សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ក្នុងអំឡុងពេលនៃដំណើរទស្សនៈកិច្ចរបស់រដ្ឋមន្ត្រីការបរទេសចិនមកកម្ពុជា កាលពីថ្ងៃទី ១២ និង១៣ សីហាថ្មីៗនេះ លោក វ៉ាង យី បានចូលជួបពិភាក្សាការងារជាមួយឯកឧត្តម សុខ ចិន្តាសោភា អគ្គលេខាធិការក្រុមប្រឹក្សាអភិវឌ្ឍន៍កម្ពុជា។
ក្នុងនោះ ភាគីទាំងពីរបានពិភាក្សាក្នុងការរឹតបន្តឹងចំណងមិត្តភាបរវាងប្រទេសទាំងពីរ ឱ្យកាន់តែរឹងមុំា និងជាពិសេសពង្រឹងកិច្ចសហប្រតិបត្តិការដើម្បីទាញយកផលប្រយោជន៍ទៅវិញទៅមកជាអតិបរមាសម្រាប់ប្រជាជននៃប្រទេសទាំង២។
តាមរយៈកិច្ចពិភាក្សានេះ ក្រុមប្រឹក្សាអភិវឌ្ឍន៍កម្ពុជាបានចាត់ទុកថា ទំនាក់ទំនងការទូតដែលបានបង្កើតជាមិត្តភាពដែកថែបកម្ពុជា-ចិន ត្រូវបានឆ្លុះបញ្ចាំងតាមរយៈទំនាក់ទំនងសេដ្ឋកិច្ចយ៉ាងរឹងមាំ ដោយប្រទេសចិនបានក្លាយជាដៃគូពាណិជ្ជកម្ម ប្រភពទុនវិនិយោគ និងទេសចរធំជាងគេរបស់កម្ពុជា។
បើតាមក្រុមប្រឹក្សាអភិវឌ្ឍន៍កម្ពុជាដដែល ក្នុងឱកាសនោះលោក វ៉ាង យី បានថ្លែងថា ៖ ច្បាប់ស្តីពីវិនិយោគថ្មី និងក្របខ័ណ្ឌគតិយុត្ត សម្រាប់អនុវត្តច្បាប់នេះដែលត្រូវបានដាក់ឱ្យប្រើប្រាស់ជាស្ថាពរ ក៏ដូចការចូលជាធរមាននៃកិច្ចព្រមព្រៀងពាណិជ្ជកម្មសេរីកម្ពុជា-ចិន និងការលើកកម្ពស់ក្របខ័ណ្ឌកិច្ចសហប្រតិបត្តិការត្បូងពេជ្រ នឹងជំរុញឱ្យទំនាក់ទំនងកម្ពុជា-ចិន រឹតតែទទួលបានលទ្ធផលល្អត្រចះត្រចង់បន្ថែមទៀត។
អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជាបានយល់ឃើញថា ការអញ្ជើញមករបស់រដ្ឋមន្ត្រីការបរទេសចិន នឹងផ្ដល់ផលប្រយោជន៍ច្រើនដល់កម្ពុជា ទាំងសេដ្ឋកិច្ច និងនយោបាយ។
អ្នកឧកញ៉ា បានមានប្រសាសន៍ថា៖
«កម្ពុជាជាប្រទេសមួយដែលអនុវត្តទៅតាមគោលនយោបាយផ្លូវ មួយខ្សែក្រវាត់មួយ ហើយក៏ជាចំណងមិត្តភាព ព្រមទាំងស្ថិតនៅក្នុងសហគមន៍ដែលមានជោគវាស នាតែមួយ ដូច្នេះទំនាក់ទំនងទាំងនយោបាយ និងសេដ្ឋកិច្ចកាន់តែល្អប្រសើរ និងបានផលចំណេញកាន់តែច្រើន»។
ម្យ៉ាងទៀត ចិនក៏ជាដៃគូនៃកិច្ចព្រមព្រៀងគ្រប់ជ្រុងជ្រោយផងដែរ ហើយកម្ពុជា-ចិនក៏មានកិច្ចព្រមព្រៀងពាណិជ្ជកម្មសេរីទ្វេភាគីផងដែរ។ ដូច្នេះ អ្នកជំនាញសេដ្ឋកិច្ចរូបនេះជឿថា ក្រោយដំណើរទស្សនៈកិច្ចរបស់រដ្ឋមន្ត្រីការបរទេសនេះ និងធ្វើឱ្យអ្នកវិនិយោគចិន សម្លឹងឃើញកម្ពុជាកាន់តែទូលំទូលាយ ជាពិសេសក្រោមជួយជ្រោមជ្រែងរបស់រដ្ឋាភិបាលផង កម្ពុជានឹងទទួលបានគម្រោងវិនិយោគកាន់តែច្រើនបន្ថែមទៀត។
បើតាមរបាយការណ៍ពីក្រុមប្រឹក្សាអភិវឌ្ឍន៍កម្ពុជា ក្នុងឆ្នាំ២០២២ CDC បានអនុម័តលើគម្រោងវិនិយោគថ្មី និងគម្រោងពង្រីកផលិតកម្មសរុប ១៨៦ គម្រោង ដែលមានទុនវិនិយោគសរុបប្រមាណ ៤ពាន់លានដុល្លារ ក្នុងនោះទុនវិនិយោគផ្ទាល់មកពីប្រទេសចិនមានរហូតដល់ ៤២ ភាគរយ នៃការវិនិយោគសរុប ឬប្រមាណ ៩០,៥ ភាគរយនៃការវិនិយោគផ្ទាល់ពីបរទេសនៅកម្ពុជា៕
Account
Security
Favourite Content