បរទេស ៖ ក្រោយទទួលបានយន្តហោះចម្បាំងផលិតនៅអាមេរិក F-16 ដំបូងរួចមកមក កំដៅរវាងអ៊ុយក្រែន និងរុស្ស៊ី ហាក់ដូចជាមិនចុះត្រជាក់នោះឡើយ ពីព្រោះយោធាអ៊ុយក្រែន អាចមានសមត្ថភាពក្នុងការវាយចូលជ្រៅដល់ទឹកដីរបស់រុស្ស៊ីបានហើយក្រោយពីបានទាមទារអស់រយៈពេលជាច្រើនខែពីសំណាក់រដ្ឋាភិបាលក្រុងគៀវ។ កាន់តែគួរឲ្យចង់តាមដានបន្ថែមទៀតសម្រាប់ជម្លោះដែលបានផ្ទុះឡើងតាំងតែពីឆ្នាំ២០២២នេះ រដ្ឋាភិបាលអាមេរិកកាលពីពាក់កណ្តាលខែសីហាកន្លងមកនេះបានបង្ហើបពីផែនការក្នុងការផ្តល់សព្វាវុធទំនើបមួយប្រភេទទៀតដែលអាចវាយចូលកាន់តែជ្រៅទៅក្នុងប្រទេសរុស្ស៊ី។

រដ្ឋាភិបាលក្រុងវ៉ាស៊ីនតោន កាលពិថ្ងៃទី១៥ ខែសីហាកន្លងមកនេះ បានចាប់ផ្តើមពិចារណា និងពិភាក្សាក្នុងការបើកភ្លើងខៀវដោយអនុញ្ញាតឲ្យមានការផ្គត់ផ្គង់ជំនួយជាគ្រាប់មីស៊ីលបច្ចេកវិទ្យាទំនើបបំផុតរបស់ខ្លួន និងត្រូវបានគេស្គាល់ថា JASSM(Joint Air-to-Surface Standoff Missile ប្រភេទ AGM-158 ទៅឲ្យយោធាអ៊ុយក្រែន។

មីស៊ីលប្រភេទនេះមានតម្លៃខ្លាំងណាស់ ប៉ុន្តែវាអាចធ្វើការវាយប្រហារតាមផ្លូវវអាកាសបានយ៉ាងងាយស្រួល និងបានចំងាយឆ្ងាយ ជាពិសេសគឺអាចបំពាក់ជាមួយនឹងយន្តហោះចម្បាំង F-16 ដែលទើបផ្តល់ឲ្យអ៊ុយក្រែននោះផងដែរ។ តាមតម្លៃទីផ្សារបច្ចុប្បន្ន អាមេរិកដាក់លក់មីស៊ីលទាំងនេះក្នុងតម្លៃប្រមាណជា ៧០ម៉ឺនដុល្លារក្នុងមួយគ្រាប់ ហើយអាចវាយប្រហារក្នុងចំងាយពី៤០០គីឡូម៉ែត្រទៅដល់៩០០គីឡូម៉ែត្រជាមួយនឹងក្បាលគ្រាប់ផ្ទុះទំងន់ដល់ទៅជាង៤០០គីឡូក្រាម។

JASSM ត្រូវបានដាក់ឲ្យប្រើប្រាស់ជាផ្លូវការក្នុងជួរទ័ពអាកាសអាមេរិកតាំងតែពីឆ្នាំ២០០៩ វាក៏ធ្លាប់ត្រូវបានប្រើប្រាស់នៅក្នុងប្រតិបត្តិការសង្គ្រាមនៅស៊ីរីកាលពីឆ្នាំ២០១៨ និងក៏ធ្លាប់បានវាយប្រហារសម្លាប់មេដឹកនាំក្រុម IS ដែលមានឈ្មោះថា Abu Bakar al Baghdadi កាលពីឆ្នាំ២០១៩ ទៀតផង។

យ៉ាងណាក្តី យោងតាមអ្នកជំនាញស្រាវជ្រាវមកពីវិទ្យាស្ថានសិក្សាយោធា Royal United Services Institute លោក Justin Bronk បានលើកឡើងថា ថ្វីត្បិតតែ JASSM នឹងអាចជួយឲ្យអ៊ុយក្រែនក្នុងការវាយប្រហារបានឆ្ងាយជាងមុនចូលជ្រៅដល់ទឹកដីរុស្ស៊ីទាំងមូលដ្ឋានទ័ពសំខាន់រហូតទៅដល់ទីមេបញ្ជាការ និងមូលដ្ឋានទ័ពរុស្ស៊ីនៅ Crimea ក្តី ប៉ុន្តែ លោកជឿជាក់ថា បញ្ហាតម្លៃនៃមីស៊ីល និងដំណើរការរៀបចំ ការផ្គត់ផ្គង់ គឺជារឿងដែលស្មុគ្រស្មាញ និងផ្តល់ផលលំបាកសម្រាប់អាមេរិកក្នុងនាមជាអ្នកឧបត្ថម្ភធំ។

លោក Bronk បានបន្តទៀតថា មិនដែលមានប្រវត្តិនៃការប្រើប្រាស់មីស៊ីលចំងាយឆ្ងាយ ហើយយកឈ្នះសង្គ្រាមនោះទេ ប៉ុន្តែខ្ទង់ចំណាយដ៏ច្រើនទាំងការដឹកជញ្ជូន និងការចំណាយពាក់ព័ន្ធផ្សេងទៀតនឹងបានត្រឹមធ្វើឲ្យលទ្ធផលនៃជម្លោះស្ថិតនៅក្នុងភាពកាន់តែស្រពិចស្រពិលប៉ុណ្ណោះ។

បន្ថែមពីលើនេះ អ្នកជំនាញម្នាក់ដែលត្រូវបានគេស្គាល់ឈ្មោះថា Phillips P. O’Brien ​ដែលជាអ្នកសរសេរអត្ថបទស្រាវជ្រាវនៅ Substack បានចង្អុលបង្ហាញថា៖ មកទល់ពេលនេះ JASSM គឺស្ថិតនៅត្រឹមដំណាក់កាលពិភាក្សាគ្នានៅឡើយសម្រាប់រដ្ឋាភិបាលអាមេរិក ប៉ុន្តែយើងបានដឹងឮមកហើយថា កន្លងមកអ្វីដែលយោធាអាមេរិកមិនចង់មើលឃើញបំផុតនោះគឺបច្ចេកវិទ្យាអាវុធរបស់ខ្លួននឹងធ្លាក់ទៅដល់ដៃក្រុមដែលពួកគេមិនចង់ឲ្យដោយបារម្ភថា បច្ចេកវិទ្យាអាវុធទាំងនោះនឹងត្រូវបានភាគីសត្រូវអាចរៀនសូត្របាន និងចាប់បានចំណុចខ្សោយរបស់ខ្លួនទៅវិញ៕