សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្រសួងរៀបចំដែនដី នគរូបនីយកម្ម និងសំណង់ មានសេវាជាច្រើនដែលត្រូវបានដាក់ឱ្យប្រើប្រាស់តាមប្រព័ន្ធអនឡាញ ដើម្បីផ្តល់ភាពងាយស្រួលដល់ពលរដ្ឋទូទៅ ក៏ដូចជាអ្នកពាក់ព័ន្ធនឹងវិស័យ។ ថ្ងៃនេះ ពីសារព័ត៌មាន AMS Economy នឹងលើកយកពីសេវាលក់ផ្ដាច់ និងអំណោយផ្ដាច់មកចែកជូនសាធារណៈជនសម្រាប់ជាចំណេះដឹងមូលដ្ឋាននៅក្នុងវិស័យដែនដី នគរូបនីយកម្ម ជាពិសេស សុរិយោដី ។
សេវាលក់ផ្ដាច់ ៖ គឺសំដៅដល់សេវាផ្ទេរបន្ត ឬផ្ទេរកម្មសិទ្ធិពីម្ចាស់អចលនវត្ថុមួយទៅម្ចាស់អចលនវត្ថុមួយទៀត ឧទាហរណ៍ថា ភាគី «ក» បានលក់ផ្ទះ ឬលក់ដី ទៅឱ្យភាគី «ខ» តាមកិច្ចព្រមព្រៀងរបស់ពួកគេដោយធ្វើលិខិតលក់ផ្ដាច់ ។
សេវាអំណោយផ្ដាច់ ៖ សេវានេះសំដៅទៅលើកិច្ចសន្យាដែលត្រូវមានអានុភាពពីភាគីម្ខាងបង្ហាញឆន្ទៈឱ្យទៅភាគីម្ខាងទៀតនូវទ្រព្យសម្បត្តិដែលមិនយកថ្លៃ ហើយភាគីម្ខាងទៀតយល់ព្រមទទួល ។ ឧទាហរណ៍ បុគ្គលម្នាក់បានធ្វើប្រទានកម្មដី ឬផ្ទះ ទៅឱ្យភាគីម្ខាងទៀត ក្នុងរង្វង់សាច់ញាតិតាមការសម្រេចចិត្តរបស់ម្ចាស់អំណោយ ដូចជា ឪពុកម្ដាយផ្ដល់អំណោយទៅដល់កូន យាយតាផ្ដល់អំណោយទៅចៅជាដើម ។ ដោយឡែក សម្រាប់ឯកសារដែលត្រូវភ្ជាប់រួមមានដូចជា សម្រាប់អ្នកលក់ ឬអ្នកធ្វើអំណោយ ត្រូវមានបណ្ណកម្មសិទ្ធិច្បាប់ដើម និងអត្តសញ្ញណបណ្ណ ។ សម្រាប់អ្នកទទួល ឬអ្នកទិញ ត្រូវមានអត្តសញ្ញាណបណ្ណ សៀវភៅស្នាក់នៅ និងសេចក្ដីចម្លងសំបុត្រអាពាហ៍ពិពាហ៍ ក្នុងករណីរៀបការរួច ។
ជាមួយគ្នានេះ ដើម្បីសម្រួលដល់ការងាររបស់ប្រជាពលរដ្ឋ បច្ចុប្បន្ននេះ សេវាលក់ផ្ដាច់ និងសេវាអំណោយផ្ដាច់ ត្រូវបានក្រសួងរៀបចំដែនដី នគរូបនីយកម្ម និងសំណង់ ដាក់ចូលទៅក្នុងប្រព័ន្ធអនឡាញ ដែលអាចប្រើប្រាស់សេវាទាំងនេះបានតាមប្រព័ន្ធអនឡាញ ដោយគ្រាន់តែចូលទៅក្នុងគេហទំព័ររបស់ក្រសួងរៀបចំដែនដី នគរូបនីយកម្ម និងសំណង់ ហើយចុចលើសេវាលក់ផ្ដាច់ និងអំណោយផ្ដាច់ បន្ទាប់មកត្រូវបំពេញតាមលក្ខខណ្ឌដែលបានតម្រូវជាការស្រេច ។
គួររម្លឹកថា ដើម្បីអាចប្រើប្រាស់សេវាអនឡាញរបស់ក្រសួងរៀបចំដែនដី នគរូបនីយកម្ម និងសំណង់ បាន លោកអ្នកត្រូវបង្កើតគណនីមួយជាមុនសិន ហើយការបង្កើតគណនីដើម្បីអាចប្រើប្រាស់សេវារបស់ក្រសួងដែនដីបាន គ្រាន់តែបំពែញនាមត្រកូល នាមខ្លួន លេខទូរសព្ទ លេខអត្តសញ្ញាណប័ណ្ណ អ៊ីម៉េល បង្កើតពាក្យសម្ងាត់ ។ នៅពេលបង្កើតគណនីបានហើយ លោកអ្នកអាចចូលទៅប្រើប្រាស់សេវាអនឡាញរបស់ក្រសួងរៀបចំដែនដី នគរូបនីយកម្ម និងសំណង់បានហើយ ដែលក្នុងនោះមានសេវាព័ត៌មានសុរិយោដីតាមប្រព័ន្ធអេឡិចត្រូនិក សេវាហ៊ីប៉ូតែក និងបញ្ចាំ សេវាសំណង់តាមប្រព័ន្ធអេឡិចត្រូនិក សេវាលក់ និងអំណោយផ្ដាច់ និងសេវាផ្សេងៗជាច្រើនទៀត ៕
Account
Security
Favourite Content