បរទេស៖ យោងតាមប្រភពព័ត៌មានពី BBC បានរាយការណ៍ថា Elon Musk និងក្រុមអ្នកវិនិយោគបានដាក់សំណើផ្តល់ប្រាក់ជិត ១០០ ពាន់លានដុល្លារដើម្បីកាន់កាប់ក្រុមហ៊ុន OpenAI ដែលជាអ្នកបង្កើត ChatGPT ។

លោក Marc Toberoff មេធាវីរបស់លោក Elon Musk បានលើកឡើងថា Musk បានដាក់សំណើដេញថ្លៃចំនួន ៩៧,៤ ពាន់លានដុល្លារដើម្បីកាន់កាប់ទ្រព្យសម្បត្តិទាំងអស់របស់ក្រុមហ៊ុនបច្ចេកវិទ្យា OpenAI កាលពីថ្ងៃចន្ទសប្ដាហ៍នេះ។

នៅក្នុងសេចក្តីថ្លែងការណ៍មួយ Toberoff បានលើកឡើងថា ក្នុងនាមជាសហស្ថាបនិកនៃ OpenAI និងជាអ្នកដឹកនាំឧស្សាហកម្មបច្ចេកវិទ្យាប្រកបដោយភាពច្នៃប្រឌិត និងជោគជ័យបំផុតក្នុងប្រវត្តិសាស្ត្រ Elon Musk គឺជាមនុស្សដែលមានសមត្ថភាពល្អបំផុតដើម្បីការពារ និងពង្រីកបច្ចេកវិទ្យារបស់ OpenAI។ ការដាក់សំណើនេះគឺជាការកែប្រែចុងក្រោយបំផុតនៅក្នុងជម្លោះរកាំរកូសរាប់ឆ្នាំរវាង Elon Musk ម្ចាស់ក្រុមហ៊ុន Tesla និង Sam Altman នាយកប្រតិបត្តិក្រុមហ៊ុន Open AI។ ជាការឆ្លើយតបទៅនឹងការដេញថ្លៃនេះ លោក Altman បានបង្ហោះនៅលើវេទិកាប្រព័ន្ធផ្សព្វផ្សាយសង្គម X របស់ Musk ថា ខ្លួនអាចនឹងទិញ Twitter ក្នុងតម្លៃ ៩,៧៤ ពាន់លានដុល្លារអាម៉េរិក។

OpenAI ត្រូវ​បានស្គាល់​យ៉ាង​ទូលំទូលាយ ដោយសារវាបាន​​​នាំយកនូវ​ឧបករណ៍​បញ្ញា​សិប្បនិមិត្ត​ចូល​ទៅ​ក្នុង​ចរន្ត​សំខាន់ និង​ជំរុញ​ការ​វិនិយោគ​ដ៏​ធំ​ក្នុង​វិស័យ​នេះ។ Musk និង Altman គឺជាសហស្ថាបនិកក្រុមហ៊ុន start-up OpenAI មិនរកប្រាក់ចំណេញជា​មួយគ្នានៅក្នុងឆ្នាំ២០១៥ ប៉ុន្តែទំនាក់ទំនងចាប់ផ្តើមរង្គោះរង្គើរនៅពេល Elon Musk ចាកចេញពីក្រុមហ៊ុននេះនៅឆ្នាំ២០១៨។ ទន្ទឹមនឹងនេះ Altman កំពុងរៀបចំរចនាសម្ព័ន្ធក្រុមហ៊ុនឡើងវិញដើម្បីក្លាយជាអង្គភាពរកប្រាក់ចំណេញ។ ការផ្លាស់ប្តូរនេះធ្វើឲ្យ Elon Musk យល់ឃើញថា Altman បោះបង់ចោលនូវបេសកកម្មដើមរបស់ក្រុមហ៊ុនក្នុងការបង្កើត AI មិនរកប្រាក់ចំណេញដើម្បីជាប្រយោជន៍របស់មនុស្សជាតិ ប៉ុន្តែបែរជារៀបចំរចនាសម្ព័ន្ធឡើងវិញដើម្បីក្លាយជាអាជីវកម្មរកប្រាក់ចំណេញទៅវិញ។ យ៉ាងណាមិញ OpenAI ប្រកែកថាការផ្លាស់ប្តូររបស់ខ្លួនទៅជាក្រុមហ៊ុនរកប្រាក់ចំណេញគឺដើម្បីទទួលបានប្រាក់ដែលត្រូវការសម្រាប់ការបង្កើតគំរូបញ្ញាសិប្បនិម្មិតដ៏ល្អបំផុត។

ការដេញថ្លៃដើម្បីកាន់កាប់ OpenAI កំពុងត្រូវបានគាំទ្រដោយក្រុមហ៊ុនបញ្ញាសិប្បនិម្មិត xAI របស់ Musk ក៏ដូចជាក្រុមហ៊ុនភាគហ៊ុនឯកជនមួយចំនួនរួមមាន ក្រុមហ៊ុន Baron Capital Group និង Valor Management ។ Elon Musk បានលើកឡើងនៅក្នុងសេចក្តីថ្លែងការណ៍មួយថា OpenAI គួរត្រលប់ទៅប្រភពបើកចំហរដែលផ្តោតលើសុវត្ថិភាពដូចកាលពីមុន ហើយខ្លួននឹងធ្វើឱ្យប្រាកដថា វានឹងកើតឡើង។ ទោះបីជាការផ្តល់ជូនសំណើដែលមានតម្លៃ ៩៧,៤ ពាន់លានដុល្លារក៏ដោយ ប៉ុន្តែតម្លៃទាបជាង ១៥៧ ពាន់លានដុល្លារដែលក្រុមហ៊ុន OpenAI ត្រូវបានវាយតម្លៃកាលពីខែតុលាឆ្នាំមុន។ ឥឡូវនេះ គេរាយការណ៍ថា តម្លៃក្រុមហ៊ុន OpenAI មានតម្លៃ ៣០០ ពាន់លានដុល្លារនាពេលបច្ចុប្បន្ននេះ។

ទន្ទឹមនឹងនេះ ក្រុមហ៊ុនបង្កើត ChatGPT មួយនេះក៏កំពុងសហការជាមួយក្រុមហ៊ុនបច្ចេកវិទ្យាយក្សរបស់អាមេរិកមួយទៀតគឺ Oracle រួមជាមួយនឹងក្រុមហ៊ុនវិនិយោគជប៉ុន និងមូលនិធិទ្រព្យសម្បត្តិអធិបតេយ្យភាព Emirati ដើម្បីសាងសង់ហេដ្ឋារចនាសម្ព័ន្ធបញ្ញាសិប្បនិម្មិតមានតម្លៃ ៥០០ ពាន់លានដុល្លារនៅក្នុងសហរដ្ឋអាម៉េរិក៕