សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ នៅទីបំផុត ក្រុមហ៊ុនផលិតរថយន្តអគ្គិសនីរបស់ចិន BYD បានសម្រេចបណ្ដាក់ទុនវិនិយោគក្នុងការបង្កើតរោងចក្រផ្គុំ និងដំឡើងរថយន្តនៅក្នុងប្រទេសកម្ពុជា ដោយបានជ្រើសរើសទីតាំងនៅក្នុងខេត្តព្រះសីហនុ ក្នុងទំហំទឹកប្រាក់ដំបូងចំនួន៣២លានដុល្លារអាមេរិក ។ នេះបើតាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជាចេញផ្សាយនៅពេលថ្មីៗកន្លងទៅនេះ ។
បើតាមរបាយការណ៍ក្រុមប្រឹក្សាអភិវឌ្ឍន៍កម្ពុជា បានបង្ហាញថា រោងចក្រផ្គុំដំឡើងរថយន្តមួយ ត្រូវបានបោះទុនវិនិយោគនៅក្នុងតំបន់សេដ្ឋកិច្ចពិសេសក្រុងព្រះសីហនុ ដែលគម្រោងនេះនឹងផ្ដល់ការងារដល់ប្រជាពលរដ្ឋ ប្រមាណជាង២០០កន្លែង ។
តាមរយៈគម្រោងរោងចក្រផ្គុំដំឡើងរថយន្តនេះ នឹងធ្វើឱ្យកម្ពុជាមានរោងចក្រដំឡើងរថយន្តក្នុងស្រុកបន្ថែមមួយទៀត បន្ទាប់ពីរោងចក្រផ្គុំដំឡើងរថយន្តតូយ៉ូតារបស់ជប៉ុនមួយបានបើកសម្ពោធដំណើរការ កាលពីថ្ងៃទី២ ខែឧសភា ឆ្នាំ២០២៤ កន្លងទៅនេះ។
ឯកឧត្តម ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ ក្រុមប្រឹក្សាអភិវឌ្ឍន៍កម្ពុជា បានមានប្រសាសន៍ថា ពេលនេះក្រុមហ៊ុនផលិតរថយន្តរបស់ចិន BYD កំពុងសាងសង់រោងចក្រផ្គុំដំឡើងរថយន្តអគ្គិសនីរបស់ខ្លួននៅក្នុងតំបន់សេដ្ឋកិច្ចពិសេសក្រុងព្រះសីហនុ ហើយរោងចក្រនេះនឹងអាចរួចរាល់នៅចុងឆ្នាំ២០២៥ខាងមខុនេះ ។
ឯកឧត្តមបន្តថា ៖
« ភាគច្រើននៃរថយន្តអគ្គិសនីគឺគេដំឡើងនៅប្រទេសណាគេលក់នៅប្រទេស ហើយសម្រាប់រោងចក្រដំឡើងរថយន្តអគ្គិសនីរបស់ចិន BYD ជាជំហានដំបូង គឺគេដំឡើងរថយន្តផ្គត់ផ្គង់នៅកម្ពុជា ដោយជំហានបន្ទាប់ ក្រុមហ៊ុននេះអាចនឹងផលិតគ្រឿងបង្គុំរថយន្តសម្រាប់នាំចេញទៅកាន់ទីផ្សារប្រទេសផ្សេងដើម្បីដំឡើងនៅប្រទេសនោះ»។
ឯកឧត្តមបន្តទៀថា មុនពេលក្រុមហ៊ុនសម្រេចចិត្តបណ្ដាក់ទុនវិនិយោគនៅខេត្តព្រះសីហនុ ក្រុមប្រឹក្សាអភិវឌ្ឍន៍កម្ពុជាបាននាំថ្នាក់ដឹកនាំក្រុមហ៊ុនទស្សនកិច្ច និងពិនិត្យមើលទីតាំងសក្ដានុពលសម្រាប់វិនិយោគជាច្រើនកន្លែង តែចុងក្រោយ ក្រុមហ៊ុននេះបានសម្រេចយកតំបន់សេដ្ឋកិច្ចពិសេសក្រុងព្រះសីហនុខេត្តព្រះសីហនុ ជាទីតាំងវិនិយោគរបស់ខ្លួន ព្រោះទីតាំងនេះ ងាយស្រួលក្នុងការដឹកជញ្ជូនគ្រឿងបង្គុំពីខាងក្រៅមកដំឡើងក្នុងរោងចក្រ រួចហើយដឹកចេញទៅចែកចាយតាមបណ្ដាខេត្តនានារួមទាំងភ្នំពេញ។
កំណើនអ្នកប្រើប្រាស់រថយន្តអគ្គិសនីនៅកម្ពុជាមានចំនួនកាន់តែច្រើនៗពីមួយឆ្នាំទៅមួយឆ្នាំ ជាក់ស្ដែងនៅក្នុងឆ្នាំ២០២៤កន្លងទៅ ចំនួនយានយន្តអគ្គិសនីចុះបញ្ជីនៅក្រសួងសាធារណការនិងដឹកជញ្ជូនមានចំនួន៧៥៧គ្រឿង បើប្រៀបធៀបនឹងឆ្នា ២០២៣មានកំណើនរហូតដល់៣១២ភាគរយ ។
គួរបញ្ជាក់ថា រាជរដ្ឋាភិបាលបានកំណត់យកខេត្តព្រះសីហនុ ជាតំបន់សេដ្ឋកិច្ចពិសេសគំរូពហុបំណង ដោយគ្រោងទាក់ទាញគម្រោងវិនិយោគជាទឹកប្រាក់ប្រមាណ២០ពាន់លានដុល្លារអាមេរិកក្នុងរយៈពេល១៥ឆ្នាំ ទាំងគម្រោងអចលនទ្រព្យ ឧស្សាហកម្ម និងទេសចរណ៍ជាដើម ។ នៅដើមឆ្នាំ ២០២៥នេះដែរ រដ្ឋាភិបាលក៏បានបន្តអនុវត្តន៍កម្មវិធីពិសេសជំរុញការវិនិយោគនៅក្នុងខេត្តព្រះសីហនុ រហូតដល់ដាច់ឆ្នាំ ២០២៥ ហើយក៏មានវិនិយោគិន និងធុរជនជាច្រើនបាននិងកំពុងចែចូវលើខេត្តព្រះសីហនុ ដើម្បីបណ្ដាក់ទុននិងបង្កើតអាជីវកម្មនៅក្នុងខេត្តនៃតំបន់សមុទ្រមួយនេះ ៕
Account
Security
Favourite Content