ភ្នំពេញ៖ រយៈពេល១០ខែ ឆ្នាំ២០២៤ ទំហំពាណិជ្ជកម្មសរុបកម្ពុជា-ចក្រភពអង់គ្លេស សម្រេចបាន៦៧៤លានផោន ឬ៨៥០ លានដុល្លារ កើនឡើង ១៦% បើធៀបនឹងរយៈពេលដូចគ្នានៃឆ្នាំ២០២៣។ នេះបើតាមការថ្លែងឱ្យដឹងរបស់លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម នៅក្នុងពិធីបើកពិព័រណ៍ពាណិជ្ជកម្មអន្តរជាតិនាព្រឹកថ្ងៃទី១៨ ខែវិច្ឆិកា ឆ្នាំ២០២៤ នៅមជ្ឈមណញឌលកោះពេជ្រ រាជធានីភ្នំពេញ។

លោកជំទាវរដ្ឋមន្ត្រី ចម និម្មល បានមានប្រសាសន៍ឱ្យដឹងទៀតថា៖ តួលេខនេះបាននាំឱ្យការនាំចេញរបស់កម្ពុជាទៅកាន់ចក្រភពអង់គ្លេសក្នុងឆ្នាំ២០២៤ មានកំណើន ២១% ក្នុង នោះផងដែរ ផលិតផលសម្លៀកបំពាក់ ស្បែកជើង និងកង់ គឺឈរលើលំដាប់កំពូលទាំង៣ នៃមុខទំនិញនាំចេញទាំងអស់។ ជាមួ​យនឹងលក្ខខណ្ឌពាណិជ្ជកម្មដែលមានអំណោយផលផ្តល់ដោយចក្រភពអង់គ្លេស លោកជំទាវបានកត់សម្គាល់ឃើញថាការនាំចេញផលិតផលធ្វើដំណើរ មានកំណើនខ្ពស់គួឱ្យកត់សម្គាល់ប្រមាណ៧៦,២៣% ធៀបនឹងឆ្នាំមុន។

លោកជំទាវបានបន្តថា៖

«កម្ពុជា និងចក្រភពអង់គ្លេស មានទំនាក់ទំនងយ៉ាងជិតស្និទ្ធលើគ្រប់វិស័យ ដែលមិត្តភាពដ៏រឹងមាំនេះត្រូវបានថែរក្សាតាមរយៈកិច្ចសហប្រតិបត្តិការជិតស្និទ្ធ ជាពិសេសក្នុងវិស័យពាណិជ្ជកម្ម និងវិនិយោគ ដោយកាលពីសប្ដាហ៍មុនក្រសួងពាណិជ្ជកម្ម និងស្ថានទូតអង់គ្លេសប្រចាំកម្ពុជា បានរៀបចំវេទិកាពាណិជ្ជកម្ម និងវិនិយោគរួមគ្នារវាងកម្ពុជា និងចក្រភពអង់គ្លេស ជាលើកទី២ នៅរាជធានីភ្នំពេញ ក្នុងគោលបំណង និងការប្តេជ្ញាចិត្តរួមគ្នាដើម្បីជំរុញកំណើនពាណិជ្ជកម្មទ្វេភាគី និងរួមគ្នាដោះស្រាយបញ្ហាប្រឈមដែលកំពុងកើតមាន និងអាចកើតមាននាពេលអនាគត ជាមួយចក្ខុវិស័យច្បាស់លាស់ក្នុងការធ្វើឱ្យប្រសើរឡើងនូវបរិយាកាសធុរកិច្ច និងប្រកបដោយចរីភាពចំពោះវិស័យឯកជន»។

សូមជម្រាបថា៖ កម្ពុជា និងអង់គ្លេស បានសហការរៀបចំពិព័រណ៍ពាណិជ្ជកម្មអន្តរជាតិរយៈពេល២ថ្ងៃ នៅមជ្ឈមណញឌលកោះពេជ្រ រាជធានីភ្នំពេញ ក្នុងគោលបំណងជំរុញការនាំចេញផលិតផល វាយនភណ្ឌ សម្លៀកបំពាក់ និងស្បែកជើងទៅកាន់ចក្រភពអង់គ្លេស និងបង្កើតបណ្តាញទំនាក់ទំនងជាមួយនឹងអ្នកបញ្ជាទិញសំខាន់ៗរបស់ចក្រភពអង់គ្លេស។

អ្នកឧកញ៉ា លី ឃុនថៃ ប្រធានសហព័ន្ធអ្នកវិនិយោគកម្ពុជា បានលើកឡើងថា៖ ពិព័រណ៍ពាណិជ្ជកម្មអន្តរជាតិនេះ នឹងជួយជំរុញឱ្យវិស័យផលិតផលនៅកម្ពុជា ក៏ដូចជាផលិតផលស្បែកជើង ផលិតផលធ្វើដំណើរ កាបូប វ៉ាលីស៍ ទទួលបានការចាប់អារម្មណ៍ពីវិនិយោគិនអង់គ្លេស ពីព្រោះ ក្រុមហ៊ុនអង់គ្លេសជាង១០បានចូលរួមពិព័រណ៍ពាណិជ្ជកម្ម ជាពិសេសក្រុមហ៊ុនបញ្ជាទិញ។

អ្នកឧកញ៉ា បានបន្តថា៖

«ឆ្លងកាត់ពិព័រណ៍នេះក្រុមហ៊ុនអង់គ្លេសរំពឹងចាប់អារម្មណ៍ខ្ពស់ក្នុងការបញ្ជាទិញទំនិញពីកម្ពុជាដូចជា ស្បែកជើង កាបូប ផលិតផលធ្វើដំណើរ ហើយសង្ឃឹមថាការបញ្ជាទិញនឹងកើនឡើង ជាពិសេសការនាំចេញទំនិញពីកម្ពុជាទៅអង់គ្លេ និងសហរដ្ឋអាមេរិកនឹងកើនឡើង»។

លោក Dominic Williams MBE ឯកអគ្គរាជទូតអង់គ្លេសប្រចាំកម្ពុជា មានប្រសាសន៍ថា៖ ស្ថានទូតអង់គ្លេស កំពុងចូលរួមចំណែកសហការ ដោយផ្ដល់ឱកាសជូនទៅដល់សហគ្រាសធុនតូច និងធម្យម ដែលដឹកនាំដោយស្ត្រី តាមរយៈវេទិកាដាក់តាំងបង្ហាញផលិតផលទៅកាន់អ្នកវិនិយោគទុន ដែលបានធ្វើដំណើរពីចក្រភពអង់គ្លេស ក្នុងគោលបំណងនាំយកផលិតផលពីប្រទេសកម្ពុជា ចូលទៅក្នុងទីផ្សារចក្រភពអង់គ្លេស៕