
Account
Security
Favourite Content