យោងតាមតួលេខដែលបានរកឃើញដោយ The Growth Summit 2023 បង្ហាញថា កាលពីឆ្នាំ២០២២ ការលក់ស្មាតហ្វូននៅទូទាំងសកលលោកបានដាំក្បាលចុះជាលើកដំបូងគួរឲ្យភ្ញាក់ផ្អើលគិតចាប់តាំងតែពីឆ្នាំ២០១៣។

ការលក់ស្មាតហ្វូននៅក្នុងទីផ្សារសកលបានធ្លាក់ចុះដល់ទៅ១៨ភាគរយកាលពីឆ្នាំកន្លងទៅ ពោលគឺមានត្រឹមតែ ១,២ពាន់លានគ្រឿងប៉ុណ្ណោះដែលបានលក់ដាច់ ប៉ុន្តែយោងតាមអ្នកជំនាញបានចង្អុលនូវមូលហេតុធំៗមួយចំនួនដែលក្នុងនោះគួរឲ្យកត់សំគាល់ជាងគេគឺក្រុមមនុស្សជំនាន់ថ្មី Gen Z បាននាំគ្នាងាកទៅប្រើប្រាស់ទូរស័ព្ទស៊េរីចាស់ ឬ Dumb Phone ជាជាងការប្រើប្រាស់ទូរស័ព្ទស្មាតហ្វូន ឬហៅថា Feature Phone ។

កិច្ចប្រជុំកំពូល The Growth Summit 2023 ដែលនឹងធ្វើឡើងនៅក្នុងប្រទេសសិង្ហបុរីឆ្នាំនេះបានស្រាវជ្រាវរកឃើញថា គិតត្រឹមទីផ្សាររបស់អាមេរិកប៉ុណ្ណោះចំនួននៃការលក់ទូរស័ព្ទចាស់ៗ ឬ Dumb phone មានការកើនឡើងគួរឲ្យភ្ញាក់ផ្អើល ហើយអ្នកជំនាញជាច្រើនមើលឃើញថាក្រុមមនុស្សជំនាន់ថ្មី ឬ Gen Z នឹងអាចឈានទៅដល់ការបញ្ឈប់ការប្រើប្រាស់ស្មាតហ្វូនរបស់ខ្លួនស្ទើរតែទាំងស្រុងទៀតផងនាពេលអនាគត។

Gen Z ដែលជាក្រុមពលរដ្ឋដែលមានវ័យក្មេង និងចូលចិត្តប្រើប្រាស់បច្ចេកវិទ្យា ហើយពួកគេភាគច្រើនកើតនៅចន្លោះពីឆ្នាំ១៩៩០ ដល់ឆ្នាំ២០០០ ប៉ុន្តែស្ថានភាពនេះហាក់ដូចជាផ្ទុយស្រឡះ ពីព្រោះថាចំនួននៃក្រុមនេះកាន់តែច្រើនបែរជានាំគ្នាទៅប្រើប្រាស់ Dumb phone វិញដោយយល់ឃើញថាវានឹងជួយឲ្យពួកគេគេចចេញពីកញ្ចក់ទូរស័ព្ទក្នុងរយៈពេលវែងដែលអាចនាំឲ្យទៅដល់ការធ្វើឲ្យប្រសើរឡើងនៃបញ្ហាសុខភាពផ្លូវចិត្តបានយ៉ាងខ្លាំងផង។

​Dumb phone គឺជាទូរស័ព្ទដែលផលិតឡើងក្នុងអំឡុងទសវត្សរ៍ឆ្នាំ២០០០ ហើយពួកវាអាចប្រើប្រាស់បានក្នុងមុខងារតិចតួចបំផុតដូចជាការខលហៅគ្នា និងផ្ញើសារប៉ុណ្ណោះដែលពុំមានមុខងារច្រើនដូចជាទៅនឹងស្មាតហ្វូន ឬ Feature phone បច្ចុប្បន្នឡើយ។

ជាទូទៅក្រុមមនុស្ស Gen Z បានចំណាយពេលវេលាដល់ទៅ៧,២ម៉ោងជារៀងរាល់ថ្ងៃជាមួយនឹងស្មាតហ្វូនរបស់ពួកគេដែលអ្នកជំនាញមើលឃើញថាជាកត្តានាំឲ្យមានកើតទៅជាជំងឺផ្លូវកាយមួយចំនួន និងជាពិសេសជំងឺផ្លូវសុខភាពអារម្មណ៍ ដូចជាជំងឺបាក់ទឹកចិត្ត និងប្រឈមមុខទៅនឹងការឡើងគីឡូខ្លាំងទៀតផង៕