បរទេស៖ យោងតាមប្រភពព័ត៌មានពី BBC បានរាយការណ៍ថា ប្រធានាធិបតីសហរដ្ឋអាម៉េរិក Donald Trump ​បានបង្ហើបអំពីគោលបំណង​ទៅ​បំពេញ​ទស្សនកិច្ច​នៅ​ប្រទេស​ចិន ​បន្ទាប់​ពី​មានការសន្ទនាជាមួយនឹងប្រធានាធិបតីចិន Xi Jinping តាម​ទូរស័ព្ទ។

Trump បានបង្ហោះនៅលើបណ្តាញសង្គមថា ៖

«ការសន្ទនារយៈពេលមួយម៉ោងកន្លះបានផ្តោតលើពាណិជ្ជកម្មជាចម្បង ហើយមានលទ្ធផលជាវិជ្ជមានសម្រាប់ប្រទេសទាំងពីរ។ គាត់ (Xi Jinping) បានអញ្ជើញខ្ញុំទៅប្រទេសចិន ហើយខ្ញុំបានអញ្ជើញគាត់មកទីនេះ។ ពួកយើងទាំងពីរនាក់បានទទួលយកការអញ្ជើញទៅវិញទៅមក ហើយខ្ញុំនឹងទៅទីនោះជាមួយស្រ្តីទីមួយនៅពេលណាមួយ ហើយសង្ឃឹមថា គាត់នឹងមកទីនេះជាមួយស្ត្រីទីមួយនៃប្រទេសចិន»។

យ៉ាងណាមិញ ដំណើរទស្សនកិច្ចនេះមិនទាន់បានបញ្ជាក់ពីពេលវលាច្បាស់លាស់នោះទេ។ នេះគឺជាការសន្ទនាតាមទូរស័ព្ទរវាងមេដឹកនាំមហាអំណាចទាំងពីរលើកទីមួយ បើគិតចាប់តាំងពី Trump បានចាប់ផ្តើមសង្គ្រាមពាណិជ្ជកម្មជាមួយទីក្រុងប៉េកាំងតាំងពីក្នុងអំឡុងខែកុម្ភៈ។ ​

យោងតាមសារព័ត៌មានរដ្ឋរបស់ចិន Xinhua បានឲ្យដឹងថា តាមរយៈកិច្ចសន្ទនាគ្នាតាមទូរស័ព្ទ ប្រធានាធិបតីចិន Xi ជំរុញឲ្យ Trump គួរតែដកចេញនូវវិធានការដែលប្រឆាំងនឹងប្រទេសចិន ហើយចិនតែងតែរក្សាការសន្យារបស់ខ្លួនចាប់តាំងពីការឯកភាពគ្នានៅទីក្រុងហ្សឺណែវ។ នៅឯកិច្ចប្រជុំនៅទីក្រុងហ្សឺណែវកាលពីខែឧសភា មហាអំណាចទាំងពីរបានព្រមព្រៀងគ្នាបន្ថយសម្ពាធពាណិជ្ជកម្មសម្រាប់រយៈពេលខ្លី ៩០ ថ្ងៃ ដោយអាម៉េរិកបានទម្លាក់ពន្ធលើទំនិញពីប្រទេសចិនពី ១៤៥% មកត្រឹម ៣០% ខណៈដែលចិនបន្ទាបពន្ធលើទំនិញនាំចូលពីអាម៉េរិក​ពី ១២៥% មកត្រឹម ១០%។ លើសពីនេះ Xi សង្កត់ធ្ងន់ថា សហរដ្ឋអាម៉េរិកគួរតែដោះស្រាយបញ្ហាកោះតៃវ៉ាន់ដោយប្រយ័ត្នប្រយែង ចៀសវាងពួកគេផ្តាច់ខ្លួនដោយឯករាជ្យ ដែលអាចអូសទាញចិន និងសហរដ្ឋអាម៉េរិកឱ្យចូលទៅក្នុងស្ថានភាពជម្លោះដ៏គ្រោះថ្នាក់ និងការប្រឈមមុខគ្នា។

ការសន្ទនាតាមទូរស័ព្ទនេះកើតឡើងបន្ទាប់ពីភាគីទាំងពីរបានចោទប្រកាន់គ្នាទៅវិញទៅមកអំពីការរំលោភលើកិច្ចព្រមព្រៀងកាត់បន្ថយសម្ពាធពាណិជ្ជកម្មរយៈពេល ៩០ ថ្ងៃ ដែលបានព្រមព្រៀងគ្នានៅទីក្រុងហ្សឺណែវ។ អាម៉េរិកបានចោទប្រកាន់ថា ចិនមិនបានដកចេញរបាំងពាណិជ្ជកម្មមិនមែនពន្ធដូចដែលបានព្រមព្រៀងគ្នានោះទេ។ ពួកគេរំពឹងថា ចិននឹងបន្ធូរបន្ថយការរឹតបន្តឹងការនាំចេញសារធាតុរ៉ែកម្រទាំងនោះ ដែលជាផ្នែកសំខាន់ក្នុងការផលិតចាប់តាំងពីគ្រឿងអេឡិចត្រូនិក ទូរស័ព្ទ និងរថយន្តអគ្គិសនី រហូតដល់សព្វាវុធធំៗ ដូចជា យន្តហោះចម្បាំង F-35 និងប្រព័ន្ធមីស៊ីលជាដើម។ យ៉ាងណាមិញ ចិនមិនបានដកការរឹតបន្តឹងនេះទេ ដែលបណ្តាលឱ្យរដ្ឋបាល Trump មិនសប្បាយចិត្ត។ ជាការឆ្លើយតប ទីក្រុងប៉េកាំងបានចោទប្រកាន់វិញថា អាម៉េរិកបានរំលោភលើកិច្ចព្រមព្រៀងរួមមានការបញ្ឈប់ការលក់កម្មវិធីរចនាបន្ទះឈីបទៅឱ្យក្រុមហ៊ុនចិន, ការព្រមានប្រឆាំងមិនឲ្យប្រើប្រាស់បន្ទះឈីបដែលផលិតដោយក្រុមហ៊ុនបច្ចេកវិទ្យាចិន Huawei, និងការលុបចោលទិដ្ឋាការសម្រាប់និស្សិតចិន៕