ភ្នំពេញ ៖ សហគ្រិនខ្មែរដែលគាំទ្រ និងកំពុងប្រកាន់គោលជំហរក្នុងការលើកស្ទួយផលិតផលខ្មែរ ជាពិសេសកសិផលក្នុងស្រុកបានបង្ហាញពីភាពរីករាយក្នុងការបានទទួលឱកាសនាំយកផលិតផលរបស់ខ្លួនតាំងបង្ហាញនៅក្នុងព្រឹត្តិការណ៍នៃការប្រកួតកីឡាស៊ីហ្គេមលើកទី៣២ និងប៉ារ៉ាហ្គេមលើកទី១២ ជាមួយនឹងក្ដីសង្ឃឹមទទួលបានការគាំទ្រពីសំណាក់អតិថិជនជាតិ និងអន្តរជាតិយ៉ាងកុះករ។

ជាម្ចាស់អាជីវកម្មលក់ទំនិញកសិផលខ្មែរដែលប្រើបណ្តាញអនឡាញជាមធ្យោបាយក្នុងការផ្សព្វផ្សាយលក់ដែលមានឈ្មោះថា «កសិផលរីករាយ» ( KSR) លោកស្រី កែវ សុវណ្ណារី បានប្រាប់ AMS ថា កសិកម្មរីករាយតាមរយៈភូមិមួយផលិតផលមួយបានចូលរួមដាក់ស្តង់ពិព័រណ៍  តាំងបង្ហាញកសិលផល ផលិតផលកែឆ្នៃ វត្ថុអនុស្សាវរីយ៍ នៅពហុកីឡដ្ឋានមរតកតេជោក្នុងព្រឹត្តិការណ៍ស៊ីហ្គេម និងប៉ារ៉ាហ្គេម ដែលកម្ពុជាធ្វើជាម្ចាស់ផ្ទះ។

លោកស្រី កែវ សុវណ្ណារី បានឱ្យដឹងថា កសិផលរីករាយ ជាអ្នកជួយធ្វើទីផ្សារ ផ្ដល់សេវាដល់អាជីវកម្មកែច្នៃ និងប្រឹក្សាយោបល់ផ្សេងៗឱ្យកសិករខ្មែរ និងក្នុងនាមជាអាជីវកម្មអនឡាញមួយ ដែលបង្កើតឡើងក្នុងចំណោមអាជីវកម្មអនឡាញក្នុងអំឡុងពេលរាតត្បាតកូវីដ-១៩ និងបន្តដល់បច្ចុប្បន្ន ហើយជាទូទៅ «កសិផលរីករាយ» តែងចែករំលែកទីផ្សារ និងបង្កើតទីផ្សារសម្រាប់ផលិតផលក្នុងស្រុក ក៏ដូចជាការកែច្នៃផលិតផលកសិផល ដើម្បីសម្រេចបាននូវសុវត្ថិភាពចំណីអាហារ និងបង្កើនសេដ្ឋកិច្ចប្រជាជន។

លោកស្រីបានគូសបញ្ជាក់ថា ការដាក់ស្តង់ពិព័រណ៍នៅព្រឹត្តិការណ៍ស៊ីហ្គេម និងប៉ារ៉ាហ្គេមនេះរំពឹងថា ៖ទី១- អាចផ្សព្វផ្សាយផលិតផលខ្មែរទៅក្នុងអាស៊ានទាំង ១១ ប្រទេស, ទី ២- គឺបញ្ជ្រាបព័ត៌មានកសិផលសហគមន៍ខ្មែរឱ្យមានការគាំទ្រកាន់តែច្រើន, ទី៣-គឺឱ្យអតិថិជនទាំងជាតិ និងអន្តរជាតិ សាក ឬភ្លក្សរសជាតិទាំងអស់នៃកសិផល ក៏ដូចជាការដាក់លក់ផងដែរ។

លោកស្រីបានពន្យល់ន័យថា ៖

“នៅពេលអតិថិជនចូលមកទស្សនាស្តង់តាំងផលិតផលរបស់យើង ក៏ដូចជាជួយគាំទ្រ(គាត់បាន like page) នូវអ្វីដែលយើងបានផុស។ បើគាត់ជួយជាវផលិតផលរបស់យើង បានន័យថាគាត់ជួយគាំពារផលិតផលយើង ដើម្បីអាជីវកម្មរបស់យើងដំណើរការទៅមុខបាន មានសុខភាពល្អ។”

លោកស្រីបានបញ្ជាក់ដែរថា ៖

“ក្នុងការលក់ផលិតផលទាំងនោះ យើងជាអ្នកទីផ្សារ ដែលត្រូវតែសម្របសម្រួលក្នុងការលក់។ បើជាកសិផល ឬវត្ថុអនុស្សាវរីយ៍ យើងក៏មានវត្ថុអនុស្សាវរីយ៍បន្ថែមជូនគាត់។ ខណៈដែលភ្ញៀវជាវច្រើន យើងមានវត្ថុអនុស្សាវរីយ៍សម្រាប់ជូនជាកាដូដល់គាត់ មានដូចជាទឹកឃ្មុំដបតូចៗ ម្រេចជ្រក់ដបតូច និងរូបគំនូរពីអង្ករតូចៗជាដើម។ ពោលគឺយើង បានកាត់ពីភាគចំណេញជូនជាកាដូទៅគាត់។”

លោកស្រី កែវ សុវណ្ណារី បានបញ្ជាក់ថា ទោះជាយ៉ាងណា ការទិញ ការមកទស្សនា គឺសុទ្ធតែជារឿងល្អ បន្ថែមពីលើបេសកកម្មរបស់ «កសិផល រីករាយ» ដែលបានទទួលយកផលិតផលក្នុងស្រុកជាច្រើនមកចែករំលែកនៅក្នុងទីផ្សារ រួមមានដូចជា បន្លែស្រស់ៗ ផ្លែឈើស្រស់ អាហារសុវត្ថិភាព ការវេចខ្ចប់ប្រកបស្តង់ដារ មិនប៉ះពាល់បរិស្ថាន​ ក្រោមគំនិតផ្តួចផ្តើមពីសិប្បកម្មក្នុងស្រុក ក៏ដូចជាកសិករខ្មែរផងដែរ៕