សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
វៀងចន្ទន៍, ឡាវ៖ រដ្ឋាភិបាលចិន នឹងផ្ដល់ជំនួយឥតសំណងបន្ថែមក្នុងទំហំប្រមាណ៣០០លានយ័ន ឬស្មើ៤២លានដុល្លារអាមេរិក ដើម្បីឱ្យកម្ពុជាជំរុញអភិវឌ្ឍន៍កសាងហេដ្ឋារចនាសម្ព័ន្ធរបស់ខ្លួន ដែលការប្រកាសផ្តល់ជំនួយនេះត្រូវបានធ្វើឡើងក្នុងជំនួបប្រជុំទ្វេភាគីរវាងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ជាមួយឯកឧត្តម លី ឈាង (Li Qiang)នាយករដ្ឋមន្ត្រីចិន នៅរដ្ឋធានីវៀងចន្ទន៍ប្រទេសឡាវ។
ឯកឧត្តមនាយករដ្ឋមន្រ្តី លី ឈាង ក៏បានសម្ដែងនូវការកោតសរសើរចំពោះការដឹកនាំរបស់សម្ដេចធិបតី ដែលរក្សាបាននូវស្ថិរភាពនយោបាយ សន្តិសុខ និងធានាបាននូវកំណើនសេដ្ឋកិច្ចរឹងមាំជាមួយនឹងកិត្យានុភាពកម្ពុជាកាន់តែល្បីល្បាញនៅលើឆាកអន្តរជាតិ ហើយនឹងបន្តគាំទ្រដល់មាគ៌ាអភិវឌ្ឍន៍ស្របទៅតាមស្ថានភាពជាក់ស្តែងរបស់កម្ពុជា ហើយរដ្ឋាភិបាលចិន នឹងបន្តលើកទឹកចិត្តវិនិយោគិនចិនមកកម្ពុជាថែមទៀត។
នាយករដ្ឋមន្ត្រីចិន បានបន្តប្រាប់សម្តេចធិបតីថា ចិននឹងធ្វើការឱ្យកាន់តែជិតស្និទ្ធថែមទៀតជាមួយកម្ពុជា ដើម្បីកសាងផែនការមេសម្រាប់ច្រករបៀងមច្ឆា និងអង្ករ ច្រករបៀងឧស្សាហកម្ម និងបច្ចេកវិទ្យា និងការប្តេជ្ញាចិត្តជំរុញការនាំចូលផលិតផលកសិកម្មកម្ពុជាបន្ថែមទៀតមកកាន់ទីផ្សារចិន។
សម្ដេចធិបតី ហ៊ុន ម៉ាណែត បានឆ្លើយតបដោយការអរគុណរដ្ឋាភិបាល និងប្រជាជនចិន ដែលតែងបន្តជួយដល់ការអភិវឌ្ឍសង្គម-សេដ្ឋកិច្ចកម្ពុជា។ ជាមួយគ្នានេះ ថ្នាក់ដឹកនាំទាំងពីរ ក៏បានឯកភាពបន្តជំរុញកិច្ចសហប្រតិបត្តិការលើវិស័យសំខាន់ៗជាច្រើន រួមមានវិស័យថាមពលស្អាត ការកសាងហេដ្ឋារចនាសម្ព័ន្ធ និងការតភ្ជាប់រវាងប្រជាជន និងប្រជាជន។
ថ្នាក់ដឹកនាំទាំងពីរ ក៏បានសម្ដែងនូវការពេញចិត្ត និងវាយតម្លៃខ្ពស់ចំពោះទំនាក់ទំនង និងកិច្ចសហប្រតិបត្តិការដ៏ល្អរវាងប្រទេសទាំងពីរ ដែលសម្រេចបាននូវភាពជាដៃគូយុទ្ធសាស្ត្រគ្រប់ជ្រុងជ្រោយ ជាមិត្តដែកថែប និងការកសាងនូវសហគមន៍ជោគវាសនារួមកម្ពុជា-ចិន ក្នុងយុគសម័យថ្មី៕
Account
Security
Favourite Content