បរទេស៖ យោងតាមប្រភពព័ត៌មានពី BBC បានរាយការណ៍ថា កំណើនសេដ្ឋកិច្ចចិនបានកើនឡើងក្នុងល្បឿនយឺតបំផុតនៅក្នុងត្រីមាសទី ៣ ខណៈដែលរដ្ឋាភិបាលកំពុងព្យាយាមជំរុញសេដ្ឋកិច្ចដែលនៅជាប់គាំង ជាពិសេសគោលនយោបាយក្នុងការជួយស្រោចស្រង់វិស័យអចលនទ្រព្យដែលធ្លាក់ចុះយ៉ាងធ្ងន់ធ្ងរ។

យោងតាមការិយាល័យស្ថិតិជាតិរបស់ប្រទេសចិន បានឲ្យដឹងថា ផលិតផលក្នុងស្រុកសរុប (GDP) សម្រាប់ត្រីមាសទី៣បានកើនឡើង ៤,៦ ភាគរយគិតចាប់ពីខែកក្កដា ដល់ចុងខែកញ្ញា។ តួរលេខនេះតិចជាងត្រីមាសទី២ ប្រមាណ ៤,៧ ភាគរយ និងទាបជាងគោលដៅរបស់រដ្ឋាភិបាល ៥ ភាគរយសម្រាប់ឆ្នាំនេះ។ កំណើនបានកើនឡើងក្នុងល្បឿនយឺតក្រោមគោលដៅ ៥ ភាគរយដែលកាន់តែធ្វើឱ្យរដ្ឋាភិបាលមានការព្រួយបារម្ភ។ យ៉ាងណាមិញ តួលេខផ្លូវការផ្សេងទៀតរួមមាន ការលក់រាយ និងទិន្នផលរោងចក្របានកើនឡើងខ្ពស់ជាងការព្យាករណ៍។

លោក Eswar Prasad អតីតប្រធានផ្នែកហិរញ្ញវត្ថុរបស់មូលនិធិរូបិយវត្ថុអន្តរជាតិ (IMF) បានលើកឡើងថា គោលដៅកំណើនរបស់រដ្ឋាភិបាលសម្រាប់ឆ្នាំនេះហាក់ដូចជាស្ថិតក្នុងស្ថានភាពគ្រោះថ្នាក់យ៉ាងធ្ងន់ធ្ងរ ហើយចិនចាំបាច់ត្រូវជំរុញខ្លាំងខ្លាបន្ថែមទៀត ដើម្បីជំរុញកំណើនសេដ្ឋកិច្ចនៅក្នុងត្រីមាសទី ៤ ឈានដល់គោលដៅ។ លើសពីនេះ តួលេខផ្លូវការបានបង្ហាញថា តម្លៃផ្ទះថ្មីបានធ្លាក់ចុះយ៉ាងច្រើនកាលពីខែកញ្ញា ដែលបង្ហាញថា ទីផ្សារនៃវិស័យអចលនទ្រព្យកាន់តែមានស្ថានភាពអាក្រក់ទៅៗ។

កាលពីពេលថ្មីៗនេះ ធនាគារកណ្តាលរបស់ប្រទេសចិន (PBOC) បានរៀបចំកិច្ចប្រជុំមួយដើម្បីអំពាវនាវឱ្យធនាគារ និងស្ថាប័នហិរញ្ញវត្ថុផ្សេងទៀតជំរុញការផ្តល់ប្រាក់កម្ចីឲ្យបានលឿន ដើម្បីជួយគាំទ្រដល់កំណើនេសដ្ឋកិច្ច និងវិស័យអចលនទ្រព្យ។ ផែនការនេះក៏រួមបញ្ចូលជំនួយសម្រាប់ទីផ្សារភាគហ៊ុន និងវិធានការលើកទឹកចិត្តធនាគារឱ្យផ្តល់ប្រាក់កម្ចីបន្ថែមទៀតដល់អាជីវកម្ម និងបុគ្គលផងដែរ។ ជាការកត់សម្គាល់ ចាប់តាំងពីពេលនោះមក ក្រសួងហិរញ្ញវត្ថុ និងស្ថាប័នរដ្ឋាភិបាលផ្សេងទៀតបានបង្ហាញពីផែនការផ្សេងៗបន្ថែមទៀតក្នុងគោលបំណងជំរុញកំណើនសេដ្ឋកិច្ច។

គួរឲ្យបញ្ជាក់ដែរថា ចិន ដែលជាមហាអំណាចសេដ្ឋកិច្ចធំទី២របស់ពិភពលោកកំពុងរងនូវបញ្ហាប្រឈមជាច្រើន រួមមាន វិបត្តិអចលនទ្រព្យ កំណើនសេដ្ឋកិច្ចនៅទ្រឹង ការធ្លាក់ចុះនៃទំនុកចិត្តអតិថិជន និងអាជីវកម្ម។ សេដ្ឋកិច្ច ចិនបានជាប់គាំងដោយសារកំណើនមិនស្មើគ្នានៅក្នុងឆ្នាំនេះជាមួយនឹងសង្វាក់ផលិតកម្មឧស្សាហកម្មលើសពីការប្រើប្រាស់ក្នុងស្រុក បង្ករជាហានិភ័យនៃបរិត្តផរណាដែលបណ្តាលមកពីការធ្លាក់ចុះនៃអចលនទ្រព្យ និងការកើនឡើងបំណុលរបស់រដ្ឋបាលក្នុងតំបន់៕