កំពង់ចាម ៖ ឯកឧត្តម វ៉ាង វិនធៀន ឯកអគ្គរដ្ឋទូតចិនប្រចាំនៅកម្ពុជា បានថ្លែងនូវការកោតសរសើរចំពោះការដឹកនាំរបស់សម្តេចតេជោ ហ៊ុន សែន ដែលបានធ្វើឱ្យកម្ពុជាមានកំណើនសេដ្ឋកិច្ចល្អប្រសើរ ដោយគ្រប់គ្រងលើជំងឺឆ្លងកូវីដ-១៩ បានលឿន ជាពិសេសបានលើកកិត្តិយសរបស់កម្ពុជាឱ្យល្បីរន្ទឺលើឆាកអន្តរជាតិ។ ការថ្លែងរបស់ឯក​អគ្គរដ្ឋទូតចិនប្រចាំនៅកម្ពុជាធ្វើឡើងក្នុងឱកាសអញ្ជើញចូលរួមជាមួយសម្តេចតេជោ ហ៊ុន សែន បើកការដ្ឋានពង្រីកកំណាត់ផ្លូវជាតិពីស្គន់ទៅក្រុងកំពង់ចាមនៅព្រឹកថ្ងៃទី០៩ ខែមករា ឆ្នាំ២០២៣។

ឯកឧត្តម វ៉ាង វិនធៀន បានអបអរសាទរចំពោះបងប្អូនប្រជាពលរដ្ឋនៅខេត្តកំពង់ចាមក៏ដូចជាអបអរសាទរចំពោះកម្ពុជាដែលទទួលបានសមិទ្ធផលហេដ្ឋារចនាសម្ព័ន្ធថ្មីៗជាបន្តបន្ទាប់ ខណៈដែលរដ្ឋាភិបាលចិននៅតែបន្តជួយដល់កម្ពុជាជាបន្តបន្ទាប់ទៀតទៅលើការអភិវឌ្ឍន៍ហេដ្ឋារចនាសម្ព័ន្ធនៅកម្ពុជា និងវិស័យផ្សេងៗជាច្រើន​ទៀតទៅតាមលទ្ធភាពដែលអាចជួយទៅបាន តាមរយៈកិច្ចសហប្រតិបត្តិការដ៏ល្អរវាងប្រទេសទាំងពីរ។ 

ឯកឧត្តម វ៉ាង វិនធៀន បានលើកឡើងថា សេដ្ឋកិច្ចកម្ពុជាទទួលបានផលប្រយោជន៍ច្រើនពីយុទ្ធសាស្ត្រចតុកោណរបស់រាជរដ្ឋាភិបាល ដែលដឹកនាំដោយគណបក្សប្រជាជនកម្ពុជា ដោយសេដ្ឋកិច្ចកម្ពុជា រក្សាបាននូវអត្រាកំណើនខ្ពស់ ក្នុងរយៈពេលជាច្រើនឆ្នាំជាប់ៗគ្នា។ ទោះបីជារងផលប៉ះពាល់ពីជំងឺកូវីដ-១៩ក៏ដោយ អត្រាកំណើនសេដ្ឋកិច្ចរបស់កម្ពុជា ត្រូវបានរំពឹងថានឹងឈានដល់ ៥.៥ភាគរយ ក្នុងឆ្នាំ២០២២ ដែលជាប់ចំណាត់ថ្នាក់មុខគេលើពិភពលោក។

ឯកឧត្តមបានលើកឡើងដែរថា ភាពជោគជ័យនៃការគ្រប់គ្រងជំងឺកូវីដ-១៩ អាស្រ័យដោយការដាក់ចេញនូវគោលនយោបាយប្រយុទ្ធប្រឆាំងនឹងជំងឺកូវីដ១៩ របស់សម្តេចតេជោនាយករដ្ឋមន្ត្រី ហ៊ុន សែន នោះគឺការចាក់វ៉ាក់សាំងមុនគេ អត្រាចាក់វ៉ាក់សាំង​ខ្ពស់បំផុត នៅលើពិភពលោក ការគ្រប់គ្រងការរីករាលដាល់ជំងឺរាតត្បាតបានលឿនបំផុត ដែលសម្រេចបាននូវការងើបឡើងវិញនៃសេដ្ឋកិច្ចមុនគេ។ ប្រទេសកម្ពុជា ជាប្រទេសដែលទទួលស្គាល់ថាល្អជាងគេ ក្នុងការប្រយុទ្ធប្រឆាំងជំងឺកូវីដ១៩ ហើយលទ្ធផលនេះ ទទួលបានការវាយតម្លៃខ្ពស់ពីប្រទេសនានាលើពិភពលោក។

ឯកឧត្តមឯកអគ្គរដ្ឋទូត បានរំលេចឱ្យដឹងទៀតថា ការងារការបរទេស កម្ពុជាទទួលបានផលពីគោលនយោបាយឯករាជ្យ ប្រកបដោយសន្តិភាព របស់រាជរដ្ឋាភិបាល ដែលដឹកនាំដោយគណបក្សប្រជាជនកម្ពុជា កិត្យានុភាពរបស់កម្ពុជា បានកើនឡើងជាបន្តបន្ទាប់។ នៅឆ្នាំ២០២២ ចំពោះមុខនឹងស្ថានភាពដ៏ស្មុគស្មាញតំបន់ និងអន្តរជាតិ ប្រទេសកម្ពុជា បានបំពេញតួនាទីរបស់ខ្លួនជាប្រធានអាស៊ាន ឆ្នាំ២០២២ ក្រោមការដឹកនាំដោយសម្តេចតេជោ ហ៊ុន សែន សហគមន៍អន្តរជាតិ បានកោតសរសេរជាទូទៅថា នេះជាកិច្ចប្រជុំកំពូល កិច្ចសហប្រតិបត្តិការអាស៊ីបូព៌ាដែលទទួលបានជោគ​ជ័យបំផុតក្នុងរយៈពេល១០ឆ្នាកន្លងមកនេះ។

រាជរដ្ឋាភិបាលដែលដឹកនាំដោយគណបក្សប្រជាជនកម្ពុជា បានប្រកាន់ខ្ជាប់នូវគោលនយោបាយមិត្តភាពជាមួយប្រទេសចិន គឺស្របតាមផលប្រយោជន៍ជាមូលដ្ឋានរបស់ប្រទេស និងប្រជាជនទាំង២។ ប្រទេសចិន បានជួយកម្ពុជាជាច្រើនឆ្នាំកន្លងមក បានរួមចំណែក ក្នុងការសាងសង់ស្ថានីយវារីអគ្គិសនី រោងចក្រអគ្គិសនី ផ្លូវថ្នល់ ស្ពាន និងមន្ទីរពេទ្យ ដែលបានធ្វើឱ្យប្រជាជនកម្ពុជា ទទួលបានផលប្រយោជន៍យ៉ាងពិតប្រាកដ នៃចំណងមិត្ត​ភាពចិន-កម្ពុជា។ បន្ថែមពីនេះ ជនជាតិចិនតែងតែនិយាយថា ស្ថិរភាពគឺសំខាន់ជាងអ្វីទាំងអស់ ហើយការអភិវឌ្ឍគឺជាហេតុផល ដ៏រឹងមាំមួយ បើគ្មានសន្តិភាពក៏គ្មានស្ថិរភាព បើគ្មានស្ថិរភាព ក៏គ្មានការអភិវឌ្ឍ ហើយបើគ្មានការអភិវឌ្ឍ ក៏គ្មានជីវភាពរស់នៅល្អផងដែរ។ ឯកឧត្តមឯកអគ្គរដ្ឋទូត បានជូនពរដោយស្មោះដល់កម្ពុជា ឱ្យមានស្ថិរភាពក្នុងសង្គម ការអភិវឌ្ឍសេដ្ឋកិច្ច និងសុខុមាលភាព ប្រកបដោយនិរន្តភាព និងការរីកចម្រើន និងបានថ្លែងអំពាវនាវដល់ប្រជាជនកម្ពុជា ត្រូវតែអរគុណសន្តិភាព និងអរគុណដល់រាជរដ្ឋាភិបាលកម្ពុជា ដែលដឹកនាំដោយគណបក្សប្រជនកម្ពុជា ដែលមានសម្តេចតេជោ ហ៊ុន សែន ជាប្រធាន៕