សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
សៀមរាប ៖ ប្រទាលកន្ទុយក្រពើ ជាប្រភេទដំណាំងាយស្រួលដាំដុះ ងាយស្រួលថែទាំ និងងាយស្រួលរកទីផ្សារទៀតផង ហើយដោយសារតែប្រទាលកន្ទុយក្រពើនេះហើយដែលធ្វើឱ្យគ្រួសារកសិករម្នាក់ក្លាយជាអ្នកមានជីវភាពធូរធានៅក្នុងស្រុក ឬអ្នកខ្លះហៅថាជាសេដ្ឋីស្រុកស្រែ ដោយក្នុងមួយខែៗអាចកាត់លក់បានមិនក្រោម ១០០០ដុល្លារនោះឡើយ។
អ្នកស្រី ទូច ស្រីរ័ត្ន ម្ចាស់កសិដ្ឋានដាំដុះប្រទាលកន្ទុយក្រពើយក្ស មានទីតាំងស្ថិតនៅក្នុងភូមិខ្នា សង្កាត់ជ្រាវ ក្រុងសៀមរាប ខេត្តសៀមរាប បានឱ្យដឹងថា កាលពីដើមឡើយមានសាច់ញាតិរស់នៅប្រទេសជប៉ុនបានផ្ញើពូជប្រទាលឈ្មោះ (បាបាឌែនស៊ីក)ចំនួន ៣-៤ដើម យកមកដាំទុកទទួលទាន និងប្រើប្រាស់ក្នុងគ្រួសារ ក្រោយមកក៏ចេះតែពង្រីកការដាំដុះឱ្យបានច្រើន ដើម្បីលំអរបរិវេណផ្ទះផង ស្រាប់តែក្រោយមកមានជនបរទេសបានដើរមកមើល ហើយសុំទិញ និងបាននិយាយប្រាប់អំពីអត្ថប្រយោជន៍ប្រទាលកន្ទុយក្រពើនេះ ហើយជំរុញឱ្យដាំដុះកាន់តែច្រើនថែមទៀត។ ក្រោយស្ដាប់ការណែនាំពីជនបរទេសទាំងនោះ អ្នកស្រីក៏បានពង្រីកការដាំដុះរហូតធ្វើជាកសិដ្ឋានធំឡើងៗ និងមានអតិថិជនកម្ម៉ង់ទិញច្រើនឡើងៗ ដែលរហូតមកពេលនេះ មានទាំងអតិថិជនទិញហូបផ្ទាល់ខ្លួន អតិថិជនទិញធ្វើទឹកប្រទាលលក់ និងមានអតិថិជនទិញដើម្បីលក់បន្ត ឬទិញសម្រាប់ផលិតជាគ្រឿងសំអាង ជាពិសេសមានការកម្ម៉ង់ទៅលក់នៅតាមផ្សារទំនើបផងដែរ។
អ្នកស្រី ទូច ស្រីរ័ត្ន បានបញ្ជាក់ថា ៖
«មកទល់សព្វថ្ងៃនេះ មានភ្ញៀវប្រមាណ១០នាក់ ដែលពួកគាត់កម្ម៉ង់ទិញហូបផ្ទាល់ខ្លួនដោយក្នុងម្នាក់ៗប្រហែល៣០គីឡូ ក្នុងមួយខែ ដែលគាត់យកទៅធ្វើទឹកប្រទាលហូបព្យាបាលជំងឺក្រពះ។ ក្រោយពីមានអតិថិជនកម្ម៉ង់ច្រើនទៅៗ គ្រួសារខ្ញុំក៏ចេះតែពង្រីកផើងដាំប្រទាលកាន់តែច្រើនឡើងៗ ដែលគិតតាំងពីដាំដំបូងមានរយៈពេលប្រហែល ៧ឆ្នាំហើយ អាចដាំបានចំនួន៣០០០ផើង ហើយក្នុងមួយខែអាចកាត់លក់បានចន្លោះពី ១តោន ទៅដល់ ២តោន ដោយក្នុងមួយគីឡូក្រាមលក់បាន ៤០០០រៀលសម្រាប់តម្លៃបោះដុំ តែសម្រាប់លក់រាយតម្លៃលក់ចេញ ៥០០០រៀលក្នុងមួយគីឡូក្រាម»។
ជាការគួរឱ្យកត់សម្គាល់ ដោយសារការដាំដុះប្រទាលកន្ទុយក្រពើចេះតែបង្កើនឡើងរហូតពេញទីធ្លាបរិវេណនៅជុំវិញផ្ទះ អ្នកស្រី ទូច ស្រីរ័ត្ន បានសហការជាមួយកសិករក្នុងភូមិមួយចំនួនជំរុញការដាំដុះបន្ថែម និងបានជួយធ្វើទីផ្សារលក់ជូនកសិករជាដៃគូផងដែរ។ ក្រៅតែពីលក់ស្លឹកប្រទាល អ្នកស្រីក៏មានលក់កូនប្រទាលសម្រាប់ធ្វើពូជផងដែរ ដោយក្នុងមួយដើមតម្លៃ ៤០០០រៀល ហើយក្នុងមួយខែអាចលក់ចេញបានប្រមាណជា ១០០ ទៅ ២០០ថែមទៀតផង។
អ្នកស្រីបញ្ជាក់ថា ៖
«និយាយមិនលាក់បាំងទេ ប្រទាលកន្ទុយក្រពើងាយស្រួលដាំជាងដំណាំផ្សេង ដោយដំបូងគ្រាន់តែលាយដីឱ្យមានជីជាតិសមល្មម កុំប្រើជីគីមីខ្លាំងខ្លាចប្រទាលរលួយ ក្រោយពីលាយដីហើយយកដាក់ក្នុងផើង រួចយកកូនប្រទាលមានអាយុប្រហែល២ខែមកដាំតាមផើងនីមួយៗ ហើយស្រោចទឹកជាប្រចាំ ចន្លោះ ២ ទៅ ៣ថ្ងៃស្រោចម្តង តែកុំស្រោចខ្លាំងពេកខ្លាចប្រទាលរលួយ។ ធ្វើការថែទាំស្រោចទឹកជាប្រចាំប្រហែលមួយឆ្នាំក្រោយប្រទាលអាចប្រមូលផលបាន ក្នុងមួយធាងមានទម្ងន់ចាប់ពីកន្លះឡូទៅ៨ខាំ ឬ១គីឡូឯណោះ» ៕
អត្ថបទ ដោយ ៖ វិន ឈុនហ៊ាត
Account
Security
Favourite Content