បរទេស៖ យោងតាមប្រភពព័ត៌មានពី Aljazeera បានរាយការណ៍ថា ប្រធានាធិបតីអាម៉េរិក Donald Trump បានបញ្ចុះបញ្ចូលឱ្យសហភាពអឺរ៉ុបដាក់ពន្ធ ១០០% លើប្រទេសចិន និងឥណ្ឌា ដែលជាផ្នែកនៃកិច្ចខិតខំប្រឹងប្រែងរបស់លោកក្នុងការដាក់សម្ពាធលើរុស្ស៊ីឱ្យបញ្ចប់សង្រ្គាមជាមួយអ៊ុយក្រែន។

កាលពីថ្ងៃអង្គារ៍ សប្ដាហ៍នេះ Trump បានចូលរួមសន្ទនាតាមទូរស័ព្ទនៅក្នុងកិច្ចប្រជុំរបស់មន្ត្រីអាម៉េរិក និងសហភាពអឺរ៉ុប ដោយ​បង្ហាញ​ថា លោក​បាន​ត្រៀម​ខ្លួន​ក្នុង​ការ​ដាក់​ពន្ធ​បន្ថែម​ទៀត​លើ​​ចិន និង​ឥណ្ឌា ដែល​ជា​អ្នក​ទិញ​ប្រេង​ធំ​ទាំងពីរ​របស់​រុស្ស៊ី ប្រសិនបើ​សហភាពអឺរ៉ុប​ព្រម​ធ្វើ​ដូច្នោះ​ដែរ។

កាសែត The Times បានដកស្រង់សម្តីមន្ត្រីអាម៉េរិកដែលមិនបញ្ចេញឈ្មោះបាននិយាយថា ៖

«យើងត្រៀមខ្លួនរួចជាស្រេចដើម្បីចាត់ការរឿងនេះ ប៉ុន្តែយើងអាចធ្វើវាទៅបាន លុះត្រាតែដៃគូអឺរ៉ុបចូលរួមជាមួយយើង»។

សូមរំលឹកថា កាលពីខែមុន Trump បានដំឡើងអត្រាពន្ធទ្វេដងដល់ទៅ ៥០% លើការនាំចូលពីឥណ្ឌា ដោយលើកហេតុផលថា ជាការដាក់ទណ្ឌកម្មដែលប្រទេសនេះបន្តទិញប្រេងក្នុងបរិមាណដ៏ច្រើនពីរុស្ស៊ី។ យ៉ាងណាមិញ Trump បានលើកឡើងថា ទីក្រុងវ៉ាស៊ីនតោន និងញូវដែលី កំពុងបន្តការចរចាលើរបាំងពាណិជ្ជកម្មជាមួយនឹងការទន្ទឹងរង់ចាំនិយាយជាមួយនាយករដ្ឋមន្រី្តឥណ្ឌា Narendra Modi នៅប៉ុន្មានសប្តាហ៍ខាងមុខនេះ។

ជាការឆ្លើយតប​ នាយករដ្ឋមន្រី្តឥណ្ឌា Narendra Modi បង្ហាញពីទំនុកចិត្តថា កិច្ចពិភាក្សានឹងក្លាយជាផ្លូវត្រួសត្រាយសម្រាប់បញ្ចេញនូវសក្តានុពលគ្មានដែនកំណត់នៃភាពជាដៃគូឥណ្ឌា-អាមេរិក។ លោក Modi បានបង្ហោះនៅលើ X ថា «ខ្ញុំក៏ទន្ទឹងរង់ចាំនិយាយជាមួយប្រធានាធិបតី Trump ផងដែរ​ ហើយយើងនឹងធ្វើការជាមួយគ្នាដើម្បីទទួលបានអនាគតដ៏ត្រចះត្រចង់ និងវិបុលភាពបន្ថែមទៀតសម្រាប់ប្រជាជនរបស់ប្រទេសទាំងពីរ»។

ទន្ទឹមនឹងនេះ Trump មិនទាន់កំណត់គោលដៅដល់ប្រទេសចិនពេញលេញនោះទេ ដោយសារទីក្រុងប៉េកាំងកំពុងស្ថិតក្នុងការចរចាកិច្ចព្រមព្រៀងពាណិជ្ជកម្មជាមួយទីក្រុងវ៉ាស៊ីនតោន ពាក់ព័ន្ធនឹងការទិញប្រេងពីអាម៉េរិក។ យ៉ាងណាក៏ដោយគេនៅចាំបានថា ក្នុងអំឡុងពេលយុទ្ធនាការបោះឆ្នោត Trump ធ្លាប់ប្តេជ្ញាចិត្តថា នឹងបញ្ចប់សង្រ្គាមក្នុងប្រទេសអ៊ុយក្រែនយ៉ាងឆាប់រហ័ស ប៉ុន្តែស្ថានភាពជាក់ស្តែងកាន់តែតឹងតែងដែលធ្វើឲ្យការឈានដល់កិច្ចព្រមព្រៀងសន្តិភាពរវាងរុស្ស៊ី-អ៊ុយក្រែនកាន់តែពិបាកខ្លាំងឡើង៕