សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ស្ពានខ្ពស់ជាងគេនៅកម្ពុជា ដែលស្ថិតនៅតាមបណ្ដោយផ្លូវជាតិលេខ ១០ តភ្ជាប់ពីខេត្តបាត់ដំបងពោធិ៍សាត់ និងកោះកុង ចាប់ផ្ដើមសាងសង់នៅអំឡុងខែកុម្ភៈ ឆ្នាំ ២០២៣ កន្លងទៅនេះ ដោយប្រើប្រាស់រយៈពេលសាងសង់ ២៨ ខែ ហើយបើតាមផែនការស្ពានខ្ពស់ជាងគេនេះនឹងត្រូវបញ្ចប់ការសាងសង់នៅអំឡុងខែឧសភា ឆ្នាំ ២០២៥ ខាងមុខ។ នេះបើតាមសេចក្ដីប្រកាសព័ត៌មានរបស់ក្រសួងសាធារណការនិងដឹកជញ្ជូន នៅព្រឹកថ្ងៃទី ១១ ខែមេសា ២០២៣។
បើតាមក្រសួងសាធារណការនិងដឹកជញ្ជូនថា ស្ពានខ្ពស់ជាងគេនេះ សាងសង់ឡើងនៅក្នុងភូមិ ឆាយលូក ឃុំអូរសោម ស្រុកវាលវែង ខេត្តពោធិ៍សាត់ ត្រង់គីឡូម៉ែត្រលេខ១២៨+៩១៥ នៃគម្រោងផ្លូវជាតិលេខ ១០ ដោយចំណាយថវិកាសាងសង់អស់ចំនួន ២២,៩២ លានដុល្លារអាមេរិក។ ស្ពាននេះមានកម្ពស់ ៩០ ម៉ែត្រប្រវែង ៥៣០ ម៉ែត្រ ទទឹង ១០ ម៉ែត្រ ដែលមានបន្ទុក Design Load ចំនួន ៥៥ តោន។
បើតាមឯកឧត្តម ស៊ុន ចាន់ថុល រដ្ឋមន្ត្រីក្រសួងសាធារណកា រនិងដឹកជញ្ជូន បានថ្លែងនាពេលកន្លងមកថា គម្រោងសាងសង់ផ្លូវជាតិលេខ ១០ បានជួបបញ្ហាយឺតយ៉ាវបន្តិចបន្តួច ដោយសារតែយើងត្រូវសង់ស្ពានខ្ពស់ជាងគេនៅលើស្ទឹង និងជ្រោះជ្រៅៗ ដូច្នេះយើងត្រូវការប្រើប្រាស់ពេលវេលាបន្តិច។
ឯកឧត្តមបានថ្លែងថា នៅលើផ្លូវជាតិលេខ ១០ នេះ បើសិនជាយើងមិនសង់ស្ពានទេ យើងត្រូវធ្វើផ្លូវវាង ឬក៏ត្រូវកាត់ជ្រោះនិងត្រូវកាត់ដើមឈើចោល ដូច្នេះហើយ ដើម្បីចូលរួមក្នុងការអភិរក្សព្រៃឈើផង យើងក៏សម្រេចសាងសង់ស្ពានលើជ្រោះ និងស្ទឹងដែលមានកំពស់រហូតដល់ ៩០ ម៉ែត្រ និងបានក្លាយជាស្ពានដែលខ្ពស់ជាងគេនៅកម្ពុជាតែម្ដង។
គម្រោងផ្លូវជាតិលេខ ១០ នេះ នឹងក្លាយជាផ្លូវដឹកជញ្ជូនដ៏សំខាន់ សម្រាប់ប្រជាពលរដ្ឋនៅខេត្តពោធិ៍សាត់ បាត់ដំបង និងកោះកុង ដែលកន្លងមកអ្នកនៅខេត្តបាត់ដំបងទៅកោះកុងត្រូវធ្វើដំណើរមកភ្នំពេញទើបឆ្លងទៅកោះកុង តែនៅពេលផ្លូវនេះរួចរាល់ ការធ្វើដំណើររបស់បងប្អូនពលរដ្ឋនៅតាមបន្ទាត់ព្រំដែនកម្ពុជាថៃ គឺអាចធ្វើដំណើរតាមផ្លូវនេះ បានលឿនរហ័ស និងចំណេញពេលានិងថវិកាផងដែរ។
ក្រៅពីស្ពានខ្ពស់ជាងគេនៅកម្ពុជា រដ្ឋាភិបាលក៏គ្រោងនឹងសាងសង់ស្ពានវែងជាងគេនៅកម្ពុជា ដែលស្ថិតនៅខេត្តកំពង់ឆ្នាំង ស្របនឹងការសាងសង់កំពង់ផែក្នុងខេត្តមួយនេះផងដែរ។ លើសពីនេះ ក៏មានគម្រោងផ្លូវជាច្រើនខ្សែទៀតត្រូវបានដាក់ក្នុងផែនការអភិវឌ្ឍន៍របស់រាជរដ្ឋាភិបាលនិងរង់ចាំពេលវេលា និងរកថវិកាបាន រាជរដ្ឋាភិបាលនឹងបើកការដ្ឋានសាងសង់ផ្លូវទាំងនោះជាបន្តបន្ទាប់៕
Account
Security
Favourite Content