សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
អភិបាលនៃគណៈអភិបាលខេត្តប៉ៃលិន បានប្រកាសទទួលទិញយកកសិផលធម្មជាតិ ដែលកសិករបានដាំដុះជាលក្ខណៈគ្រួសារ និងជួយរកទីផ្សារសម្រាប់កសិករនៅខេត្តប៉ៃលិន ខណៈដែលសកម្មភាពនេះនឹងលើកទឹកចិត្តដល់កសិករឱ្យដាំដុះដំណាំកសិកម្មដោយគ្មានប្រើប្រាស់សារធាតុគីមី ដែលនាំប៉ះពាល់ដល់សុខភាព។
លោកជំទាវ បាន ស្រីមុំ អភិបាលនៃគណៈអភិបាលខេត្តប៉ៃលិនបានប្រាប់ឱ្យដឹងនៅថ្ងៃទី១១ ខែកញ្ញាថា គោលបំណងនៃការបង្កើតសកម្មភាពទាំងនេះដោយសារតែកាលពីពេលកន្លងទៅ ប្រជាកសិករដែលដាំដុះដំណាំជាលក្ខណៈគ្រួសារខ្វះព័ត៌មានទាក់ទងនឹងទីផ្សារ ហើយក្រោយពេលប្រមូលផលដំណាំដែលដាំដុះបានយកទៅលក់បានក្នុងតម្លៃទាប និងពិបាករកទីផ្សារ ទើបខាងអាជ្ញាធរខេត្តរៀបចំកម្មវិធីនេះឡើង។
លោកជំទាវបានបញ្ជាក់ដូច្នេះថា ៖
«កន្លងទៅយើងដឹងថា កសិករដាំដំណាំបានល្អៗណាស់ ប៉ុន្តែពួកគាត់ខ្វះព័ត៌មានពីទីផ្សារ ដោយពេលខ្លះដាំហើយមិនដឹងយកទៅលក់ឯណា ទើបខ្ញុំរួមនឹងអាជ្ញាធរខេត្តប៉ៃលិន ជួយគិតគូរប្រមូលទិញពីកសិករដែលដាំដុះលក្ខណៈគ្រួសារក្នុងតម្លៃទីផ្សារដោយមិនរកប្រាក់ចំណេញនោះឡើយ»។
ទោះជាយ៉ាងណាក៏ដោយ លោកជំទាវក៏បានស្នើឱ្យកសិករបន្តដាំដុះដោយប្រើប្រាស់ជីធម្មជាតិ ជៀសវាការប្រើជីគីមីជ្រុលហួសហេតុ ដែលធ្វើឱ្យប៉ះពាល់ដល់សុខភាពអ្នកបរិភោគ។
លោកជំទាវអភិបាលខេត្តប៉ៃលិនបានថ្លែងថា ៖
«យើងជួយរកទីផ្សារឱ្យគាត់ តែយើងក៏ចង់ឱ្យកសិករទាំងអស់យកចិត្តទុកដាក់លើការដាំដុះដំណាំដោយប្រើប្រាស់ជីធម្មជាតិចៀសវាងការប្រើប្រាស់ជីគីមីច្រើនជ្រុលដែលធ្វើឱ្យខូចឈ្មោះដំណាំខេត្តប៉ៃលិន។ នេះជាជំហានដំបូងសិន យើងធ្វើត្រឹមខេត្តប៉ៃលិន នៅពេលទទួលបានជោគជ័យ នឹងបន្តជួយដល់កសិករនៅខេត្តជិតៗនេះដែរ។ តែខ្ញុំជឿថា អាជ្ញាធរខេត្តនីមួយៗ តែងមានការគិតគូរប្រជាពលរដ្ឋដែលនៅក្នុងដែនសមត្ថកិច្ចរបស់ខ្លួនរួចហើយ»។
កញ្ញា ប៊ុន សៀង ម្ចាស់កសិដ្ឋានភូមិកសិកម្មធម្មជាតិបានយល់ថា សកម្មភាពរបស់អាជ្ញាធរខេត្តក្នុងការជួយរកទីផ្សារឱ្យកសិករនេះ ជាអ្វីដែលកសិករចង់បាន ខណៈដែលកន្លងទៅមានកសិករជាច្រើនប្រមូលផលហើយពិបាករកទីផ្សារ ជាពិសេសការប្រមូលផលក្នុងពេលដំណាលគ្នា។
កញ្ញាបានប្រាប់ថា ៖
«ការពិតទៅឱ្យតែកសិករយើងគាត់ដាំដុះបន្លែតាមស្តង់ដារ និងមានសុវត្ថិភាពសម្រាប់អ្នកបរិភោគ នោះការស្វែងរកទីផ្សារមិនមែនលំបាកពេកទេ។ ម្យ៉ាងវិញទៀត ការទទួលបានព័ត៌មានទីផ្សាររបស់កសិករក៏នៅមានកម្រិតដែរ។ យើងរីករាយនៅពេលដែលមានការជ្រោមជ្រែងពីសំណាក់អាជ្ញាធរចំពោះកសិករយើង»។
ដោយឡែក អ្នកស្រី យ៉ែម ណារី ម្ចាស់ហាងសួនផ្កាផ្ទះបៃតង ដែលមានលក់ផលិតផលបន្លែ និងផ្លែឈើធម្មជាតិក្នុងស្រុកដោយទិញពីកសិករតាមបណ្តាខេត្តនានា បាននិយាយថា សព្វថ្ងៃនេះ អាជីវកម្មរបស់អ្នកស្រីកំពុងមានបញ្ហាប្រឈម ដោយសារតែត្រូវប្រកួតប្រជែងតម្លៃជាមួយនឹងផលិតផលកសិកផលដែលនាំចូលពីប្រទេសជិតខាង។
អ្នកស្រីបានប្រាប់ដូច្នេះថា ៖
«ឥឡូវនេះ យើងមានភាពប្រឈមច្រើន ដោយសារតែតម្លៃផលិតផលក្នុងស្រុកយើងខ្ពស់ជាងកសិផលនាំចូល ខណៈដែលរូបរាងក៏មិនសូវល្អដូចបន្លែផ្លែឈើពីក្រៅមកដែរ។ តែយ៉ាងណាមិញដើម្បីបន្តនិរន្តរភាពប្រាក់ចំណូលជូនដល់កសិករយើង ទោះបីចំណេញតិច ឬពេលខ្លះខាតទៀតផង ក៏ខ្ញុំនៅតែប្រមូលទិញដែរ។ ខ្ញុំរីករាយ បើសិនជាមានការជួយរកទីផ្សារបន្ថែមដល់កសិករ ដើម្បីជៀសវាងការចាល់នៅលើទីផ្សារពេលគាត់ប្រមូលផងម្តងៗ»៕ អត្ថបទដោយ ៖ វណ្ណ សុជាតា
Account
Security
Favourite Content