សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងតាមប្រភពពីសារព័ត៌មានថៃ The Nation បានរាយការណ៍ថា ប្រធានាធិបតីសហរដ្ឋអាម៉េរិក Donald Trump នៅតែរក្សាអត្រាពន្ធគយបដិការលើទំនិញ ៣៦% មិនផ្លាស់ប្តូរលើការនាំចូលពីប្រទេសថៃ ដែលជំរុញឱ្យប្រទេសនេះប្រឈមនឹងភាពតានតឹងសម្រាប់ការចរចាមុនកាលកំណត់ថ្ងៃទី១ ខែសីហា ឆ្នាំ២០២៥ ខាងមុខនេះ។
កាលពីថ្ងៃចន្ទកន្លងទៅនេះ Donald Trump បានប្រកាសពីការដាក់ពន្ធលើប្រទេសចំនួន ១៤ ដោយថៃប្រឈមនឹងអត្រាពន្ធ ៣៦% ដដែលពីអាម៉េរិក ដោយមិនបានទម្លាក់ចុះនោះទេ ខណៈដែលអត្រាពន្ធរបស់វៀតណាមត្រូវបានបន្ទាបពី ៤៦% មកត្រឹម ២០% ហើយកម្ពុជាបន្ទាបពី ៤៩% មកនៅត្រឹម៣៦% ។
អ្នកជំនាញបានព្រមានថា ការដាក់ពន្ធនេះនឹងធ្វើឲ្យប្រទេសថៃធ្លាក់ចុះការប្រកួតប្រជែងយ៉ាងខ្លាំង ហើយក៏ប្រឈមនឹងសម្ពាធក្នុងការចរចាបន្តលើកិច្ចព្រមព្រៀងក្នុងថេរវេលាដែលនៅសល់ ពោលគឺមុនថ្ងៃចាប់អនុវត្ត ទី១ ខែសីហា ឆ្នាំ២០២៥ ។ អត្រាពន្ធគយ ៣៦% នឹងដាក់សម្ពាធកាន់តែធ្ងន់ធ្ងរ និងតានតឹងទៅលើឧស្សាហកម្មសម្រាប់ការនាំចេញរបស់ប្រទេសថៃ ហើយវិនិយោគិនបរទេសអាចផ្លាស់ប្តូរមូលដ្ឋានផលិតកម្មពីប្រទេសថៃទៅកាន់ប្រទេសណាមួយដែលមានពន្ធទាប និងអាចកាត់បន្ថយការប្រកួតប្រជែងរបស់ថៃ។
លោក Kobsak Pootrakool សេដ្ឋវិទូ និងជាអ្នកជំនាញខាងគោលនយោបាយម៉ាក្រូសេដ្ឋកិច្ចបានបង្ហាញពីទស្សនៈផ្ទាល់ខ្លួនថា ពន្ធ ៣៦% ដែលដាក់លើប្រទេសថៃគឺនៅដដែលដូចនឹងជុំទីមួយ ដែលជាសញ្ញាព្រមានថា អាម៉េរិកមិនពេញចិត្តសំណើដែលថៃបានដាក់ទៅនោះទេ ហើយវាក៏មិនត្រូវបានចាត់ទុកថាជាកិច្ចព្រមព្រៀងល្អនៅក្នុងទស្សនៈរបស់ Trump នោះដែរ។
លោក Kobsak បានសង្កត់ធ្ងន់ថា ថៃគួររៀបចំការងារនៅផ្ទះរបស់ខ្លួនបន្ថែមទៀតមុននឹងត្រឡប់ទៅតុចរចាវិញ បើមិនដូច្នេះទេ លទ្ធផលអាចនឹងបញ្ចប់ជាមួយនឹងពន្ធ ៣៦%ដដែល ហើយអាម៉េរិកប្រហែលជាមិនថយក្រោយទេ។ ទន្ទឹមនឹងនេះ ថៃ មានគុណវិបត្តិបើធៀបនឹងគូប្រជែងរបស់ខ្លួនដូចជា អត្រាពន្ធរបស់វៀតណាមត្រូវបានបន្ទាបមកត្រឹម ២០%, និងម៉ាឡេស៊ី ២៥% ។ បញ្ហានេះនឹងជះឥទ្ធិពលយ៉ាងខ្លាំងដល់ក្រុមហ៊ុននាំចេញរបស់ថៃ ដោយសារដៃគូពាណិជ្ជកម្មអាចជ្រើសរើសទិញទំនិញពីប្រទេសដែលមានការចំណាយទាប និងពន្ធទាប។ ចំពោះផលប៉ះពាល់លើការវិនិយោគវិញ វិនិយោគិនអាចជ្រើសរើសបង្កើតរោងចក្រនៅក្នុងប្រទេសដែលមានអត្រាពន្ធទាបដូចជាវៀតណាមជាដើម។
លោក Korn Chatikavanij អតីតរដ្ឋមន្ត្រីក្រសួងហិរញ្ញវត្ថុ បានលើកឡើងថា ការចរចាជាមួយ Trump ពិតជាពិបាកខ្លាំងណាស់ ហើយមូលហេតុដែលវៀតណាមអាចកាត់បន្ថយពន្ធនាំចូលពីអាម៉េរិកមកត្រឹម 0% គឺដោយសារតែពួកគេមានការប្រកួតប្រជែង និងត្រៀមខ្លួនរួចជាស្រេចជាងថៃនៅក្នុងគ្រប់វិស័យ។ យ៉ាងណាមិញ លោកបានស្នើថា ៖ ទី១ ដ្ឋាភិបាលថៃគួរតែពិនិត្យឡើងវិញនូវថវិកាទាំងមូលនៃឆ្នាំ២០២៥ រួមទាំងប្រភពចំណូល និងការចំណាយផងដែរ។ ប្រសិនបើរដ្ឋាភិបាលបន្តធ្វើអាជីវកម្មដូចធម្មតា ពលរដ្ឋថៃនឹងជួបការលំបាកខ្លាំង។ ទី២ រដ្ឋាភិបាលគួរតែយកចិត្តទុកដាក់ចំពោះផលប៉ះពាល់លើសមតុល្យគណនីចរន្តរបស់ប្រទេស។ ប្រសិនបើឱនភាពកើនឡើងជាបន្តបន្ទាប់ ប៉ុន្តែការវិនិយោគបរទេសធ្លាក់ចុះ នោះវាគឺជារឿងគួរព្រួយបារម្ភបំផុត៕
Account
Security
Favourite Content