សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
កំពត៖ ខេត្តកំពត ដែលជាដែនដីដ៏ស្រស់បំព្រង មានតំបន់ឆ្នេរសមុទ្រ ស្ថិតភាគខាងត្បូងនៃប្រទេសកម្ពុជា កំពុងអំណោយផលដល់វិស័យទេសចរណ៍ធម្មជាតិ និងកែច្នៃយ៉ាងមានសោភ័ណភាព និងអាចទាក់ទាញការវិនិយោគបានយ៉ាងច្រើន។ ដោយឡែក សម្រាប់វិស័យកសិកម្មឯណោះវិញ បច្ចុប្បន្ននេះ ជាការកត់សម្គាល់ មានប្រជាកសិករកាន់តែច្រើន បាន និងកំពុងអនុវត្តប្រព័ន្ធកសិកម្មរួមបញ្ចូលគ្នា ដើម្បីទទួលបានទិន្នផលល្អ និងប្រយោជន៍រួមគ្នា ដូចជា ការដាំដុះដំណាំចម្រុះ និងការចិញ្ចឹមសត្វនៅលើផ្ទៃដីតែមួយ ក្រោមការជំរុញ លើកទឹកចិត្តពីសំណាក់មន្ត្រីកសិកម្មប្រចាំមូលដ្ឋានផ្ទាល់ ដើម្បីធ្វើយ៉ាងណាលើកកម្ពស់ និងធ្វើពិពិធកម្មកសិកម្មក្នុងតំបន់ឱ្យកាន់តែប្រសើរបន្ថែមទៀត។
មន្ត្រីជំនាញបច្ចេកទេសកសិកម្ម ប្រចាំឃុំត្រពាំងបី ស្រុកឈូក ខេត្តកំពត លោក ជឹម ង៉ុយ បានឱ្យដឹងថា ការធ្វើកសិកម្មចម្រុះអាចផ្តល់នូវអត្ថប្រយោជន៍ច្រើនយ៉ាង ដូចជាការបង្កើនគុណភាពដី ជំរុញកំណើនទិន្នផល និងគុណភាពចំណីអាហារ មានតម្រូវការទីផ្សារ អាចធានាដល់សន្ដិសុខស្បៀង និងអាចជួយលើកកម្ពស់ជីវភាពកសិករឱ្យកាន់តែប្រសើរ។
លោក ជឹម ង៉ុយ បានបញ្ជាក់ថា ៖
« កសិករទទួលបានអត្ថប្រយោជន៍យ៉ាងច្រើនពីការអនុវត្តនូវវិធីសាស្ត្រមួយនេះ ជាក់ស្ដែង កសិករដែលប្រកបរបរកសិកម្មរួមគ្នានៅក្នុងឃុំរបស់ខ្ញុំ ជាទូទៅ មានជីវភាពប្រសើរជាងកសិករដែលផ្តោតលើដំណាំតែមួយមុខ ឬចិញ្ចឹមសត្វតែមួយប្រភេទ »។
ប្រជាកសិករ ដែលកំពុងប្រកបរបរកសិកម្មចម្រុះស្ថិតនៅក្នុងភូមិសាស្ត្រខាងលើនេះបានឱ្យដឹងដែរថា បច្ចុប្បន្ននេះ ពួកគាត់បាន និងកំពុងដាំដំណាំច្រើនប្រភេទ រួមមាន ៖ ដូង ខ្នុរ ស្វាយ ចេក ល្ហុង និងបន្លែផ្សេងៗ ដូចជា សណ្តែកគួរ ត្រកួន ពោត ត្រប់ ម្ទេស និងមានចិញ្ចឹមមាន់ ទា ជ្រូក គោ និង ត្រីជាដើម ។ ដោយឡែក សម្រាប់លាមកសត្វចិញ្ចឹមគឺយកទៅធ្វើជីសម្រាប់ដាំបន្លែ និងដំណាំ ហើយយកបន្លែ និងផ្លែឈើ ដែលមិនបានប្រើប្រាស់ច្នៃធ្វើជាចំណីឱ្យសត្វ និងត្រីវិញ ដែលការកែច្នៃជាលក្ខណៈវិលជុំបែបនេះបានជួយកាត់បន្ថយការចំណាយថវិកាទៅលើការទិញជីគីមី និងចំណីសត្វពីទីផ្សារ ។
អ្នកស្រី ស៊ាន ធីតា ដែលជាកសិករកំពុងអនុវត្តកម្មវិធីប្រព័ន្ធកសិកម្មចម្រុះបានបញ្ជាក់យ៉ាងដូច្នេះថា ៖
«ពីមុនខ្ញុំចិញ្ចឹមទាតែមួយមុខ លុះពេលមានអាកាសធាតុប្រែប្រួល ឬសត្វមានជំងឺឆ្លងត្រូវប្រឈមនឹងការខាតបង់ច្រើន ព្រោះទាងាប់ជាបន្តបន្ទាប់មិនអាចលក់នៅលើទីផ្សារបាន។ ប៉ុន្តែពេលនេះ ក្រៅពីចិញ្ចឹមទា ខ្ញុំបានដាក់មាន់ខ្លះ ហើយឆ្លៀតដាំដំណាំខ្លះនៅក្បែរផ្ទះខ្លះ បើទោះជាចំណូលបានពីការលក់ទាធ្លាក់ចុះ ក៏ខ្ញុំនៅមានមាន់សម្រាប់លក់ ហើយនៅមានបន្លែខ្លះទៀតដែលអាចលក់វិលជុំបាន ហើយអ្វីដែលល្អបំផុតនោះ រាល់ទិន្នផលទាំងបន្លែ ទាំងមាន់ទាដែលខ្ញុំចិញ្ចឹម គឺអាចទ្រទ្រង់ជីវភាពបានតាមរយៈការកាត់បន្ថយចំណាយទៅលើម្ហូបអាហារប្រចាំថ្ងៃបានមួយកម្រិត»។
សូមកត់សម្គាល់ផងដែរថា នៅក្នុងឃុំត្រពាំងបី ស្រុកឈូក ខេត្តកំពត មានប្រជាជនសរុបចំនួន ១ ៦០៣ គ្រួសារ ហើយភាគច្រើនមានមុខរបរជាកសិករ ប៉ុន្តែក្នុងចំណោមកសិករទាំងអស់ មានត្រឹមតែប្រមាណ ២០ភាគរយប៉ុណ្ណោះ ដែលបាន និងកំពុងអនុវត្តនូវកម្មវិធី ប្រព័ន្ធកសិកម្មចម្រុះ ឬការអនុវត្តន៍កសិកម្មរួមបញ្ចូលគ្នានេះ។ យ៉ាងណាក៏ដោយ ឆ្លៀតក្នុងឱកាសនេះ លោក ជឺម ង៉ុយ មន្ត្រីជំនាញបច្ចេកទេសកសិកម្មប្រចាំតំបន់ បានលើកទឹកចិត្តឱ្យកសិករទាំងអស់ចូលរួមអនុវត្តប្រព័ន្ធកសិកម្មចម្រុះឱ្យបានកាន់តែច្រើន ដើម្បីអាចប្រែក្លាយពីការដាំដំណាំតាមទម្លាប់ចាស់ មកប្រើប្រាស់បច្ចេកទេសកសិកម្មដែលមានប្រសិទ្ធភាព អាចទទួលបានទិន្នផលច្រើនន្រកបដោយគុណភាព ធានាសុវត្ថិភាពដល់អ្នកទទួលទាន និងអាចជួយលើកកម្ពស់ជីវភាពបានកាន់តែប្រសើរជាងមុន៕
Account
Security
Favourite Content