ភ្នំពេញ៖ ក្រុមហ៊ុនអាកាសចរណ៍ជាតិកម្ពុជា Air Cambodia កាលពីចុងសប្តាហ៍កន្លងទៅនេះ បានបើកជើងហោះហើរត្រង់ជាលើកដំបូង​ពីខេត្តសៀមរាប ភាគពាយ័ព្យនៃប្រទេសកម្ពុជា ទៅកាន់ទីក្រុងសិនជិន ភាគខាងត្បូងនៃប្រទេសចិន។ នេះជាព្រឹត្តិការណ៍នៃការសម្ពោធធជើងហោះហើរត្រង់លើកដំបូងរវាងរមណីយដ្ឋានប្រវត្តិសាស្រ្តអង្គរ ដែលជាបេតិកភណ្ឌពិភពលោក និងទីក្រុងសិនជិន ដែលជាទីក្រុងមួយក្នុងចំណោមទីក្រុងធំៗទាំងបួនរបស់ប្រទេសចិន (ទីក្រុងប៉េកាំង ទីក្រុងសៀងហៃ ទីក្រុងក្វាងចូវ និង ទីក្រុងសិនជិន)។

ការបន្ថែមជើងហោះហើរថ្មីនេះនឹងផ្តល់ជាជម្រើសកាន់តែងាយស្រួលសម្រាប់អ្នករស់នៅក្នុងតំបន់សេដ្ឋកិច្ចពិសេសនៃឈូងសមុទ្រ (Greater Bay Area) របស់ប្រទេសចិន ដោយអាចហោះហើរចូលមកកាន់ខេត្តសៀមរាប ចេញ​ទៅវិញតាមរាជធានីភ្នំពេញ ឬចូលមករាជធានីភ្នំពេញ និងចេញទៅវិញតាមខេត្តសៀមរាប ដែលជួយកាត់បន្ថយការធ្វើដំណើរ សន្សំសំចៃពេលវេលាបានយ៉ាងតិចមួយថ្ងៃ និងបង្កើនបទពិសោធន៍សំរាប់ការធ្វើដំណើរឱ្យកាន់តែប្រសើរឡើង ខណៈដែលក្នុងពេលបច្ចុប្បន្ននេះ មានភ្នាក់ងារទេសចរជាច្រើននៅក្នុងតំបន់ខាងលើបានបញ្ចេញលក់ផលិតផលទេសចរថ្មីមួយនេះ ស្ថិតក្នុងយុទ្ធនាការ  “នាំយកទេសចរ ១០០០ នាក់ពីទីក្រុងក្វាងចូវ និងទីក្រុងសិនជិន ធ្វើដំណើរកំសាន្តមកកាន់ពីរតំបន់រួមគ្នានៃប្រទេសកម្ពុជា គឺ រាជធានីភ្នំពេញ និងខេត្តសៀមរាប” ។

គួររំលឹកថា៖ នាវេលាម៉ោង៧ និង៥០នាទីព្រឹក ថ្ងៃទី១៨ ខែកក្កដា ឆ្នាំ២០២៥ ជើងយន្តហោះហើរលេខ K៦៩២៩ របស់ក្រុមហ៊ុនអាកាសចរណ៍ជាតិកម្ពុជា ដែលបានត្រលប់មកពីទីក្រុងសិនជិន ប្រទេសចិន បានចុះចតដោយសុវត្ថិភាពនៅអាកាសយានដ្ឋានអន្តរជាតិសៀមរាបអង្គរ​ ដោយផ្ទុកអ្នកដំណើរពេញមួយយន្តហោះ ។ នៅឯអាកាសយានដ្ឋានអន្តរជាតិសៀមរាបអង្គរ ក៏បានរៀបចំការបាញ់ទឹកដើម្បីអបអរទទួលស្វាគមន៍ជើង​ហោះ​ហើរដំបូងនេះផងដែរ ។

ពិធីស្វាគមន៍ទទួលជើងហោះហើរថ្មីប្រារព្វឡើងនៅពីរទីតាំងផ្សេងគ្នា គឺខេត្តសៀមរាប ប្រទេសកម្ពុជា និងទីក្រុងសិនជិន ប្រទេសចិន ដោយមានការចូលរួមពីសំណាក់ថ្នាក់ដឹកនាំសំខាន់ៗរបស់ប្រទេសកម្ពុជា និងចិន រួមមាន ឯកឧត្តម ជា អូន រដ្ឋលេខាធិការអចិន្ត្រៃយ៍នៃរដ្ឋលេខាធិការដ្ឋានអាកាសចរស៊ីវិលកម្ពុជា, ឯកឧត្តម ង៉ូវ សេងកាក់​ អភិបាលរងខេត្តសៀមរាប, លោកជំទាវ សឿង រដ្ឋចាវី ​ឯកអគ្គរាជទូតវិសាមញ្ញ​ និងពេញសមត្ថ​ភា​ព​ នៃព្រះរាជាណាចក្រកម្ពុជា ប្រចាំសាធារណរដ្ឋប្រជាមានិតចិន, លោក Zhang Zhaoxin តំណាងការិយាល័យអគ្គកុងស៊ុលចិនប្រចាំខេត្តសៀមរាប នៃស្ថានទូតចិនប្រចាំកម្ពុជា, ឯកឧត្តម ហង្ស សណ្តាប់ អនុរដ្ឋលេខាធិការក្រសួងទេសចរណ៍ និងការិយាល័យតំណាងផ្សេងៗរបស់ទីក្រុងសិនជិន មានដូចជា​ ការិយាល័យដឹកជញ្ជូន វប្បធម៌ វិទ្យុ ទូរទស្សន៍ ទេសចរ និងកីឡា និង ការិយាល័យកិច្ចការបរទេស ។ ក្រុមថ្នាក់ដឹកនាំទាំងអស់បានចូលរួមអបអរចំពោះក្រុមហ៊ុនអាកាសចរណ៍ជាតិកម្ពុជា ហើយជូនពរដល់អ្នកដំណើរទាំងអស់ធ្វើដំណើរប្រកបដោយសុវត្ថិភាព និងផាសុកភាព ។

ជើងហោះហើរត្រង់នេះ ដំណើរការរៀងរាល់សប្តាហ៍ដោយប្រើប្រាស់យន្តហោះប្រភេទ អ៊ែរប៊ើស អេ៣២០ឬ អេ៣២១ (Airbus A320/A321)។ ការចេញដំណើរពីខេត្តសៀមរាបទៅទីក្រុងសិនជិនជារៀងរាល់ថ្ងៃព្រហស្បតិ៍ វេលាម៉ោង ២១:៣០ នាទីយប់ និងត្រឡប់ពីក្រុងសិនជិនមកខេត្តសៀមរាបវិញ នៅម៉ោង ០៦:២០ ព្រឹកថ្ងៃសុក្រ។ ការធ្វើដំណើរចំណាយពេលហោះហើរប្រមាណជា ២ម៉ោងកន្លះ ក្នុងមួយជើង និងក្រុមហ៊ុនផ្តល់ជូននូវសេវាកម្មពីរប្រភេទជូនអ្នកដំណើរដោយរួមមាន ថ្នាក់ធុរកិច្ច (Business class) និង ថ្នាក់ធម្មតា (Economy class)​។

លោក Zhan David អនុប្រធានក្រុមប្រឹក្សាភិបាលនិងជានាយកប្រតិបត្តិក្រុមហ៊ុនអាកាសចរណ៍ជាតិកម្ពុជា បានថ្លែងថា៖ “ថ្ងៃទី១៩ ខែកក្កដា គឺជាខួបលើកទី៦៧ នៃការបង្កើតទំនាក់ទំនងការទូតរវាងប្រទេសកម្ពុជា និងប្រទេសចិន។ ការចាប់ផ្តើមជើងហោះហើរត្រង់ថ្មីមួយនេះអាចសំរេចទៅបាន ដោយសារមានការសហការណ៍យ៉ាងពេញលេញពីក្រុមហ៊ុន Shenzhen Airport Group និងក្រុមហ៊ុន Yunnan Air Investment (Cambodia) Airport Management Co., Ltd. ហើយវាបានចូលរួមក្នុងការបំពេញបន្ថែមនូវចន្លោះទីផ្សារសម្រាប់ជើងហោះហើរត្រង់រវាងខេត្តសៀមរាប ទៅកាន់ទីក្រុងមួយក្នុងចំណោមទីក្រុងលំដាប់ធំៗទាំងបួនរបស់ប្រទេសចិន​ លើសពីនេះវាមិនត្រឹមតែជួយសម្រួលដល់ការធ្វើដំណើររបស់ភ្ញៀវទេសចរពីតំបន់សេដ្ឋកិច្ចពិសេសនៃឈូងសមុទ្រ (Greater Bay Area) របស់ប្រទេសចិននោះទេ ប៉ុន្តែវានឹងជួយទាក់ទាញឱ្យភ្ញៀវទេសចរអឺរ៉ុប និងអាមេរិកមួយចំនួនធំ ដែលកំពុងស្ថិតនៅក្នុងខេត្តសៀមរាប អាចបន្តដំណើរទៅកាន់ប្រទេសចិនផងដែរ។​ នេះគឺជាជំហានដ៏រឹងមាំដើម្បីឆ្ពោះទៅរកការសម្រេចបាននូវចក្ខុវិស័យថ្មីដែលបានកំណត់ដោយថ្នាក់ដឹកនាំប្រទេសទាំងពីរកាលពីខែមេសាកន្លងទៅ “ឆ្នាំទេសចរណ៍កម្ពុជា-ចិន ២០២៥” ដែលជាគំនិតផ្តួចផ្តើមរួមគ្នាមួយរវាងរដ្ឋាភិបាលកម្ពុជា និងរដ្ឋាភិបាលចិន ដើម្បីជំរុញវិស័យទេសចរណ៍ និងការផ្លាស់ប្តូរវប្បធម៌រវាងប្រទេសទាំងពីរឱ្យកាន់តែខ្លាំងក្លា​ ក្នុងចំណងកិច្ចសហប្រតិបត្តិការដែលមានអាយុកាល ៦៧ ឆ្នាំ”៕