បរទេស៖ យោងទៅតាមប្រភពពី The Economic News បានបង្ហាញថា តម្លៃមាសធ្លាក់ចុះជិតកម្រិតទាបក្នុងរយៈពេលមួយខែកន្លងមកនេះ ខណៈដែលអតិផរណារបស់សហរដ្ឋអាមេរិកចុះត្រជាក់ជាងការរំពឹងទុក។

ទីផ្សារតម្លៃមាសធ្លាក់ចុះ ១,៤ ភាគរយ ឬ ១ ៩១៤ ក្នុងមួយអោនក្នុងកម្រិតទាបបំផុតតាំងខែកក្កដាមក បើធៀបទៅនឹងតម្លៃសប្តាហ៍មុន មាសឡើងថ្លៃដល់ ១ ៩៣៦ ដុល្លារក្នុងមួយអោន។ នៅសប្តាហ៍នេះ តម្លៃមាសបានធ្លាក់ចុះដោយសារសន្ទស្សន៍ប្រាក់ដុល្លារអាមេរិក និងមូលបត្របំណុលរបស់រតនាគារបានកើនឡើង ៤សប្តាហ៍ជាប់ៗគ្នា។ លើសពីនេះ សន្ទស្សន៍តម្លៃទំនិញប្រើប្រាស់របស់សហរដ្ឋអាមេរិក (CPI) បានកើនឡើង ០,២ ភាគរយកាលពីខែមុន ខណៈដែលអត្រាប្រចាំឆ្នាំកើនឡើង ៣,២ ភាគរយ។

តាមទិន្នន័យទាំងនេះ អ្នកវិនិយោគសង្ឃឹមថា អ្នកបង្កើតគោលនយោបាយរបស់ធនាគារកណ្តាលអាមេរិកនឹងមិនដំឡើងអត្រាការប្រាក់ថែមទៀតទេនៅឆ្នាំ២០២៣នេះ និង ប្រហែលជាអាចកាត់បន្ថយអត្រាការប្រាក់នៅដើមឆ្នាំក្រោយ។ ទន្ទឹមនឹងនេះ ប្រធានធនាគារកណ្តាលទីក្រុង Philadelphia លោក Patrick Harker បាននិយាយថា ធនាគារកណ្តាលកំពុងរៀបចំធែនការក្នុងការប្រយុទ្ធប្រឆាំងនឹងអតិផរណា។

ប្រធានធនាគារកណ្តាលទីក្រុង San Francisco លោកស្រី Mary Daly ក៏បាននិយាយដែរថា ទោះបីជាទិន្នន័យអតិផរណាថ្មីៗនេះកំពុងមាននិន្នាការក្នុងទិសដៅត្រឹមត្រូវក៏ដោយ ប៉ុន្តែវានៅតែទាមទារឲ្យមានការពង្រឹងបន្ថែមទៀត ដើម្បីឲ្យមានទំនុកចិត្តថាធនាគារកណ្តាលបានចាត់វិធានការគ្រប់គ្រាន់។ ក្នុងអំឡុងពេលនៃអតិផរណាខ្ពស់ និន្នាការនៃតម្រូវការមាសមានការកើនឡើង ដោយសារអ្នកវិនិយោគស្វែងរកទ្រព្យសម្បត្តិដែលមានសុវត្ថិភាពក្នុងការទប់ទល់នឹងអតិផរណា។ មិនត្រឹមតែប៉ុណ្ណោះ ​ការ​ដំឡើង​អត្រា​ការ​ប្រាក់ធ្វើឲ្យកំណើននៃតម្រូវការមាស​កើនឡើងផងដែរ ដោយសារមនុស្សទិញមាសដើម្បីបម្រុងទុកជាទ្រព្យសម្បត្តិដែលមានសុវត្ថិភាព។ បើទោះបីជា មាសត្រូវបានចាត់ទុកថាជាគ្រឿងមានតម្លៃសម្រាប់ទប់ទល់នឹងអតិផរណា ប៉ុន្តែវាមិនសូវទទួលបានការចាប់អារម្មណ៍នៅលើទីផ្សារបច្ចុប្បន្ននេះ ដែលអាចបង្ហាញថាជាសញ្ញាអវិជ្ជមាន។ តម្លៃមាសនៅទូទាំងពិភពលោកបានធ្លាក់ចុះជិតដល់កម្រិតទាបក្នុងរយៈពេល ៤ ខែកន្លងមកនេះ ខណៈដែលអ្នកវិនិយោគសង្ឃឹមថាតម្លៃនឹងធ្លាក់ចុះត្រឹម​កម្រិត ១ ៩០០ ដុល្លារក្នុងមួយអោន៕