សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ សហព័ន្ធស្រូវ អង្ករកម្ពុជាបានបង្ហាញរបាយការណ៍៧ខែរបស់ខ្លួន ដោយបានរំពឹងថា ការនាំចេញអង្កររបស់កម្ពុជា នឹងមានការកើនឡើង ហើយប្រទេសដែលមានតម្រូវការអង្ករ នឹងរត់មករកប្រទេសដែលមានការនាំចេញ ដោយចាត់ទុកថា ការហាមឃាត់នាំចេញអង្កររបស់ប្រទេសឥណ្ឌា អេមីរ៉ាតអារ៉ាប់រួម និងរុស្ស៊ី នឹងបង្កលក្ខណៈល្អ ជាឱកាសសម្រាប់កម្ពុជាបង្កើនការនាំចេញ។
បណ្ឌិត ហុង វណ្ណៈ ប្រធាននាយកដ្ឋានសេដ្ឋកិច្ចអន្តរជាតិនៃវិទ្យាស្ថានទំនាក់ទំនងអន្តរជាតិ នៃរាជបណ្ឌិត្យសភាកម្ពុជា បានប្រាប់ AMS ថាក្នុងដំណាក់កាលនេះកម្ពុជាមិនមានផលប៉ះពាល់អ្វីទេ ទោះបីមានស្បៀងសកលមានការឡើងថ្លៃ ព្រោះថាវិបត្តិស្បៀងអាហារ ពិភពលោកបានជួបបញ្ហា តាំងតែពីការរីករាលដាលនៃជំងឺកូវីដ-១៩មកម៉្លេះ ។ វិបត្តិស្បៀងនេះ វាកើតឡើងខ្លាំង បន្ទាប់ពីកើតមានសង្រ្គាមរវាងរុស្ស៊ី និងអ៊ុយក្រែន ដែលនាំឱ្យប្រទេសមួយចំនួន មិនបានផលិត ឬកាត់បន្ថយការផលិត ដែលនាំឱ្យតម្លៃស្បៀងអាហារកើនឡើង។
លោកបណ្ឌិតអាះអាងថា ដោយសារតម្រូវការបរិមាណតម្រូវការថយចុះ ស្បៀងឡើងថ្លៃ កម្ពុជានឹងមានលទ្ធភាពនាំចេញទៅតាមផែនការរបស់ខ្លួនរហូតទៅដល់ ៧០ម៉ឺនតោននៅក្នុងឆ្នាំ២០២៣ នេះ ទៅតាមគម្រោងដែលបានគ្រោងទុករបស់សហព័ន្ធស្រូវ អង្ករកម្ពុជា។
លោកបណ្ឌិត ហុង វណ្ណៈ បានមានប្រសាសន៍ថា ៖ «ការនាំចេញស្បៀងបានគឺយើងមានសន្និទ្ធិច្បាស់លាស់ទៅហើយ ទាំងលក្ខណៈគ្រួសារ ទាំងសហគមន៍ និងទាំងលក្ខណៈក្រុមហ៊ុន ក៏មិនមានជាបញ្ហា ព្រមទាំងទទួលបានតម្លៃឡើងថ្លៃមួយកម្រិតផងទៀតក្នុងស្ថានភាពបច្ចុប្បន្ននេះ»។
លោកបណ្ឌិតបានគូសបញ្ជាក់ថា ៖ «ជារួមខ្ញុំយល់ថាជាឱកាសសម្រាប់បងប្អូនប្រជាពលរដ្ឋនឹងទទួលបានតម្លៃ ដោយលក់បានថ្លៃ កាន់តែមានភាពងាយស្រួល មិនពិបាករកម៉ូយ។ តែស្ថាប័នពាក់ព័ន្ធត្រូវគិតដល់បញ្ហាប្រែប្រួលខ្លាំងនៃអាកាសធាតុ ក៏នាំវិបត្តិដល់ពិភពលោកផងដែរ។ វានាំឱ្យមានឧបសគ្គដល់ស្បៀងអាហារការធ្វើកសិកម្មមិនបានផលល្អ ដែលយើងក៏ជួបប្រទះដែរ។ យើងត្រូវមើលទៅដល់កត្តាជាក់ស្ដែង ទោះបីយើងមានសន្និធិស្បៀងក៏ត្រូវមានភាពច្បាស់លាស់ ព្រោះយើងបាននាំចេញនូវផលិតផលហើយ និងបានផលចំណេញ តែការលក់ច្រើនពេកវាអាចនឹងមានការខ្វះខាតដែរ»។
ក្នុងបរិបទនេះ លោកឧកញ៉ា ចាន់ សុឃាំង ប្រធានសហព័ន្ធស្រូវអង្ករកម្ពុជាបានបញ្ជាក់ថា ការហាមឃាត់នាំចេញអង្កររបស់ឥណ្ឌា និងបណ្ដាប្រទេសផ្សេងទៀតនៅពេលនេះ បានធ្វើឱ្យប្រទេសជិតខាងសម្រុកទិញស្រូវពីកសិករកម្ពុជា។ ការណ៍នេះ នាំឱ្យតម្លៃស្រូវកើនឡើងខ្ពស់លើសពីការរំពឹងទុក ដែលជាហេតុធ្វើឱ្យប៉ះពាល់ដល់ការនាំចេញអង្ករមួយចំនួនដែរ ព្រោះថាថ្លៃដើមនៃការផលិតកើនឡើង។
លោក ចាន់ សុឃាំង បានកត់សម្គាល់ពីបច្ចុប្បន្នភាពនៃតម្លៃអង្ករ ដែលនាំចេញបានកើនឡើង១៥ភាគរយ ប៉ុន្តែតម្លៃស្រូវដែលប្រមូលទិញពីកសិករវិញ ហក់ឡើងខ្ពស់រហូតដល់២៥ភាគរយ។ ជាក់ស្ដែង នៅថ្ងៃទី៧ ខែសីហា ស្រូវមានតម្លៃចន្លោះពី១២០០រៀល ទៅ ១៣០០រៀល ក្នុងមួយគីឡូក្រាម។
សូមជ្រាបថា ជាមធ្យមកសិករកម្ពុជាផលិតស្រូវបានសរុបប្រមាណ ១២ លានតោនក្នុងមួយឆ្នាំ គឺលើសពី ៦ លានតោន សម្រាប់ការនាំចេញដែលធ្វើឱ្យកម្ពុជាក្លាយជាប្រទេសដែលនាំចេញស្រូវអង្ករជាប់លេខរៀងទី ៨ នៅលើពិភពលោក ខណៈដែលប្រទេសដែលនាំចេញអង្ករធំៗជាងគេរបស់ពិភពលោកមាន ឥណ្ឌា៤០,៥ភាគរយ ថៃ១៥,៣ភាគរយ វៀតណាម១៣,៥ភាគរយ និងប្រទេសផ្សេងទៀត៣០, ៧ភាគរយសម្រាប់ឆ្នាំ២០២២-២០២៣ ៕
Account
Security
Favourite Content