ភ្នំពេញ ៖ ជាង១០ឆ្នាំមកហើយដែលកម្ពុជាព្យាយាមអភិវឌ្ឍន៍វិស័យមូលបត្រ ដើម្បីឱ្យក្លាយជាបង្អែកដ៏រឹងមាំមួយសម្រាប់សេដ្ឋកិច្ចជាតិ។  បច្ចុប្បន្ន ទោះវិស័យនេះមានភាពរីកចម្រើនយឺតជាងប្រទេសជិតខាង ដូចជា វៀតណាម និងថៃ ក្តី ក៏ប៉ុន្តែក្នុងរយៈពេលប៉ុន្មានឆ្នាំចុងក្រោយនេះ វិស័យមូលបត្រកម្ពុជាមានសន្ទុះរីកចម្រើនខ្លាំងគួរកត់សម្គាល់។នេះបើតាមការលើកឡើងរបស់ លោក ហុង សុហួរ អគ្គនាយកនៃផ្សារមូលបត្រកម្ពុជា (CSX) ។

នៅក្នុងវេទិកាក្រុមហ៊ុនចុះបញ្ជីក្រោមកិច្ចសហការរវាងផ្សារមូលបត្រកម្ពុជា និងធនាគារ អេស៊ីលីដា ភីអិលស៊ី កាលពីពេលថ្មីៗនេះ លោក ហុង សុហួរ បានថ្លែងឱ្យដឹងថា៖ ចាប់តាំងពីចុងឆ្នាំ២០១៨មក វិស័យមូលបត្រកម្ពុជាទទួលបានការចាប់អារម្មណ៍ពីវិនិយោគិនយ៉ាងគំហុកដោយកើននូវការជួញដូរប្រចាំថ្ងៃក្នុងទំហំប្រាក់ប្រមាណ១ម៉ឺនដុល្លារក្នុងឆ្នាំ២០១៧ កើនដល់ជាង២ម៉ឺនដុល្លារក្នុង១ថ្ងៃសម្រាប់ឆ្នាំ​២០​១​៨​។ សម្រាប់ឆ្នាំ២០១៩ ទំហំជួញដូរភាគហ៊ុនជាមធ្យមនៅក្នុងទីផ្សារបានឡើងដល់១៥ម៉ឺនដុល្លារក្នុងមួយថ្ងៃ។ ទំហំនេះកើនដល់ជាង២៥ម៉ឺនដុល្លារក្នុងមួយថ្ងៃសម្រាប់ឆ្នាំ២០២០។

លោកអគ្គនាយក CSX បានលើកឡើងថា ៖

«តួលេខទាំងនេះបានបង្ហាញឱ្យឃើញថា វិស័យមូលបត្ររបស់កម្ពុជា ជាពិសេសទីផ្សារភាគហ៊ុន គឺមានការកើនឡើងគួរឱ្យកត់សម្គាល់ ក៏ប៉ុន្តែ កំណើននេះហាក់មានកម្រិតនៅឡើយបើធៀបទំហំសេដ្ឋកិច្ចជាតិដែលមានប្រមាណ ៣០លានដុល្លារអាម៉េរិក។ ក្នុងមួយឆ្នាំៗ ម្ចាស់អាជីវកម្មនៅយើងស្រុកកៀរគរទុនពីទីផ្សារមូលបត្របានមិនដល់១០០លានដុល្លារផង តែប្រទេសជិតខាងថៃ និងវៀតណាមវិញ គេកៀរគរទុនពីវិស័យនេះបានដល់រាប់ពាន់លានដុល្លារក្នុងមួយឆ្នាំៗ»។

សម្រាប់សាធារជនដែលវិនិយោគក្នុងវិស័យភាគហ៊ុនក៏មានចំនួនតិចតួចផងដែរ។ ក្នុងចំណោមប្រជាជនកម្ពុជា ១,៧លានដុល្លារ គឺមានត្រឹមប្រមាណ ៥,៥ម៉ឺននាក់ប៉ុណ្ណោះដែលបានបើកគណនីជួញដូរភាគហ៊ុន។ ទោះ វឌ្ឍនភាពនៃវិស័យមូលបត្រកម្ពុជានៅយឹតឆ្ងាយខ្លាំង ពីប្រទេសជិតខាងយ៉ាងនេះក្តី តែលោកអគ្គនាយកនៃផ្សារមូលបត្រកម្ពុជាមើលឃើញបញ្ហានេះ គឺសក្តានុពល។ មានន័យថា ប្រសិនបើយើងមានលទ្ធភាពអាចកៀរគរមនុស្សឱ្យបាន១លាននាក់មកបើកគណនីជួញដូរភាគហ៊ុន ហើយម្នាក់ៗដាក់វិនិយោគត្រឹម១០០០ដុល្លារ នោះក្នុងមួយឆ្នាំទុនវិនិយោគក្នុងផ្សារហ៊ុនមានដល់១០០០លានដុល្លារ ហើយលុយវិនិយោគទាំងនោះ នឹងត្រលប់ទៅម្ចាស់អាជីវកម្មមួយៗសម្រាប់យកទៅពង្រីកអាជីវកម្មនៅក្នុងសកម្មភាពសេដ្ឋកិច្ច។

បច្ចុប្បន្ន ផ្សារមូលបត្រកម្ពុជាមានក្រុមហ៊ុនចុះបញ្ជីចំនួន១៨ ដែលមានក្រុមហ៊ុន៩បានចុះបញ្ជីជាភាគហ៊ុន និង ៩ទៀត បានចុះបញ្ជីជាសញ្ញបណ្ណ។ ក្រុមហ៊ុនទាំង១៨ កៀរគរទុនពីទីផ្សារមូលបត្របានចំនួន ៣១៧លានដុល្លារអាម៉េរិក។ ក្នុងចំណោម ក្រុមហ៊ុនទាំង៩ដែលបានចុះបញ្ជីក្នុងផ្សារហ៊ុនភាគហ៊ុន ក៏មាននូវវត្តមានធនាគារអេស៊ីលីដាមួយផងដែរ។

លោក ហុង សុហួរ អគ្គនាយកនៃផ្សារមូលបត្រកម្ពុជាបានបញ្ជាក់ថា៖

«សេដ្ឋកិច្ចជាតិ មិនអាចរីកចម្រើនអស់សក្តានុពលបានឡើយ បើសិនវិស័យមូលបត្រមិនរីកចម្រើនដូច្នេះទាមទារឱ្យ​តួអង្គពាក់ព័ន្ធទាំងអស់ត្រូវចូលរួមក្នុងវិស័យនេះដើម្បីផលប្រយោជន៍​សេដ្ឋកិច្ចប្រទេសទាំងមូល»។

លោក ស៊ូ សុជាតិ ប្រតិភូរាជរដ្ឋាភិបាលទទួលបន្ទុកជាអគ្គនាយកនៃនិយ័តករមូលបត្រកម្ពុជា ធ្លាប់មានប្រសាសន៍នាពេលកន្លងមកថា ៖ សម្រាប់ប្រទេសកម្ពុជា ថ្វីដ្បិតតែចាប់ផ្តើមទីផ្សារវិស័យមូលបត្រក្រោយគេ ជាទីផ្សារមួយតូច ក្មេងខ្ចី ប៉ុន្តែដំណើរការនៃការអភិវឌ្ឍវិស័យនេះគឺដើរទន្ទឹមនឹងនិន្នាការថ្នាក់តំបន់ និងនិន្នាការសាកលលោក។